ՍԱՐԳԻՍ ԿԱՐԱՊԵՏԵԱՆ. «ՄԻ՛ ԱՌԱՋՆՈՐԴՈՒԻՔ ԱՄԲՈԽԱՎԱՐՈՒԹԵԱՄԲ, ՅԻՇԵՑԷՔ, ՈՐ Կ’ԸՆՏՐԷՔ ՁԵՐ ԵՒ ՁԵՐ ԶԱՒԱԿՆԵՐՈՒՆ ԱՊԱԳԱՆ»

0

Հայաստանի Հանրապետութեա Ազգային Ժողովի արտահերթ ընտրութիւններուն թիւ 1 ընտրատարածքի մէջ ՀՅԴ վարկանշային ցուցակով առաջադրուած թեկնածու Սարգիս Կարապետեան «Երկիր»ի հետ զրոյցի մը ընթացքին, անդրադառնալով, թէ Դաշնակցութիւնը ինչ հարցեր պէտք է հետապնդէ գալիք խորհրդարանին մէջ եւ անձամբ ի՞նչ հարցեր պիտի բարձրացնէ, եթէ ընտրուի ըսաւ, որ կը կարծէ, որ ուշադրութիւն պէտք է դարձնել որակեալ սերունդի դաստիարակումին, որուն համար անհրաժեշտ է ՀՀ իւրաքանչիւր քաղաքացիի բարձրագոյն կրթութիւն ստանալու առիթ տրուի: Այդ նպատակով կրթութիւնը պէտք է դարձնել անվճար:
Բացի ատկէ, պէտք է վերացուի Ազգային Ժողովի պատգամաւորի անձեռնմխելիութեան դրոյթը: Այս հարցը միշտ բարձրացուած է ՀՅԴ Ազգային Ժողովի պատգամաւորներու կողմէն, սակայն չէ ստացած աջակցութիւն որեւէ մէկ խմբակցութեան կողմէն:Ան նաեւ կը կարծէ, որ այսօր արդիական է ընդունիլ օրէնք, որ կը բացառէ Արցախի հարցին մէջ Արցախի Հանրապետութեան Սահմանադրութեան հակասող որեւէ զիջում:
Պատասխանելով այն հարցումին, թէ ինչպէ՞ս կը պատկերացնէ Դաշնակցութեան փոխյարաբերութիւնները այլ քաղաքական ուժերու հետ, յատկապէս` խորհրդարանական գործունէութեան ընթացքին Կարապետեան ըսաւ, որ ՀՅԴ-ն պատրաստ է համագործակցիլ որեւէ քաղաքական ուժի հետ, որուն ծրագիրները համահունչ են ՀՅԴ ծրագիրներուն: «Որեւէ ուժ, որուն գործունէութիւնները միտուած են Հայաստանի Հանրապետութեան բարօրութեան, բարգաւաճումին ու զարգացումին, ցանկալի գործընկեր կրնայ ըլլալ ՀՅԴ-ի համար:
Անդրադառնալով, թէ այսօր ՀՅԴ-ի հասցէին տարբեր կողմերէ կը հնչեն քննադատութիւններ, Կարապետեանի կարծիքով ՀՅԴ-ն 128 տարուան պատմութեան ընթացքին բազմիցս յայտնուած է քննադատութիւններու թիրախ: Շատ մը ուժեր, որոնք քննադատած են ՀՅԴ, այժմ չկան, իսկ ՀՅԴ-ն կը շարունակէ իրագործել իր ծրագիրները: Այսօր ալ հերթական հակաքարոզչութեան ականատես կ’ըլլանք, փորձ կը կատարուի հեղինակազրկել ազգայինը: «Համոզուած եմ, որ այն ուժերը կամ անհատները, որոնք զբաղած են այդ անպտուղ գործով, կ’անցնին պատմութեան գիրկը, իսկ ՀՅԴ-ն կը շարունակէ իր վեհ գործունէութիւնը», յայտնած է ան:
Իսկ անդրադառնալով այն դիտարկումին, թէ յայտնի է, որ քաղաքական ուժերը քարոզարշաւներու ընթացքին շեշտը ոչ թէ կը դնեն իրենց ծրագիրներն ու գաղափարները ներկայացնելու, այլ միւս ուժերը նսեմացնելու վրայ` ըսելու համար, որ մրցակցիները «լաւ» չեն, մեզ ընտրեցէք, թեկնածուն արձագանգեց, որ հարց չունին սեւցնելու որեւէ ուժի, այդ գործելաոճը հարիր է այն ուժերուն, որոնք չունին կենսագրութիւն եւ ընդհանրապէս չեն ըրած դրական բան մը: «ՀՅԴ-ի գրասենեակները ամբողջ Հայաստանով մէկ կը գործեն տարին 12 ամիս, ի տարբերութիւն միւս քաղաքական ուժերուն, չեն բացուիր ընտրութիւններէն մկ ամիս առաջ եւ կ’անհետանան ընտրութիւններիւ աւարտէն ետք: Մենք կը ներկայացնենք մեր անցած ուղին եւ ծրագիրները, որոնք միտուած են Հայաստանի Հանրապետութեան քաղաքացիի կեանքին բարելաւումին: Դիմելով մեր քաղաքացիներուն` կը խնդրեմ, որ իրենց ընտրութիւնը կատարեն գիտակցաբար, ծանր ու թեթեւ ընեն բոլոր քաղաքական ուժերու ծրագիրները եւ նախընտրական խոստումները, քննարկեն՝ որոնք են իրականանալի եւ արդիական, որոնք՝ ուղղակի գեղեցիկ խօսքեր, նային անոնց անցած ուղիին, անոնց ցուցակի թեկնածուներուն համեմատեն միմեանց հետ, յետոյ՝ ընտրութիւն կատարեն:Մի՛ առաջնորդուիք ամբոխավարութեամբ եւ յիշեցէք, որ կ’ընտրէք ձեր եւ ձեր զաւակներու ապագան», եզրափակեց Սարգիս Կարապետեանը:

Share.

Leave A Reply

This site uses Akismet to reduce spam. Learn how your comment data is processed.