ՇԱԲԹՈՒԱՆ ՏԵՂԱԿԱՆ ԼՐԱՔԱՂ

0

-Երկուշաբթի, 10 Դեկտեմբերին, Սուրիոյ Արտաքին Գործոց Նախարարութենէն պաշտօնական աղբիւր մը ՍԱՆԱ-ի յայտնեց, որ Սուրիոյ Հանրապետութեան Արտաքին Գործոց Նախարարութիւնը խստիւ կը դատապարտէ ամերիկեան, ֆրանսական եւ թրքական ուժերուն եւ անոնց գործակալներուն կողմէ իրագործուած անօրէն պեղումի գործողութիւնները՝ Մունպուճի, Աֆրինի, Իտլիպի, Հասիչէի , Ռաքքայի եւ այդ երկիրներու տիրապետութեան տակ գտնուող այլ շրջաններու մէջ: Ըստ նախարարութեան ստացած տեղեկութիւններուն, պեղումի, կողոպուտի եւ թալանի գործողութիւնները օրըստօրէ կը բազմանան: Անոնք կորուստի կը մատնեն սուրիական մշակութային ժառանգութիւնը: Արտաքին Գործոց Նախարարութիւնը կոչ ուղղեց ՄԱԿ-ի Կրթութեան, Գիտութեան եւ Մշակոյթի Կազմակերպութեան՝ ԻՒՆԵՍՔՕ-ին, սուրիական մշակութային ժառանգութեան կողոպուտը դատապարտելու, եւ պատասխանատու կողմերը յայտնաբերելու, շեշտելով, որ Սուրիոյ Հանրապետութիւնը պատրաստակամ է երկրին ամբողջ հողային տարածքը ազատագրելու եւ երկրի ազգային ինքնութեան ու մշակութային ժառանգութեան պահապանը հանդիսանալու:

– Երկուշաբթի, 10 Դեկտեմբեր 2018-ին, Ռուսիոյ նախագահ Վլատիմիր Փութին հեռաձայնային զրոյց մը ունեցաւ Գերմանիոյ վարչապետ Անկելա Մերքըլի հետ Սուրիոյ տագնապին, Քերչի նեղուցի հարցին եւ ռազմավարական հարցերու շուրջ: Նովոսթի լրատու գործակալութիւնը, վկայակոչելով Քրեմլինի յայտարարութիւնը ըսաւ. «Կողմերը անդրադարձած են Սուրիոյ տագնապին: Անոնք շեշտած են միջսուրիական երկխօսութեան առաջնահերթութիւնն ու ներկայ սահմանադրութիւնը քննարկող յանձնախումբ մը կազմելու անյետաձգելի կարեւորութիւնը:

-Բեմադրիչ Անաս Ամատան շրջեցաւ Հալէպի մէջ «Յիշողութիւն» շարժանկարին պատկերները կարելով վաւերագրեց զանոնք: Շարժանկարին նիւթը ՏԱՀԵՇ զինեալ ահաբեկչական խմբաւորման բարբարոսութիւններն էին, մասնաւորապէս այն բարաբարոսութիւնները, որոնք ի գործ դրուած էին Հին Հալէպի ալ Շայպան շրջանին մէջ: Շրջանը հաւատադրժողական խմբաւորումներուն կողմէ բանտի վերածուած էր: Անոնք, այդ բանտին մէջ, քաղաքայինները կը սպաննէին կամ ալ վայրագօրէն կը չարչարէին զիրենք մինչեւ մահ:

-Երկուշաբթի, 10 Դեկտեմբեր 2018-ին Սուրիական Բանակի Հրամանատարութիւնը հրապարակեց վարչական հրամանագիր մը, որուն համաձայն, բանակի 248 միաւորի երկարաձգուած ծառայութեան ենթակայ այն սպաները, որոնք բոլորած են 5 տարուան իրենց ծառայութիւնը, մինչեւ 1 Յունուար 2019 զօրացրուումի պիտի ենթարկուին:
Զօրացրուումը կ՛ընդգրկէ նաեւ 2013-էն պահեստի զինուորական ծառայողութիւն մատուցող այն սպաները, որոնց 5 տարուան ծառայութիւնը կ՛ամբողջանայ 1 Յունուար 2019-ին:
Հրամանագիրը գործադրութեան պիտի դրուի 6 Դետեմբեր 2018-էն սկսեալ:

Share.

Leave A Reply

This site uses Akismet to reduce spam. Learn how your comment data is processed.