«ՄԱՐԶԱՇԽԱՐՀ»՝ ԼԱԹԱՔԻԱ Ա. ՏԱՐԻ ԹԻՒ 32. ՀՄԸՄ-Ի ՅԱՂԹԱՆԱԿՆԵՐԸ ԵԳԻՊՏԱԿԱՆ ԾՈՎՈՒԺԻ ԽՈՒՄԲԻՆ ԴԷՄ

0

Պասքեթպոլ

ՀՄԸՄ-ի եւ եգիպտական ծովային ուժերու բարեկամական հանդիպումը տեղի ունեցաւ 16 Մարտին, ՀՄԸՄ-ի դաշտին վրայ, Խուռներամ հասարակութեան մը ներկայութեան։

Խաղը սկսաւ որոշեալ ժամուն. իրաւարարութեամբ Մէժէտ Օսմանի եւ Թոնի Շոնի։ Առաջին իսկ վայրկեաններուն եգիպտացիք իրենց խիստ արագ եւ ճարպիկ իջուածքներով այն տպաւորութիւնը ձգեցին ներկաներուն վրայ, թէ ՀՄԸՄ-ի տղաքը դիւրին պատառ մը պիտի ըլլան իրենց համար։ Առաջին 10 վայրկեաններուն սքոռը բարձրացած էր ի նպաստ եգիպտացիներուն 8-10 կէտ տարբերութեամբ։ Սակայն ՀՄԸՄ-ի տղաքը իրենց արագ խոյանքներով գրոհի մը սկսան, որուն ցարդ ականատես չէինք եղած ամբողջ Լաթաքիոյ պասքեթի պատմութեան մէջ։ Ժողովուրդը ապշահար կը դիտէր անոնց գեղեցիկ եւ կանոնաւոր, խաղարկութիւնը։ Կիսախաղը կը վերջանար 27-33-ով, ի նպաստ ՀՄԸՄ-ին։

Բ. կիսախաղին եգիպտացիք սկսան բազմաթիւ իջուածքներ ունենալ, իսկ ՀՄԸՄ-ի տղոց հարուածները կը վրիպէին իրենց նպատակէն, դժգոհութիւն պատճառելով թէ՛ մարզիկներուն եւ թէ ժողովուրդին։ Այս անակնկալ ձախողութիւնը պատճառ դարձաւ, որ խումբերը հաւասարին։

ՀՄԸՄ-ի խմբապետը գիտակցելով խաղին կարեւորութեան, անմիջապէս անհրաժեշտ կարգադրութիւնները ըրաւ եւ սկսաւ լուրջ գործի։ Եգիպտացիք մէկ կէտով յաղթական էին։ Երբ 3 վայրկեան մնացած էր խաղին վերջաւորութեան, ՀՄԸՄ-ի տղաքը անկարելին փորձելով իրենց կամքը պարտադրեցին յաջորդական կէտերու նշանակումով։ Արագընթաց ճակատագրական վայրկեաններուն սուլիչի ազդանշանին հետ Անթուանի վերջին հարուածը կու գար յաղթանակի սքոռը ի նպաստ ՀՄԸՄ-ին բարձրացնելու՝ 55-59-ի։

Share.

Leave A Reply

This site uses Akismet to reduce spam. Learn how your comment data is processed.