ՆԻԿՈԼ ՓԱՇԻՆԵԱՆ ԱՐՁԱԳԱՆԳԵՑ ԱՐՄԷՆ ՌՈՒՍՏԱՄԵԱՆԻՆ. «ՅԵՂԱՓՈԽՈՒԹԻՒՆԸ ԱՐՑԱԽԻ ԴԷՄ ԴԱՒԱԴՐՈՒԹԻՒՆ ՀԱՄԱՐՈՂՆԵՐԸ ՊԷՏՔ Է ՀՐԱՒԻՐԵՆ ԱԱԾ ՈՒ ԸՍԵՆ՝ ՏՈՒԷՔ ՁԵՐ ՏՈՒԵԱԼՆԵՐԸ»

0

«Իմ Քայլը» դաշինքի համամասնական ցուցակը գլխաւորող, Հայաստանի Հանրապետութեան վարչապետի պաշտօնակատար Նիկոլ Փաշինեան 4 Դեկտեմբերի քարոզարշաւէն ետք լրագրողներուն հետ զրոյցի մը ընթացքին անդրադառնալով ՀՅԴ ցուցակը գլխաւորող Արմէն Ռուստմեանի՝ իր հասցէին հնչեցուցած քննադատութեան, թէ Փաշինեան անհասցէ յայտարարութիւններ կ’ընէ՝ ըսելով, որ որոշ ուժեր պատերազմի դաւադիր հրաձիգ կ’ուզեն դառնալ, յայտնեց, որ եթէ կան մարդիկ, որոնք կը յայտարարեն, թէ յեղափոխութիւնը ծրագիր է Արցախի դէմ դաւադրութիւն ընելու, Արցախը յանձնելու համար, պէտք է հասկնան, որ ատիկա ազգային անվտանգութեան հարց է։

«Կը հասկնա՞ք՝ պետական դաւաճանութեան մեղադրանք կը ներկայացնեն, այդ մարդիկ անհասցէ յայտարարութիւն կ’ընեն եւ հիմա համապատասխան մարդիկ, չէ՞ որ ատիկա ազգային անվտանգութեան հարց է, պէտք է այդ մարդոց հրաւիրեն ու ըսեն՝ տուէք ձեր տուեալները։ Եթէ կայ նման բան, ուրեմն՝ պէտք է դաւադիրները յայտնաբերուին ու պատասխանատուութեան ենթարկուին, իսկ եթէ պարզուի, որ սուտ յայտարարութիւններ կ’ընեն, առնուազն, պէտք է հանրութիւնը գիտնայ, որ այդ մարդիկ սադրիչ ստախօսներ են», շարունակեց Նիկոլ Փաշինեանը։

 

Ինչ կը վերաբերի Արմէն Ռուստամեանի միւս դիտարկումին, թէ Արամ Յարութիւնեանի նկատմամբ նման գործընթաց սկսիլը նախընտրական բեմականացում էր, քանի որ կարելի էր սպասել ընտրութեան աւարտին, Նիկոլ Փաշինեան ըսաւ․«Գիտէք՝ նախաքննութիւն ունի իր տրամաբանութիւնը եւ երբ կ’ապացուցէ ձեռք կը բերուի, այդ ապացոյցը պէտք է ունենան իր ընթացքը, քաղաքական խոչընդոտներ այդ ընթացքին համար պէտք չէ ըլլան։ Սակայն լուծարուած Ազգային Ժողովը այդ քաղաքական խոչընդոտը ստեղծած է»։

 

Յայտնենք, որ Ազգային ժողովի մէջ հերթական նիստը տեղի չունեցաւ՝ նիստին օրինաւոր թիւը չապահովուեցաւ, իսկ օրակարգին վրայ ներառուած էր Ազգային Ժողովի պատգամաւոր Արամ Յարութիւնեանի նկատմամբ ազատութենէ զրկելուն եւ անոր նկատմամբ քրէական հետապնդում հարուցելուն համաձայնութիւն տալու մասին հարցը։

 

Յիշեցնենք, որ Արամ Յարութիւնեանին կը վերագրուի պետական ծառայութեան եւ տնտեսական գործունէութեան դէմ ուղղուած առանձնապէս ծանր յանցանքներու կատարում:

 

Դատախազութենէն կը յայտնեն, որ  քրէական գործով ձեռք բերուած ապացոյցներու համակցութիւնը բաւարար հիմք կու տայ ՀՀ Ազգային Ժողովի պատգամաւոր Արամ Յարութիւնեանին սոյն գործով ներգրաւելու որպէս մեղադրեալ եւ մեղադրանք առաջադրելու առանձնապէս մեծ չափերով կաշառք ստանալու համար՝ ՀՀ քրէական օրէնսգիրքի 311-րդ յօդուածի 4-րդ մասի 2-րդ կէտով եւ յանցաւոր ճամբով ստացուած եկամուտներու օրինականացումին համար՝  190-րդ յօդուածի 3-րդ մասի առաջին կէտով:

 

Share.

Leave A Reply

This site uses Akismet to reduce spam. Learn how your comment data is processed.