ՍԹԱՄՊՈՒԼԻ ՄԷՋ ՏԵՂԻ ՊԻՏԻ ՈՒՆԵՆԱՅ  ԻՏԼԻՊԻ ՀԱՐՑՈՎ ՌԴ-Ի, ԹՈՒՐՔԻՈՅ, ՖՐԱՆՍԱՅԻ ՈՒ ԳԵՐՄԱՆԻՈՅ ԱՌԱՋՆՈՐԴՆԵՐՈՒՆ 2-ՐԴ ԳԱԳԱԹՆԱԺՈՂՈՎԸ

0

Թուրքիոյ նախագահ Ռեճէպ Թայիպ Էրտողան, Ռուսիոյ նախագահ Վլատիմիր Փութինը, Գերմանիոյ վարչապետ Անկելա Մերքէլ եւ Ֆրանսայի նախագահ Էմմանուէլ Մաքրոն կրկին պիտի հանդիպին՝ քննարկելու Սուրիոյ Իտլիպ նահանգին մէջ ստեղծուած իրավիճակը եւ անոր հանգուցալուծման միջոցները:

Ըստ «Էրմէնի հապէր»ի, Ռուսիոյ նախագահականի խօսնակ Տիմիթրի Փէսքով յայտնած է, որ Մոսկուան արդէն իր համաձայնութիւնը տուած է մասնակցելու 4 երկիրներու ղեկավարներու 2-րդ գագաթնաժողովին:

Փէսքով ըսած է, որ ամենայն հաւանականութեամբ 2-րդ գագաթնաժողովը նոյնպէս պիտի ընթանայ Սթանպուլի մէջ, քանի որ անիկա Էրտողանի առաջարկով տեղի կ’ունենայ:

Կը յիշուի, որ հանդիպումին մասնակցելու պատրաստակամութիւն յայտնած է նաեւ գերմանական կողմը:

Աւելցնենք, որ նախորդ գագաթնաժողովը տեղի ունեցած էր Հոկտեմբեր 27-ին, Սթանպուլի մէջ:

Գագաթնաժողովին քննարկուած էին սուրիական հակամարտութեան վերաբերող բոլոր ոլորտները, ներառեալ` ներկայ իրավիճակը, Իտլիպի շուրջ համաձայնութիւնն ու քաղաքական գործընթացները, ինչպէս նաեւ հակամարտութեան մշտական լուծման գծով համատեղ շահերը:

Երկիրներու ղեկավարները վերահաստատած էին Սուրիոյ պատերազմը ՄԱԿ-ի հովանիին ներքեւ ընթացող քաղաքական բանակցութիւններով աւարտելու կարեւորութիւնը:

Թուրքիոյ, Ռուսիոյ, Ֆրանսայի եւ Գերմանիոյ ղեկավարները միատեղ յայտարարութեամբ տեղեկացուցած էին, որ մինչեւ տարեվերջ պիտի ստեղծուի յատուկ կոմիտէ, որուն օրակարգին վրայ պիտի ըլլայ Սուրիոյ ապագայ սահմանադրութեան մշակումը:

Կը նախատեսուի, որ այդպիսով Սուրիոյ մէջ ազատ եւ արդար ընտրութիւններ իրականացնելու հիմք պիտի ստեղծուի:

Share.

Leave A Reply

This site uses Akismet to reduce spam. Learn how your comment data is processed.