ՄԱՐԶԱԿԱՆ՝ ԴԵԿՏԵՄԲԵՐ Ա./2018

0

ԿԱՐԷՆ ՄՈՎՍԻՍԵԱՆ ՃԱՏՐԱԿԻ ՎԵԹԷՐԱՆՆԵՐՈՒ ԱՇԽԱՐՀԻ ԱԽՈՅԵԱՆ 

Սլովենիոյ Բլէթ քաղաքին մէջ աւարտին հասան աշխարհի տղոց եւ աղջկանց վեթէրաններու առաջնութեան մրցումները: Մրցաշարքերը տեղի ունեցան 2 տարիքային խումբերով՝ 50-էն վեր 65-էն վեր: Տղոց 50-էն վեր ենթախումբին հիանալի յաջողութեան հասաւ Հայաստանի ներկայացուցիչ, կրոսմայսթըր Կարէն Մովսիսեան, որ 11 նախատեսուած  կէտերէն 8,5 կէտ ապահովեց եւ հռչակուեցաւ աշխարհի վեթէրաններու ախոյեան: Նոյն ենթախումբին մէջ 2-րդ դիրքը գրաւեց Վրաստանը ներկայացնող հայ մարզիկ Գէորգի Բագատուրով:

ԱՐԹՈՒՐ ԴԱՒԻԹԵԱՆ ԲԱԶՄԱԹԻՒ ՄԵՏԱԼՆԵՐՈՒ ԱՐԺԱՆԱՑԱՒ

Հայաստանի մարմնամարզութեան հաւաքականի ներկայացուցիչներ Արթուր Դաւիթեան եւ Արթուր Թովմասեան Մոսկուայի մէջ տեղի ունեցած միջազգային մրցաշարքին ընթացքին իրենց մասնակցութիւնը բերին բարձր մակարդակի ելոյթներով:Արթուր Թովմասեան օղակներու մրցումին առաջին դիրքը գրաւեց, իսկ Արթուր Դաւթեան յաջողեցաւ տիրանալ եօթը մետալներու: Ազատ վարժութեան, նժոյգի, յենացատկի եւ զոյգ-փայտի մրցումներուն ան տիրացաւ ոսկեայ մետալներու, բազմամարտի եւ օղակներու մէջ` արծաթեայ մետալներու, իսկ պտտաձողի մրցումին` պրոնզեայ մետալի:

Երկու մարզիկները վերջերս իրենց մասնակցութիւնը բերին նաեւ Գերմանիոյ մէջ տեղի ունեցած աշխարհի բաժակի մրցաշարքին, առանց սակայն մրցանակային որեւէ դիրք գրաւել կարենալու:

ՈւԵՖԱ-Ն ՍՏԵՂԾԵՑ ԵՐՐՈՐԴ ԵՒՐՈԳԱՒԱԹԸ

ՈւԵՖԱ-ն հաստատեց ակումբային երրորդ մրցաշարքի կազմակերպումը: Նոր մրցաշարքը պիտի կատարուի« Չեմպիընզ լիկ»ի եւ «Իւրոփա լիկ»ի ծրագիրներով: Խմբային մրցումներու փուլին հանդէս պիտի գայ 32 ակումբ: Մրցաշարքը պիտի ընթանայ խմբային փուլերով, 1/8 եզրափակիչ, քառորդ եզրափակիչ, կիսաեզրափակիչ եւ եզրափակիչ համապատասխան փուլերով: Նոր մրցաշարքը պիտի ունենայ 141 խաղ՝ 15 խաղային օրուան ընթացքին: Անդրանիկ խաղարկութիւնը տեղի պիտի ունենայ 2021-ին: Նոր մրցաշարքի յաղթողը «Իւրոփա լիկ»ին դէմ մրցելու իրաւունք պիտի ստանայ:

ՆԱՏԱԼ ՀԱՍՏԱՏԵՑ ՊԱՐՍԵԼՈՆԱՅԻ ՄՐՑԱՇԱՐՔԻՆ ԻՐ ՄԱՍՆԱԿՑՈՒԹԻՒՆԸ

Աշխարհի երկրորդ թենիս խաղցող Ռաֆայէլ Նատալ հաստատեց, որ նոր մրցաշրջանին իր մասնակցութիւնը պիտի բերէ Պարսելոնայի մրցաշարքին: «Անգամ մը եւս կը տեղեկացնեմ, որ պիտի մասնակցիմ Trofeo Conde de Godó մրցաշարքին: Նախորդ մրցաշրջանը իւրայատուկ էր՝ ես 15-րդ անգամ կրցայ մասնակցիլ Պարսելոնայի մրցաշարքին: Կը հանդիպինք Ապրիլին», ըսած է ան: 31-ամեայ թենիսիստին խօսքը մէջբերած է մրցաշարքի պաշտօնական կայքը:

Ռաֆայէլ Նատալ11 անգամ Պարսելոնայի մրցաշարքի ախոյեան հանդիսացած է: 2019-ին Նատալ պէտք է պաշտպանէ ախոյեանական իր կոչումը:

 

Ռաֆֆի Սիւլահեան

 

 

ՀԱԼԷՊԱՀԱՅ ՍԵՊՈՒՀ ԽԱՐԱՃԵԱՆ ՄԱՍ ԿԸ ԿԱԶՄԷ ՉԻՆԱՍՏԱՆ ՄԵԿՆԱԾ ՍՈՒՐԻՈՅ ՊԱՍՔԵԹՊՈԼԻ ՀԱՒԱՔԱԿԱՆԻՆ

Հինգշաբթի, 29 Նոյեմբերին, յետմիջօրէի ժամը 2։00-ին, տեղի ունեցաւ պասքեթպոլի 2019-ի համաշխարհային բաժակի զտման խաղերուն 2-րդ փուլի 3-րդ մրցումը՝ Սուրիոյ եւ Չինաստանի ազգային հաւաքականներուն միջեւ։ Սուրիոյ ազգային հաւաքականը այժմ կը գտնուի Չինաստան։ Խումբին մաս կը կազմէ հալէպահայ խաղցող Սեպուհ Խարաճեան։

 

Պետիկ Աշոտեան

 

Share.

Leave A Reply

This site uses Akismet to reduce spam. Learn how your comment data is processed.