ԱՐԾՈՒԻԿ ՄԻՆԱՍԵԱՆ. «ԴԱՇՆԱԿՑՈՒԹԻՒՆԸ, ՈՐՊԷՍ ԱԶԳԱՅԻՆ ԸՆԿԵՐՎԱՐԱԿԱՆ ԺՈՂՈՎՐԴԱՎԱՐԱԿԱՆ ՈՒԺ ՈՒՆԻ ՉԱՓԱՆԻՇԵՐ»

0

«Առաւօտ» լրատուական կայքէջը հետաքրքրուելով ՀՅԴ-էն պատգամաւորի թեկնածու առաջադրուած Արծուիկ Մինասեանէն անդրադարձած է, թէ Հայ Յեղափոխական Դաշնակցութեան նախընտրական ծրագիրը նոյնն է, ինչ որ նախորդ խորհրդարանական ընտրութիւններուն էր: Ինչո՞ւ ՀՅԴ-ի ծրագիրը կը կրկնուի, արդեօք այս ուժին համար իրողութիւն չէ՞ փոխուած, նոր մարտահրաւէրներ չկա՞ն, որ ՀՅԴ-ն ծրագրային մօտեցումները չէ փոխած:

 

128 տարուան քաղաքական այս ուժի ներկայացուցիչ Արծուիկ Մինասեանը պատասխանելով այն հարցումներուն ըսաւ. «Դաշնակցութիւնը, որպէս ազգային ընկերվարական ժողովրդավարական ուժ, բնականաբար, ունի չափանիշեր, ինչպէս որ աշխարհի շատ մը երկիրներու մէջ այսպիսի աշխարհայացք ունեցող քաղաքական ուժերը ունին իրենց մօտեցումները, անկախ անկէ, թէ ինչ իշխանութիւն է»:

 

Մինասեան մանրամասնեց. «Եթէ մենք կը խօսինք տնտեսական կեանքի մէջ պետութեան գործուն դերակատարութեան մասին, կապ չունի ինչ իշխանութիւն է, պետութիւնը ի դէմս կառավարութեան, պէտք է աշխուժօրէն միջամտէ տնտեսութեան, ի տարբերութիւն ազատականներուն, որոնք պետութեան դերը կը փոքրացնեն: Ատիկա կը նշանակէ նաեւ, որ մնացած բոլոր ուղղութիւններով՝ տնտեսական քաղաքականութեան, կ’ակնկալուի, որ այս ծրագիրին համապատասխան կառավարութիւնը թէ՛ աշխատատեղիներու ստեղծումին համար կը կրէ ուղիղ պատասխանատուութիւն, թէ՛ ընկերային կեանքի՝  կրթութենէն սկսած, կենսաթօշակներով աւարտած»:

 

Դաշնակցութեան ծրագիրին մէջ, ի դէպ, առանձին խորագիրով՝ «Պատասխանատու պետութիւն եւ գործուն տնտեսական քաղաքականութիւն» կը ներկայացուի ՀՅԴ-ի առաջարկները այդ ուղղութեամբ: Մինասեանը շարունակեց,- ծրագրային դրոյթներէն է նաեւ խորհրդարանական երկիրին հարիր նոր կառավարման համակարգի ստեղծումը.«2015-ին ունեցանք սահմանադրական փոփոխութիւններ, բայց ցաւօք, առ այսօր չունինք ատիկա լիարժէք ապահովող օրէնսդրութիւնը: Օրէնսդրական բարեփոխումները, որոնք կը բերեն գերվարչապետական համակարգի վերացումը, նախարարներու անհատական պատասխանատուութեան հիմնարկի  ներդրումը, վարչապետի գրասենեակի հաշուետուողականութիւնը՝ հանրութեան եւ խորհրդարանի առջեւ: Եւ չափուող ցուցանիշերով»:

 

Արծուիկ Մինասեանը առանձնացուց նաեւ տեղական ինքնակառավարման մարմիները, նկատելով՝ ՏԻՄ համակարգի դերի արժեւորում այնքան չունինք. «ՏԻՄ-երը բացարձակ օգտակար դեր չեն խաղար: ՏԻՄ-երը պէտք է զօրանան, պէտք է կառավարման ապակեդրոնացումը ներթափանցէ երկիր: Հակառակ պարագային մենք կ’ունենանք իշխանութիւն, որ կը թելադրէ ՏԻՄ-երը, որոնք չունենալով անհրաժեշտ ֆինանսական աղբիւրներ, կարողութիւններ, մշտապէս կը գտնուին կեդրոնական իշխանութեան ճնշումին տակ: Ասիկա պէտք է փոխուի»:

 

Մինասեան այն կարծիքի է, որ լուրջ վերանայումի կարիք ունի համայնքներու խոշորացման ծրագիրը. «Ասի շատ բնակավայրերու մէջ իր արդիւնաւետութիւնը չէ փաստած: Եւ քանի տակաւին չէինք տեսած փորձնականի վրայ դրական արդիւնքները, պէտք չէ տարածէինք: Հիմա լաւ է, որ կասեցուած է: Լաւ կ’ըլլայ վերանայուի ամբողջ ձեւաչափը»:

 

Share.

Leave A Reply

This site uses Akismet to reduce spam. Learn how your comment data is processed.