ՍՈՒՐԻԱԿԱՆ ԲԱՆԱԿԻ ՀՐԱՄԱՆԱՏԱՐՈՒԹԻՒՆ.«ՍՈՒՐԻԱԿԱՆ ԲԱՆԱԿԸ ՄՈՒՆՊՈՒՃ ՄՏԱՒ ԵՒ ՍՈՒՐԻԱԿԱՆ ԴՐՕՇԸ ԿՐԿԻՆ ԲԱՐՁՐԱՑՈՒՑ ԱՅՆՏԵՂ»

0

Ուրբաթ, 28 Դեկտեմբերին, Սուրիական Բանակի Հրամանատարութիւնը յայտարարեց, որ սուրիական բանակի միաւորներ մուտք գործած են Հալէպի հիւսիսային շրջանը գտնուող Մունպուճ գիւղաքաղաք եւ ազատագրելով զայն՝ սուրիական դրօշը բարձրացուցած են այնտեղ։

Հրամանատարութիւնը յայտնեց, որ «Մեկնելով սուրիական բանակին երկրին ողջ տարածքը ազատագրելու պատասխանատուութենէն, եւ ընդառաջելով Մունպուճի բնակչութեան օգնութեան կանչին, սուրիական բանակի միաւորներ մուտք գործեցին Մունպուճ եւ իրենց վերահսկողութեան տակ առին շրջանը, այնտեղ վերստին բարձրացնելով Սուրիոյ դրօշը»։

Բանակը իր պատրաստակամութիւնը յայտնեց երաշխաւորելու տեղւոյն բնակչութեան ապահովութիւնը եւ Սուրիոյ ժողովուրդի բոլոր բաղադրիչներուն հետ ձեռք-ձեռքի պայքարելու ահաբեկչութեան եւ Սուրիա ներխուժող ուժերուն դէմ՝ ազատագրելով երկիրը օտար ուժերէն։

Share.

Leave A Reply

This site uses Akismet to reduce spam. Learn how your comment data is processed.