ՆԱԽԱԳԱՀ ՊԱՇՇԱՐ ԱԼ ԱՍԱՏ ԸՆԴՈՒՆԵՑ ՍՈՒՏԱՆԻ ՆԱԽԱԳԱՀԸ

0

Կիրակի, 16 Դեկտեմբեր 2018-ի յետմիջօրէին, Սուտանի նախագահ Օմար Հասան ալ Պաշիր հասաւ Դամասկոսի Միջազգային օդակայան: Նախագահը դիմաւորուեցաւ Սուրիոյ նախագահ Պաշշար ալ Ասատի կողմէ։ Այնուհետեւ նախագահները ուղղուեցան ժողովրդական պալատ, ուր խորհրդակցեցան Սուրիոյ եւ տարածաշրջանի վերջին զարգացումներուն շուրջ։
Խորհրդակցութեան ընթացքին Ասատ եւ Պաշիր հաստատեցին, որ ներկայիս արաբական երկիրներուն դիմագրաւած դժուարութիւնները արաբական աշխարհէն նորանոր մօտեցումներ կը պահանջեն՝ գլխաւորաբար պետութիւններու ինքնիշխանութիւնը յարգելու եւ անոնց ներքին հարցերուն չմիջամտելու հրամայականը լուսարձակի տակ կը բերեն: Այս պայմաններուն ապահովումով միջարաբական յարաբերութիւնները կը բարելաւուին եւ արաբ ժողովուրդը շահեկան դուրս կու գայ։
Անդրադառնալով տարածաշրջանին մէջ տեղի ունեցած իրադարձութիւններուն, Ասատ եւ Պաշիր յայտնեցին, որ անհրաժեշտ է բոլոր ճիգերը մէկտեղել` արաբական հարցերուն աջակցելու եւ տարածաշրջանի պետութիւններուն ու ժողովուրդներուն շահերը վտանգող դաւադրական բոլոր ծրագիրներուն դէմ պայքարելու։
Իր կարգին Պաշիր յայտնեց, որ «Սուրիա դիմացկուն պետութիւն է։ Անոր նահանջը արաբական հարցերու անտեսում կը նշանակէ: Նախորդ տարիներուն Սուրիոյ մէջ տեղի ունեցած տագնապը կարելի չէ արաբական իրականութենէն անջատել։ Հակառակ պատերազմի արհաւիրքին, Սուրիա շարունակեց պաշտպան հանդիսանալ արաբական հարցերուն: Կը յուսանք, որ այս երկիրը շուտով կը վերագտնէ իր նախկին ուժն ու տարածաշրջանային դերը, իսկ Սուրիոյ ժողովուրդը իր երկրի ապագան կ՛ուրուագծէ առանց արտաքին միջամտութիւններու»։
Պաշիր շեշտեց, որ Սուտան զօրավիգ կը կանգնի Սուրիոյ եւ պատրաստ է իր կարելին ի գործ դնել` Սուրիոյ միասնութեան ու տարածքային ամբողջականութեան պահպանման համար։
Իր կարգին նախագահ Ասատ հաստատեց, որ հակառակ պատերազմի դաժան պայմաններուն, Սուրիա հաւատք կ՛ընծայէր արաբ ազգին ու անոր մշակոյթին եւ պաշտպան կը հանդիսանար արաբական հարցին։ Ասատ աւելցնելով ըսաւ, որ արաբական կարգ մը պետութիւններու արեւմուտքին վստահիլը ոչ մէկ նպաստ կը բերէ անոնց ժողովուրդին: Նախընտրելի է որ անոնք կառչած մնան արաբական մշակոյթին ու պաշտպան հանդիսանան արաբ ազգի հարցերուն։
Աւարտին, Ասատ շնորհակալութիւն յայտնեց Պաշիրին այս այցելութեան համար եւ հաստատեց, որ սա խթան պիտի հանդիսանայ Սուրիոյ եւ Սուտանի յարաբերութիւններու վերականգնումին։

Share.

Leave A Reply

This site uses Akismet to reduce spam. Learn how your comment data is processed.