ԱՐՄԵՆՈՒՀԻ ԿԻՒՐԷՂԵԱՆ. «ԹԵԿՆԱԾՈՒՆԵՐՈՒ ՄԻՋԵՒ ԿՐԿԻՆ ԿԸ ԲԱՑԱԿԱՅԻ ԲԱՆԱՎԷՃԻ ՄՇԱԿՈՅԹԸ»

0

ՀՅԴ համամասնական ցուցակին մէջ ներկայացուած, Լոռիի մարզի վարկանշային ընտրակարգով առաջադրուած Արմենուհի Կիւրէղեան, «Թերթ»ի հետ զրոյցի մը ընթացքին ամփոփելով քարոզարշաւի ութերորդ օրը, յայտնեց, որ Դաշնակցութիւնը, ի տարբերութիւն միւս ուժերուն, կը ներկայացնէ իր ծրագիրը, գաղափարախօսութիւնը:

Անդրադառնալով «Իմ Քայլը» դաշինքը ղեկավարող Նիկոլ Փաշինեանի յայտարարութեան, թէ ԱԱԾ-ն պիտի զբաղի անոնցմով, որոնք կասկածի մէջ են թէ Արցախի հարցով սխալ քաղաքականութեան մէջ են եւ հակայետախուզութիւնը պիտի հասկնայ՝ իրենք օտարերկրեայ գործակալ են, թէ ոչ, քանի որ ասի պետական դաւաճանութիւն է, Արմենուհի Կիւրէղեան ըսաւ, որ որու ալ նկատի ունենայ, այսպիսի արտայայտութիւն կարելի չէ ընել: «Ընդհանրապէս ատիկա կը նշանակէ այլ կարծիք չունենալ, ինչպէ՞ս կարելի է այլակարծութիւնը համարել օտարերկրեայ գործակալի աշխատանք», ըսաւ ան:
Ընդհանուր առմամբ, Արմենուհի Կիւրէղեան Նիկոլ Փաշինեանի կողմէ կիրառուող բառապաշարը համարեց վարչական աղբիւրի կիրառման նոր ձեւ մը: «Այսինքն՝ մարդոց այդ ելոյթներով կը վախցնեն: Եթէ նախորդները կը քննադատէինք ընտրակաշառքով քուէներ գնելու մէջ, ես այսօր այս ուժի մէջ կը տեսնեմ վախի մթնոլորտ ստեղծելով քուէներ հաւաքելու փորձ, ատիկա վարչական աղբիւրի կիրառում է: Ի՞նչ կը նշանակէ` գիւղապետնե՛ր, ես ձեզի պատին կը ծեփեմ», ըսաւ ան եւ նկատեց, որ այս ընթացքին Նիկոլ Փաշինեան չի ներկայանար որպէս վարչապետ, իսկ որպէս թեկնածու իրաւունք չունի վարչապետի անունով հրահանգներ տալու գիւղապետներուն:
Ըստ անոր, քանի տակաւին Նիկոլ Փաշինեան քարոզարշաւը կը տանի այս բառապաշարով, Դաշնակցութեան ձայները օրը-օրի կ’աւելնան:
«Անկեղծ ըսեմ, շնորհակալ եմ իրմէ, որ այսպիսի քարոզարշաւ կը վարէ, քանի որ անով մեր վարկանիշը համեմատաբար կը բարձրանայ», ըսաւ թեկնածուն եւ նկատել տուաւ, որ Դաշնակցութիւնն է, որ քարոզարշաւը աւելի շատ կը տանի ծրագիրներու ներկայացումով, գաղափարախօսութեամբ եւ հանրութիւնը ծրագիրներ լսելու կարիք ունի, ուստի Դաշնակցութեան վարկանիշը աւելի կը բարձրանայ:
Յատկապէս, անդրադառնալով Լոռիի մարզին մէջ քարոզչութիւն կատարելուն՝ Արմենուհի Կիւրէղեան նկատեց պաստառներու չափազանցուած թիւը եւ յայտնեց, որ ամբողջ ծառերն իսկ պաստառապատուած են: Ան նաեւ ըսաւ, որ վարկանշային թեկնածուներու միջեւ բանավէճի մշակոյթը չկայ: Ըստ անոր, Դաշնակցութիւնը անպայման ներկայացուած պիտի ըլլայ Ազգային Ժողովին մէջ:

Share.

Leave A Reply

This site uses Akismet to reduce spam. Learn how your comment data is processed.