«ԱԲԳԱՐԸ ՏՈՒՓԻՆ ՄԷՋ»

0

Շաբաթ, 24 Նոյեմբեր 2018-ին, ՀԲԸ Միութեան «ԳՅ Նազարեան» սրահէն ներս, «Ադամեան» թատերախումբը բացաւ իր 593-րդ վարագոյրը, ներկայացնելով իր 93-րդ ելոյթը՝ «Աբգարը Տուփին Մէջ» կատակերգութիւնը, բեմադրութեամբ Վաչէ Ատրունիի:

Բեմադրիչը իր կատակաբանութեան ոգիով, իսկ հերոսները իրենց թատերական տաղանդով յաջողեցան զանազան հերոսներ մարմնաւորել ու ծիծաղ պարգեւել հալէպահայ հանդիսատեսին:

Կատակերգութեան մասնակցութիւն բերող իւրաքանչիր հերոս մեր առօրեային այնքան հարազատ մէկ մասնիկն էր, որ կերպարները անծանօթ անձնաւորութիւններ չէին թուեր մեզի, ընդհակառակն. անոնք մեր միջավայրին մէջ ապրող մարդիկ էին, անոնց արտայայտութիւնները, շարժուձեւերը, օգտագործած բառապաշարն անգամ մեր բոլորին ծանօթ էին:

Երկու ժամուան տեւողութեան ներկայացուած այս կատակերգութիւնը իր ամբողջութեան մէջ հետաքրքրական էր: Պէտք է արձանագրել, որ դերասանները արհեստավարժ ներկայացումով հանդէս եկան, իրենց անհատական դրոշմը եւս դնելով կերպարի ներկայացման մէջ:

Թատրոնին նիւթը կը դառնար Խունսուզեան ընտանիքին շուրջ: Ընտանիքին անդամներն էին, փախստական հայրը՝ Պարգեւ (Սմբատ Երէցեան), մայրը՝ Ռոզալին (Հուրի Պասմաճեան) եւ անոնց դուստրերը՝ Զաւէնին սիրահարը՝ Ստեֆանին (Սէրլի Գուզույեան), եւ իրաւաբան Լուլուն (Դուին Զէյթունցեան): Միւս դերակատարներն էին` ծաղրածու (Լիւսի Նաճարեան), օրէնքի մարդ՝ Շաւարշ (Ճորճ Դաւիթեան), Ստեֆանիի սիրահար՝ Զաւէն (Ռաֆֆի Գալայճեան), կազի տակառ ծախող Մակար (Արմէն Սթանպուլեան), առաւ բախաւ՝ Ժագ (Վազգէն Ֆերմանեան) եւ Տէր եւ Տիկին Աչուկեաններ (Կարօ Աղբարալեան եւ Անի Սարեան-Չիրիշեան): Կատակերգութեան բացումը կատարեց ծաղրածուն: Ան Իւրայատուկ եւ շատ հաճելի ձեւով դիմաւորեց կատակերգութեան բոլոր հերոսները, որոնցմէ իւրաքանչիւրը ցուցատախտակ մը բռնած ինքզինք հանդիսատեսին ծանօթացուց:

Բեմադրիչին խօսքով. «Այս թատերախաղի բնոյթը թիւրիմացութիւններու վրայ հիմնուած կենցաղային կատակաբանութիւնն է «Ֆարս»ի ու «սաթիրիկի քոմէտիա»ի արտայայտիչներով: Ըստ էութեան, իր պարզունակ կառոյցով, երկարապատում զաւեշտ մըն է»:

«Աբգարը Տուփին Մէջ» կատակերգութեան չորրորդ ներկայացման աւարտին, որ տեղի ունեցաւ Կիրակի 2 Դեկտեմբեր 2018-ին, խօսք առաւ Ադամեան թատերախումբի ընդհանուր պատասխանատու, Թատերական Յանձնախումբի ատենապետ Ներսէս Տաղլեան: Ան ըսաւ. ««Ադամեան» թատերախումբի սովորութիւնն է երկարամեայ ծառայութիւն ունեցող դերասանները գնահատել 25-ամեայ ծառայութեան մետալով եւ  40-ամեայ ոսկեայ մետալով: Ինչպէս ձեր յայտագիրներուն մէջ կարդացիք, այսօր կարգը հասած է Վազգէն Ֆերմանեանին, որ իր 40-ամեայ աշխատանքը բոլորած է «Ադամեան» թատերախումբէն ներս: 1977-ին ան անդամակցած է «Ադամեան» թատերախումբին: Մինչ օրս մասնակցած է 28 ներկայացումներու եւ 2003-ին արժանացած է 25-ամեայ ծառայութեան մետալին», ապա մետալը յանձնելու պարտականութիւնը յանձնեց ՀԵԸ-ի Գործադիր Մարմինի ատենապետ Գրիգոր Շամամեանին:

Ֆերմանեան շնորհակալութիւն յայտնեց ՀԲԸ Միութեան եւ բոլոր հանդիսատեսներուն: Ան դիտել տուաւ, որ թատերախումբին յաջողութեան գրաւականը անոր անդամներուն հաւաքական ու համերաշխ աշխատանքն է:

Այնուհետեւ Տաղլեան յայտարարեց, որ «Աբգարը Տուփին Մէջ» կատակերգութեան ներկայացումը կը շարունակուի Շաբաթ եւ Կիրակի 8 եւ 9 Նոյեմբեր 2018-ին, երեկոյեան ժամը 8:00-ին:

 

Մարէն Պապեան 

 

Share.

Leave A Reply

This site uses Akismet to reduce spam. Learn how your comment data is processed.