ՔԱՆԱՏԱՅԻ ՀԱՅ ԴԱՏԻ ՅԱՆՁՆԱԽՈՒՄԲԸ ԿԸ ՀԱԿԱԴԱՐՁԷ ՔԱՆԱՏԱՅԻ ՄԷՋ ԱՏՐՊԷՅՃԱՆԱԿԱՆ ՀԱԿԱՀԱՅ ՆՈՐԱԳՈՅՆ ԱՐՇԱՒԻՆ

0

Վերջերս, Քանատայի տարածքին Ատրպէյճանական շարք մը հոսանքներ, սադրիչ արարքներով անգամ մը եւս փորձեցին հրահրել հայ համայնքը, սակայն անոնց փորձը, ինչպէս միշտ՝ մնաց ապարդիւն: Այս անգամ, իրենք զիրենք որպէս կազմակերպուած համայնք ներկայացուցած, բազմատեսակ յերիւրանքներ եւ ապատեղեկատուութիւն տարածելով, փորձեցին բողոք ներկայացնել մեր կեդրոններէն ներս  Արցախեան դրօշներ տեղադրելու քայլին դէմ:

Այս ուղղութեամբ, ՀՅԴ Քանատայի Հայ Դատի Յանձնախումբը կու գայ հաստատելու մեր ժողովուրդին, թէ քանատահայ համայնքէն ներս, այնտեղ ուր կը տրոփէ հայ ժողովուրդին սիրտը, Արցախի Հանրապետութեան պանծալի դրօշը պիտի շարունակէ հպարտօրէն ծածանիլ, խորհրդանշելով Արցախեան ժողովուրդի ազատ ոգին ու վճռակամութիւնը եւ մեր սերունդներուն փոխանցելով հայ ժողովուրդի արդար պայքարի կենսունակութիւնն ու յաղթանակը:

Անցնող քանի մը տարիներուն ընթացքին, Քանատայի մէջ Արցախեան հիմնահարցի ուղղութեամբ տեղի ունեցած աննախադէպ յառաջխաղացքը, խորհրդարանական այցելութիւնները, խորհրդարանէն ներս հնչած շարք մը յայտարարութիւնները, եւ մեր յանձնախումբին ընդհանուր աշխատանքը՝ ընդդէմ ատրպէյճանական ապակայունացնող քաղաքականութեան, անհանգստացուցիչ կը թուին Քանատայի մէջ կայք հաստատած փոքրաթիւ ատրպէյճանական համայնքին:

Նկատի ունենալով մեր քաղաքական ազդեցիկ լայն շրջանակներն ու կարողութիւնները եւ մանաւանդ մեր օրակարգերէն ներս արցախեան հիմնահարցի առաջնահերթութիւնն ու այդ ուղղութեամբ արձանագրուած յաջողութիւնները, զարմանալի պէտք չէ թուի, որ ատրպէյճանական համայնքը նման փորձ կը կատարէ քանատահայ համայնքին դէմ, փորձելով ջլատել մեր պայքարը յանուն Արցախի ժողովուրդին պահանջատիրութեան եւ արդար դատին լուծման:

Հետեւաբար, անգամ մը եւս կու գանք հաստատել քանատահայ համայնքին, որ մենք պիտի չշեղինք մեր ուղիէն, պիտի դիմագրաւենք մեր առջեւ ծառացող խոչընդոտները եւ աննկուն կամքով պիտի շարունակենք մեր աշխատանքները մինչեւ արցախեան հիմնահարցի խաղաղ լուծումը եւ Արցախի Հանրապետութեան ինքնորոշման իրաւունքի ու անկախութեան միջազգային ճանաչումը:

 

ՀՅԴ Քանատայի Հայ Դատի Շրջանային Յանձնախումբ

 

Share.

Leave A Reply

This site uses Akismet to reduce spam. Learn how your comment data is processed.