ՇԱԲԹՈՒԱՆ ՏԵՂԱԿԱՆ ԼՐԱՔԱՂ ՅՈՒՆՈՒԱՐ Ա./2019

0

-Երկուշաբթի, 31 Դեկտեմբեր 2018-ին, Սուրիական Բանակի Հրամանատարութիւնը վարչական հրամանագիր մը հրապարակեց, ըստ որուն 21 Նոյեմբեր 2010-էն սկսեալ 103 թուակիր զինուորական խմբակին մաս կազմող ու երկարաձգուած ծառայութիւն ունեցող սպաները, ինչպէս նաեւ 22  Մայիս 2010-էն ու 21 Սեպտեմբեր 2010-էն զօրակոչի ենթարկուած զինուորները զօրացրուումի կ’ենթարկուին:

Հրամանագիրին համաձայն, 1 Յուլիս 2012-էն զօրակոչի ենթարկուած պահեստի սպաներն ու զինուորները եւս զօրացրուումի կ’ենթարկուին:

Հրամանատարութիւնը յայտնեց, որ հրամանագիրը գործադրութեան պիտի դրուի 2 Յունուար 2019-էն սկսեալ:

-Չորեքշաբթի, 3 Յունուար 2018-ին, Սուրիոյ Պաշտպանութեան Նախարարութիւնը հանդէս եկաւ յայտարարութեամբ մը՝ հաղորդելով, որ քրտական ինքնապաշտպանական  ջոկատներ, իրենց դիրքերը յատկացնելով սուրիական բանակին, Մունպուճէն Եփրատ գետի արեւելեան ափ ուղղուած են՝ ի կատար ածելով  2018-ին  ստորագրուած այն համաձայնութիւնը, ըստ որուն Սուրիոյ հիւսիսային շրջաններուն մէջ բնականոն կեանքը պիտի վերականգնի:

Նախարարութիւնը աւելցուց. «Մեր տեղեկութիւններուն համաձայն, մինչեւ այս օրը, շուրջ 400 քիւրտ մարտիկ Մունպուճէն դուրս եկած է»:  

-Արաբական Միացեալ Էմիրութիւնները Դամասկոսի մէջ իր դեսպանատան վերաբացումը կատարեց։ Սուրիոյ մէջ ԱՄԷ-ու դեսպանի ներկայացուցիչ Ապտուլ Հաքիմ ալ Նահիմի դիտել տուաւ, որ իր երկրի դեսպանատան վերաբացումը նախաքայլը պիտի հանդիսանայ արաբական այլ երկիրներու դեսպանատուներու վերաբացման։

Այս առիթով, Արաբական Միացեալ Էմիրութիւններու Արտաքին Գործոց Նախարարութիւնը հանդէս եկաւ յայտարարութեամբ մը, յայտնելով որ այս քայլը կը շեշտէ բարեկամ երկու երկիրներուն միջեւ յարաբերութիւնը վերականգնելու ԱՄԷ-ու նախանձախնդրութիւնը: Սա կ’ամրապնդէ նաեւ  արաբական երկիրներու դերը` Սուրիոյ  ինքնիշխանութեան, անկախութեան եւ տարածքային ամբողջականութեան պահպանման գործընթացին մէջ։

Դիւանագիտական աղբիւրներ հաղորդեցին, որ  Պահրէնի Թագաւորութիւնը եւս իր դեսպանատան վերաբացումը պիտի կատարէ յառաջիկայ շաբթուան ընթացքին։

-Դեկտեմբերի աւարտին, հայաստանեան տնտեսական պատուիրակութիւն մը Դամասկոսի առեւտրական գրասենեակ այցելեց եւ հանդիպում ունեցաւ գրասենեակի վարչական կազմին, սուրիահայ Գործարար Խորհուրդի անդամներուն եւ կարգ մը գործարարներու հետ:

Հանդիպումին ընթացքին կողմերը անդրադարձան երկու երկիրներու արդիւնաբերական եւ առեւտրական գործակցութիւնը զարգացնելու անհրաժեշտութեան, ինչ որ պիտի նպաստէ տնտեսական յարաբերութիւններու խթանումին եւ ներդրումային ծրագիրներու ընդլայնումին:

Հայաստանի մէջ սուրիահայ համայնքի պատասխանատու Ճորճ Բարսեղեան յայտնեց, որ այցելութեան  նպատակն է Հայաստանի եւ Սուրիոյ  միջեւ արդիւնաբերական, տնտեսական եւ առեւտրական յարաբերութիւններուն աշխուժացումն ու զարգացումը:

Սուրիահայ գործարար խորհուրդի անդամ Լեւոն Զաքի Ետալեան յայտնեց, թէ անհրաժեշտ է որ հայաստանեան կողմը եւս խորհուրդին աշխատանքը խթանէ, յատկապէս  Սուրիոյ մէջ հայաստանեան ներդրումներուն առնչուող գործառոյթները զարգացնէ՝ երկու երկիրներուն միջեւ գործակցութեան հորիզոնը ընդլայնելու նպատակով, նկատի ունենալով յատկապէս, որ Սուրիա ներկայիս  վերականգնումի սեմին  կը գտնուի:

Share.

Leave A Reply

This site uses Akismet to reduce spam. Learn how your comment data is processed.