ՄԱՐԶԱԿԱՆ՝ ԴԵԿՏԵՄԲԵՐ Բ./2018

0

ՅՈՎՀԱՆՆԷՍ ՓԱՉԿՈՎ ՊԱՐՏՈՒԹԻՒՆ ԿՐԵՑ ԿՈՂՄՆԱԿԱԼ ՄՐՑԱՎԱՐՈՒԹԵԱՆ ՊԱՏՃԱՌՈՎ

2017-ի Եւրոպայի ախոյեան, աշխարհի առաջնութեան պրոնզէ մետալակիր Յովհաննէս Փաչկով 9 Դեկտեմբերին Մոսկուայի մէջ մասնակցեցաւ բռնցքամարտի ցուցադրութեան, որուն ընթացքին Ռուսիոյ հաւաքականի բռնցքամարտիկները մաս կազմեցին աշխարհի հաւաքականի կազմին: Հայ բռնցկամարտիկ Յովհաննէս Փաչկով 5 ռաունտնոց մենամարտին մրցակից ունեցաւ Ալեքսէյ Մազուրին եւ պարտութեան մատնուեցաւ քանի մը կէտի տարբերութեամբ:

Հայաստանի բռնցքամարտի դաշնակցութեան նախագահ Արթուր Գէորգեան յայտնեց, որ հայ բռնցքամարտիկը պարտութեան մատնուած է կողմնակալ մրցավարութեան պատճառով: «Սովորական դարձած  խայտառակութիւն է սա: Յովհաննէս Փաչկով 5 ռաունտ յաղթած էր, սակայն յաղթանակը տրուեցաւ ռուս մարզիկին։ Բացայայտ խայտառակութիւն»,- դիմատետրի իր էջին վրայ գրած էր Արթուր Գէորգեան:

 

ՄԻՋԱԶԳԱՅԻՆ

 

ԼՈՎ ԿԸ ՓԱՓԱՔԻ ՄԱՐԶԵԼ ՌԻԱԼ ՄԱՏՐԻՏԸ

Գերմանիոյ հաւաքականի գլխաւոր մարզիչ Եոահիմ Լով անդրադարձաւ ապագային ակումբային մարզիչի ասպարէզին վերսկսելու հարցին: Մամլոյ մէջ շրջագայութեան դրուեցաւ այն լուրը, թէ 58-ամեայ մասնագէտին ծառայութեամբ հետաքրքրուած է սպանական Ռէալ Մատրիտը: «Քանի մը տարի ակումբային մարզիչ եղած եմ: Կը մտածեմ վերադառնալ նման աշխատանքի։ Գերմանիոյ հաւաքականի գլխաւոր մարզիչի աշխատանքս հասած է իր աւարտին, ուստի համոզուած եմ, որ  շուտով պետք է մտածեմ ապագայիս մասին։ Կը Մտածեմ աշխատանքս շարունակել արտասահմանեան երկիրի մը մէջ եւ ոչ՝ Գերմանիոյ: Սպանական Ռէալ Մատրիտը գրաւիչ տարբերակ է եւ կը փափաքիմ ստանձնել խումբին մարզիչի պաշտօնը», Լովի այս խօսքը մէջբերեց Mundo Deportivo-ն:

ԼՈՒՔԱՔՈՒԻ ԵՒ ՄՈՐԻՆԻՈՅԻ ՅԱՐԱԲԵՐՈՒԹԻՒՆՆԵՐԸ ՎԱՏԹԱՐԱՑԱԾ ԵՆ

«Մանչեսթըր Իւնայթըտ»ի յարձակող Ռոմելու Լուքաքուի յարաբերութիւնները խումբի գլխաւոր մարզիչ Ժոզէ Մորինիոյի հետ հետզհետէ վատթարացած են։ «The Sun» յայտնեց, որ Պելճիքացին դժգոհած է մարզիչին առած որոշումէն, որուն համաձայն վերջին շրջանին ան հեռացուած է կազմէն: Ըստ թերթին, մարզիչը այս որոշումը գոյացուցած է այն պատճառով, որ Լուքաքու վերջին մրցումներուն ընթացքին չէր կրցած ցնցել մրցակից կազմերուն դարպասը: Աղբիւրին տուեալներով, Լուքաքու Յունուարին հաւանաբար լքէ կազմը եւ միանայ այլ ակումբի մը: Յայտնենք, որ Մորինիոյի յարաբերութիւնները վատթարացած են նաեւ Ալեքսիս Սանչէզի եւ Փօլ Փոկպայի հետ:

Share.

Leave A Reply

This site uses Akismet to reduce spam. Learn how your comment data is processed.