ԹՐՔԱԿԱՆ ԿԱՅՔԻ ԱՆԴՐԱԴԱՐՁԸ ՀԱՅԿԱԿԱՆ ԹՂԹԱԴՐԱՄԻՆ ՎՐԱՅ ՏԵՂԱԴՐՈՒԱԾ ՍԱՐՈՅԵԱՆԻ ՊԱՏԿԵՐԻՆ

0

Թրքական «Sözcü» թերթի կայքը անդրադարձած է Հայաստանի մէջ շրջանառութեան մէջ դրուելիք նոր՝ 3-րդ սերունդի 5000 անուանական արժէքով թղթադրամին վրայ Ուիլիըմ Սարոյեանի պատկերին:

«Պիթլիսէն դուրս եկաւ, Հայաստանի թղթադրամին վրայ տեղ գտաւ անոր պատկերը» վերնագիրով հրապարակուած գրութեան մէջ յօդուածագիրը կ’անդրադառնայ Հայաստանի մէջ շրջանառութեան մէջ դրուելիք թղթադրամներուն եւ դիտել կու տայ, որ անոնցմէ մէկուն վրայ Թուրքիոյ մէջ հանրածանօթ անձնաւորութեան մը պատկերը տեղադրուած է:

Թրքական աղբիւրը կը յիշեցնէ, որ Սարոյեանի ընտանիքը Միացեալ Նահանգներ գաղթած է ներկայիս Թուրքիոյ Պիթլիս (Բաղեշ) քաղաքէն:

Յօդուածին մէջ համառօտ անդրադարձ կատարուած է Սարոյեանի կենսագրութեան, ստեղծագործական կեանքին ու ստացած մրցանակներուն, ինչպէս նաեւ ամերիկացի նշանաւոր գրող Էռնեստ Հեմինկուէյի հետ ունեցած տարակարծութիւններուն:

Ուիլիըմ Սարոյեան թէեւ ծնած է ԱՄՆի Ֆրեզնօ քաղաքը, սակայն ամրօրէն կապուած է իր պատմական հայրենիքին եւ 1964-ին այցելած է Արեւմտեան Հայաստան՝ Պիթլիս:

2014-ին, Սարոյեանի այցելութեան 50-ամեակին առիթով, Պիթլիսի քրտական աւագանին որոշում գոյացուց քաղաքի Սափքոր թաղամասի այն փողոցը, ուր  ապրած է գրողի ընտանիքը, անուանել Սարոյեանի անունով:

Share.

Leave A Reply

This site uses Akismet to reduce spam. Learn how your comment data is processed.