ԱՐՄԷՆ ՌՈՒՍՏԱՄԵԱՆ. «ՅԵՂԱՓՈԽՈՒԹԻՒՆԸ ՏԱԿԱՒԻՆ ՆՈՒԱՃԵԼԻ Է»

0

Արմաւիր քաղաքի թիւ 1 մշակութային տան կողքի հրապարակին վրայ ՀՅԴ-ն 3 Դեկտեմբերին հանրահաւաք մը կազմակերպեց:
ՀՅԴ նախընտրական ցուցակը գլխաւորող, ՀՅԴ Բիւրոյի քաղաքական ներկայացուցիչ Արմէն Ռուստամեան, դիմելով ներկաներուն, յայտնեց, որ Դաշնակցութիւնը ընտրութիւններուն կը մասնակցի յստակ գիտակցութեամբ, որ այս ընտրութիւնները Հայաստանի համար բախտորոշ պիտի ըլլան: Անոր խօսքով`այս տարի ամէնէն կարեւոր դէպքը տեղի ունեցաւ. ժողովրդական շարժումի միջոցով կարելի եղաւ երկրի համար նոր հեռանկար ուրուագծել:

«Այն, ինչ որ կատարուեցաւ յետոյ, սակայն, մեր գնահատումով` պարզապէս վարչախումբի փոփոխութիւն էր, եթէ չըսեմ` մարդափոխութիւն: Յեղափոխութիւնը տակաւին նուաճելի է, ՅեղափոխութԻւնը լիարժէք կ’ըլլայ, երբ իւրաքանչիւրիս տան մէջ զգանք անոր դրական պտուղները, երբ հասկնանք, թէ ձեւաւորուած է իշխանութիւն մը, որ շատ պարզ կը գիտակցի թէ մեր արտաքին, թէ ներքին վտանգներուն, մարտահրաւէրներուն եւ անոր համար ունի ուժ, կարողութիւն եւ յստակ ծրագիրներ, որոնք այդ իրավիճակէն դուրս կը բերեն մեր երկիրը: Յեղափոխութիւնը տեղի կ’ունենայ այս ընտրութիւններուն արդիւնքով ձեւաւորուած իշխանութիւններուն կողմէ», ըսաւ Ռուստամեան:
Ըստ անոր, այսօրուան պայմաններով յայտարարել, թէ 2019-ին մենք ծայրայեղ աղքատներ պիտի չունենանք, Դաշնակցութեան համար, որպէս ընկերվարական կուսակցութիւն, անտրամաբանական է: Ռուստամեանի խօսքով` Հայաստանի մէջ պէտք չէ ըլլան մարդիկ, որոնց եկամուտը 70-80 000 դրամէն նուազ ըլլայ եւ անոր համար ալ Դաշնակցութիւնը առաջադրած է իր թեկնածութիւնը, որպէսզի հարցերը արծարծուին ու անոնց լուծում տրուի:
Ռուստամեանի հաւաստիացումով` միայն ներքին համերաշխութեան շնորհիւ կրնանք դիմակայել արտաքին մարտահրաւէրները. «Օրը-օրին սահմանին վրայ կուտակումներ կը տեսնենք եւ մենք ուրիշ ելք չունինք, քան` մէկս միւսով հզօրանալը, ողջ հայութեան ներուժը օգտագործելը, կազմակերպելը: Սփիւռք-Արցախ-Հայաստան եռամիասնութիւնը պէտք է պահպանուի եւ հռետորաբանութենէն օր առաջ պէտք է ազատիլ: Այս քարոզարշաւը կ’աւարտի, այս ամէնը կը մոռցուի, բայց մարտահրաւէրները` ներքին եւ արտաքին, պիտի չվերանան: Անոր համար ալ պէտք է ընտրել այն քաղաքական ուժը, որ գիտէ` ինչպէս վարուի այսպիսի պարագաներու, ինչ հարցեր կան մեր առջեւ դրուած եւ անոնց համապատասխան ինչպիսի ծրագիրներ կան»:

Արմաւիրի մէջ ՀՅԴ պատգամաւորութեան վարկանշային թեկնածու Արծուիկ Մինասեանն ալ յայտնեց, որ Դաշնակցութեան տրուած իւրաքանչիւր քուէն աւելի կը մօտեցնէ մեզ դէպի այն Հայաստանին, որուն մասին բոլորը կը խօսին: Մինասեանի խօսքով` Դաշնակցութիւնը երկու կարեւոր հարց պիտի լուծէ. «Առաջինը այն է, որ պատգամաւորը, որ պիտի ընտրուի Արմաւիրի մարզէն, պիտի ըլլայ պետութեան կողմը, իր նախաձեռնութիւններով պետութիւնը պիտի հզօրացնէ, սահմանները անվտանգ պահելու, մեր զինուորի հեղինակութիւնն ու առողջութիւնը բարձր պահելու դիրքերուն վրայ: Երկրորդ հարցն ալ այն է, որ Արմաւիրի մարզի բոլոր հարցերը պիտի ներկայացուին Ազգային Ժողովին մէջ, պիտի դրուին կառավարութեան առջեւ եւ պիտի քննարկուին մինչեւ վերջ, որպէսզի լուծուին»:
Մինասեանի հաւաստիացումով` Արմաւիրի մարզին մէջ քանի մը սկզբունքային հարցեր կան. որպէս գիւղատնտեսական մարզ` ամբողջ գիւղատնտեսութիւնը պէտք է վերափոխել` սկսած ոռոգումի ջուրէն, հասնելով բերքի իււրացում: Բացի այդ, ըստ Մինասեանի, մարզին մէջ անհրաժեշտ է ոչ գիւղատնտեսական աշխատատեղեր ստեղծել:
«Մենք մեր ներդրումային ծրագիրները պիտի ներկայացնենք նաեւ Սփիւռքին: Ունենալով հսկայական կարելիութիւն` Դաշնակցութիւնը ի վիճակի է եւ ունակ է Սփիւռքին առարկայօրէն ներգրաւուելու զարգացումի ծրագիրներուն մէջ: Որեւէ այլ ուժ, ցաւօք, այսօր չի տիրապետեր այդ կարելիութիւններուն, ուստի մենք` իբրեւ համահայկական, համազգային քաղաքական ուժ, կրնանք, ունակ ենք եւ վճռական տրամադրուած ենք այս հարցերը լուծելու: Բոլոր անոնք, որոնք կը նախընտրեն այլ քաղաքական ուժ, համոզուած կ’ըսեմ` յաջորդ ընտրութիւններուն պիտի միանան մեզի, ձեզի, քանի որ դուք հայու էութիւնն էք, հպարտ հայու կեցուածքը», ըսաւ Մինասեանը:
Մինասեան շնորհակալութիւն յայտնեց բոլոր անոնց, որոնք կ’աջակցին, որպէսզի օր առաջ մեր երկրէն դուրս մղել այն մտայնութիւնը, որ կը վերաբերի հայկական աւանդական ընտանիքին: Ան յայտնեց, որ այն այլասերուածութիւնները, որոնք կը վարկաբեկեն մեր հոգեւոր արժէքները, այն երեւոյթները, որոնք նպատակ ունին քայքայել մեր բանակը, պիտի հեռացուին երկրէն եւ անոնց փոխարէն պիտի ստեղծուի հասարակութիւն մը, երկիր ու պետութիւն մը, ուր իւրաքանչիւր մանուկ իր ապագան պիտի տեսնէ, իւրաքանչիւր երիտասարդ պիտի ունենայ պատշաճ կրթութիւն: «Ձեզմէ իւրաքանչիւրը դաշնակցական է, ձեզմէ իւրաքանչիւրը ազգային է եւ ուրեմն միասին մեր բարեկամներու, դրացիներու շրջանակին մէջ քարոզենք մեր գաղափարները, քանի որ մենք միասին ուժեղ ենք, միասին կրնանք կերտել հզօր Հայաստան: Յաղթանա՛կ Դաշնակցութեան, յաղթանա՛կ հայ ժողովուրդին», ըսաւ Մինասեան:
ՀՅԴ Գերագոյն Մարմինի ներկայացուցիչ Արսէն Համբարձումեանի խօսքով` յառաջիկային տեղի ունենալիք Ազգային Ժողովի ընտրութիւնները իրապէս կարեւոր են Հայաստանի զարգացման հեռանկարին առումով: Անոնք կարեւոր ընտրութիւններ են, քանի որ, ըստ անոր, մենք կը գտնուինք կարեւոր ջրբաժանի մը առջեւ:
Համբարձումեան յայտնեց, որ մեծ յոյս արթնցած է ժողովուրդին մօտ եւ ժողովուրդը միահամուռ կերպով արդէն իսկ մերժած է փտածութիւնը, թալանը, ամբարտաւան կեցուածքը` այն բոլոր երեւոյթները, որոնց դէմ տարիներով պայքար մղուած է: Այսօր, ըստ անոր, կայ մեծ յոյս բեկումնային փոփոխութիւններ կատարելու, սակայն, նոյն ատեն, կայ նաեւ անորոշութիւն:
«Յստակ չէ, թէ ինչ ծրագիրներով, քատրերով ու ինչ քաղաքականութեամբ ատիկա կարելի է իրականացնել: Միտումնաւոր կերպով փորձ կը կատարուի շրջանցել այս կարեւորագոյն հարցերը եւ քարոզարշաւը մղել սեւ-ճերմակի դաշտ: Ինչքան կարելի է տառապիլ քաղաքական գունակուրութեամբ: Ո՞վ ձեզի իրաւունք տուած է հայ ժողովուրդը սեւ ու ճերմակի բաժնելու: Մեր մօտ համոզմունք ձեւաւորուած է, որ միտումնաւոր աշխատանք կայ, ինչպէս Երեւանի աւագանիի ընտրութիւններու ընթացքին գոյութիւն ունէր, քաղաքական պայքարը տանիլ սեւ ու ճերմակի դաշտ, բովանդակազրկել քարոզարշաւը, քանի որ օրակարգի վրայ գտնուող հիմնական հարցերը յստակ պատասխան չունին», ըսաւ Համբարձումեան:
Ան յայտնեց նաեւ, որ անցեալի էջը անընդհատ փակելու ու նոր ծրարաւորումով անցեալին վերադարձը բացառելու համար` նախ անհրաժեշտ է հրաժարիլ չարիքի արմատներէն: Ըստ Համբարձումեանի, խօսքը քաղաքական մենիշխանութեան եւ ազգային ներուժի պառակտումին մասին է: «Որեւէ մենիշխանութեան պէտք է վճռական ոչ ըսել: Յստակ պէտք է արձանագրել, որ ազգային ներուժի պառակտումի որեւէ փորձ պէտք է մերժուի: Սակայն միայն այս պատճառները վերացնելով կարելի չէ յառաջընթաց արձանագրել, շատ կարեւոր է, թէ ի՛նչ կ’ուզենք ընել», ըսաւ Համբարձումեան:
Ան համառօտ կերպով ներկայացուց Դաշնակցութեան ընելիքները` անդրադառնալով, որ իրենք կողմնակից են, որ պետութիւնը ստանձնէ ամբողջովին նոր դերակատարութիւն ընկերա-տնտեսական քաղաքականութեան մէջ: Համբարձումեանի կարծիքով` պետութիւնը չի կրնար ձեռքերը լուալ ու մէկ կողմ քաշուիլ. ազատ շուկայի միջոցով մեր երկրին մէջ կուտակուած հարցերը լուծումներ չեն ստանար: «Պետութիւնը չի կրնար ըլլալ դիտորդի կարգավիճակի մէջ, չի կրնար ունենալ կրաւորական կեցուածք: Պետութիւնը պէտք է գործուն մասնակցութիւն ունենայ թէ՛ տնտեսական զարգացման, թէ՛ ազգային արդիւնքի արդար վերաբաշխման ուղղութեամբ: Մենք ընկերային արդարութեան համոզուած կողմնակիցն ենք, քանի որ ունինք ազգային պայքար, որ կ’ենթադրէ ազգային համերաշխութիւն: Միայն ընկերապէս արդար հասարակութիւնը կրնայ համերաշխ ըլլալ, միայն համերաշխ հասարակութիւնը կրնայ կերտել ուժեղ պետութիւն: Ասի մեր համոզումն է եւ ասոնք խօսքեր չեն, այլ ծրագիրներ, որոնք Դաշնակցութիւնը կը պատրաստուի իրականացնել», ըսաւ Համբարձումեան:
Անոր խօսքով` Դաշնակցութիւնը ազգային ուժ է: Դաշնակցութիւնը, ըստ Համբարձումեանի, ունի մէկ տէր` հայութիւնը. այնտեղ, ուր կայ հայ հաւաքականութիւն, այնտեղ ներկայ է Դաշնակցութիւնը, այնտեղ, ուր մեր ազգային արժէքներուն վտանգ կը սպառնայ, հոն ներկայ է Դաշնակցութիւնը: «Սիրելի՛ ժողովուրդ, մենք քու Դաշնակցութիւնն ենք, մենք հաւատարիմ ենք մեր հողին եւ մեր ժողովուրդին: Այդպէս եղած է, այդպէս է ու այդպէս պիտի ըլլայ», եզրափակեց Համբարձումեան:

Share.

Leave A Reply

This site uses Akismet to reduce spam. Learn how your comment data is processed.