ՏՕՆ Ս. ՍՏԵՓԱՆՈՍ ՆԱԽԱՎԿԱՅԻ Ս. ԱՍՏՈՒԱԾԱԾԻՆ ԵԿԵՂԵՑՒՈՅ ՄԷՋ

0

Ս. Ստեփանոս նախասարկաւագը իմաստութեամբ Աւետարան կը քարոզէր։ Ան կոչումին գիտակից եւ առաքեալներուն գործակից էր։ «Առաքեալներուն գործերը» հեղինակը իր մասին կը վկայէ ըսելով. «Հաւատքով եւ Սուրբ Հոգիով լեցուն մարդ մըն էր» (Գրծ 6.5)։ Ստեփանոս հաւատարիմ մնաց Քրիստոսի նկատմամբ եւ արեան վկայութեամբ նահատակութեան պսակին արժանացաւ։ Ուստի, հանդիսացաւ նորահաստատ եկեղեցւոյ հաւատքի ախոյեանը։

Հայ առաքելական եկեղեցին Ս. Ստեփանոս նախավկային սրբաշող յիշատակը սարկաւագաց տօն կը համարէ։ Ահա թէ ինչո՛ւ իւրայատուկ առիթ է մեծ սուրբին նուիրուած տօնախմբութիւնը։

Արդարեւ, Երեքշաբթի, 25 Դեկտեմբեր 2018-ին առաւօտեան ժամը 9։00-ին, Ս. Աստուածածին եկեղեցւոյ մէջ, Ս. Ստեփանոսի տօնին առիթով հանդիսապետութեամբ Բերիոյ Հայոց Թեմի Առաջնորդ Գերշ. Տ. Շահան Սրբ. Արք. Սարգիսեանի, ներկայութեամբ քահանայից դասուն, Ս. եւ Անմահ պատարագ մատուցուեցաւ։ Երգեցողութիւնը կատարեց Ս. Աստուածածին եւ Ս. Գրիգոր Լուսաւորիչ եկեղեցիներու դպրաց դասերը, ղեկավարութեամբ բժ. Սարգիս Իսկէնեանի։ Պատարագիչն էր Արժ. Տ. Զարեհ Քհնյ. Շաքարեան։ Յատկանշական երեւոյթ էր Ս. Խորանին սպասարկող սարկաւագներուն մասնակցութիւնը, որոնք Հալէպի եկեղեցիներուն մէջ կը ծառայեն։ Անոնք թափօրին միացան, սաղաւարտները իրենց գլխուն վրայ։ Աւանդութիւն դարձած այս կարգադրութիւնը իր շարունակականութիւնը պահած է, ի պատիւ սարկաւագներուն, որոնք կանչուած են Ս. Ստեփանոսի կեանքէն օրինակ առնելու եւ իրենց ուխտը վերանորոգելու։ Բազմութիւնը երկիւղած ապրումով կը հետեւէր հոգեպարար արարողութեան։

Օրուան խորհուրդը փոխանցեց Արժ. Տ. Յուսիկ Ա. Քհնյ. Սեդրակեան։ Ան Ս. Ստեփանոս Նախավկային նկարագրային կարեւոր տուեալներուն մասին անդրադարձաւ, շեշտելով անոր համարձակախօսութիւնը, որով անվախօրէն քարոզեց՝ ճշմարտութեան ջահակիրը ըլլալով։ Քահանայ հայրը ըսաւ. «Ս. Ստեփանոս Ս. Գրային վկայութիւններով կը խօսէր, անկաշկանդ կþարտայայտուէր եւ Սուրբ Հոգիի ներշնչումով դարձի գալու եւ զՔրիստոս ընդունելու կը հրաւիրէր։ Ան արի կեցուածքով երբեք չվախցաւ խաւարասէր ամբոխին զրպարտութիւններէն եւ նախատինքէն։ Այլ՝ անխախտ հաւատքով նախընտրեց նահատակութիւնը, ի խնդիր եկեղեցւոյ աճման եւ Աստուծոյ խօսքին տարածման»։

Ս. Պատարագի աւարտին եկեղեցւոյ ներքնասրահէն ներս գործադրուեցաւ գեղարուեստական հակիրճ յայտագիր մը։ Վահէ Սրկ. Սարգիսեան սարկաւագներու անունով խօսք արտասանեց։ Ան Աստուծոյ ուղղուած ի խորոց սրտի երախտագիտական խօսքեր ըսաւ։ Եկեղեցւոյ մէջ ծառայելը պատուական կոչում համարեց, որուն պտուղները քաղելու համար նախապայման է Ս. Ստեփանոս նախասարկաւագին հաւատքի դպրոցին անդամակցիլը։ Ապա պտղառատ առաքելութիւն մաղթեց իր սարկաւագ եղբայրներուն։ Ժոզէֆ Ագըլեան յատուկ առոգանութեամբ մեկնաբանեց Կոմիտասէն սրտայոյզ երգ մը։ Աննա Սաղպազարեան աղօթաշունչ ոճով կարդաց Ս. Գրիգոր Նարեկացիի «Մատեան Ողբերգութեան» աղօթագիրքէն ՂԱ բաժինը։

Առաջնորդ Սրբազան Հայրը գոհունակութեամբ արտայայտուեցաւ բարեպատեհ եւ հոգեշահ առիթին համար, որով կարելի եղաւ համախմբուիլ եւ աղօթքի մթնոլորտին ընդմէջէն հանդիսաւորապէս տօնել Ս. Ստեփանոսի խօսուն յիշատակը։ Սրբազան Հայրը ըսաւ. «Մենք աւանդութեան կառչելով հոգիով վերանորոգուելու հրաշալի վիճակը կ’ապրինք։ Այս տօնը իր անժամանցելի պատգամը կը փոխանցէ մեզմէ իւրաքանչիւրին. այսինքն՝ Աստուծոյ ներկայութեամբ ապրիլ, աղօթական ապրելակերպ որդեգրել, հոգեւոր արժէքներուն ուշադրութիւն դարձնել եւ կեանքի ողջ տեւողութեան Աստուածահաճոյ ընթացք ունենալ։ Այդպէս եղաւ Ս. Ստեփանոս նախավկային ապրելակերպը։ Ան քալեց առանց ընկրկումի կամ նահանջի, հաւատալով որ Սուրբ նպատակ իրագործելը կ’ենթադրէ անվախ ըլլալ, արիութեամբ ընթանալ եւ հաստատուն մնալ։ Սրբազան հայրը խրախուսեց սարկաւագները մաղթելով բարի եւ ջերմեռանդ ծառայութիւն, միաժամանակ գնահատեց գեղարուեստական յայտագրին մէջ բաԺին բերողները եւ դպրաց դասերը։

«Պահպանիչ» աղօթքով աւարտին հասաւ մտերմիկ հաւաքը։ Տեղի ունեցաւ հիւրասիրութիւն։ Սարկաւագները ընդունեցին շնորհաւորանքներ եւ բարեմաղթութիւններ։

«Թագաւոր երկնաւոր զեկեղեցի քո անշարժ պահեա»

Խորէն Քհնյ. Պէրթիզլեան   

Share.

Leave A Reply

This site uses Akismet to reduce spam. Learn how your comment data is processed.