ԱՌԱՋՆՈՐԴ ՍՐԲԱԶԱՆ ՀՕՐ ԱՄԱՆՈՐԵԱՆ ԱՅՑԵԼՈՒԹԻՒՆՆԵՐԸ

0

Ամանորի ուրախ առիթով, Երեքշաբթի 1 Յունուար 2019-ին, Բերիոյ Հայոց Թեմի Առաջնորդ Գերշ. Տ. Շահան Ս. Արք Սարգիսեան, յետ Ս.եւ Անմահ պատարագի, Ս. Աստուածածին եկեղեցւոյ ներքնասրահէն ներս ընդունեց հաւատացեալ ժողովուրդին շնորհաւորանքը:
Ներկայ էին քահանայից ամբողջ դասը, Ազգ. Վարչութեան ներկայացուցիչներ եւ խուռներամ բազմութիւն մը: Եկեղեցւոյ դպրապետին` Բժ. Սարգիս Իսկէնեանի ղեկավարութեամբ գործադրուեցաւ գեղարուեստական կոկիկ յայտագիր: Փոքրիկն Անդրանիկ Կիւլտալեան սրինգի նուագով ելոյթ ունեցաւ, ապա, ժողովուրդին խանդավառ մասնակցութեամբ, հնչեցին շարականներ եւ հայաշունչ երգեր: Մարիանա Ղազարեան-Պէրթիզլեան յատուկ առոգանութեամբ կարդաց Նոր Տարուան առիթով իր գրած բանաստեղծութիւնը: Աւարտին Առաջնորդ Սրբազան Հայրը փոխանցեց իր սրտի խօսքն ու աղօթաբոյր բարեմաղթութիւնները: Սրբազան Հայրը ըսաւ.«Գոհաբանական զգացումներով փառք կը վերառաքեմ ամենակալ Աստուծոյ, որուն շնորհիւ կարելի եղաւ դիմաւորել 2019 թուականը: Յուսադրուած վիճակով եւ բարձր տրամադրութեամբ այստեղ համախմբուած ենք: Աւանդութեան վերածուած հաւաք մըն է այսօրուան հանդիպումը: Մեր աչքերուն առջեւ պարզուած այս հրաշալի երեւոյթը Աստուծոյ հովանաւոր զօրութեան գեղեցիկ պատկերն է, որ հոգեւոր խորք ունի։ Բարիք գործելը բարոյական արժէքներուն մեծագոյնը կը համարուի։ Ուստի միշտ բարիին կառչինք, միեւնոյն ատեն ժամանակի նշանները կարդանք»:
Ապա իր խօսքը եզրափակելով ըսաւ. «Քրիստոսի օրինակին հետեւինք, որպէսզի սիրոյ ջերմութեամբ ապրինք եւ մեր կեանքը արժեւորենք»:
Մտերմիկ հանդիպումը աւարտին հասաւ «Պահպանիչ» աղօթքով, որմէ ետք հաւաքաբար երգուեցաւ «Կիլիկիա» մաղթերգը: Աջահամբոյրի եւ շնորհաւորանքի ընթացքին Սրբազան Հայրը Հայ եկեղեցւոյ հոգեզմայլ շարականները եւ տաղերը պարունակող խտասալիկներ բաժնեց իւչաքանչիւր ընտանիքի:
Ներկաները հիւրասիրուեցան եկեղեցւոյ թաղականութեան եւ տիկնանց օժանդակ մարմինին կողմէ պատրաստուած քաղցրեղէնով ու շնորհաւորեցին զիրար:

* * *

Նոր Տարուան առաջին ժամերուն, Ս.Պատարագէն ու Պատգամէն ետք, շնորհաւորական ժողովրդային հանդիումի աւարտին, Երեքշաբթի, 1 Յունուար 2019-ին, միջօրէի ժամը 1;00-ին, Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեան, քահանայից դասուն ընկերակցութեամբ, աւանդութիւն դարձած յատուկ այցելութիւն մը շնորհեց Հայ Ծերանոցին:

Սրբազան Հայրն ու քահանայ հայրերը դիմաւորուեցան խնամակալութեան ներկայացուցիչներուն եւ տնօրէնութեան կողմէ:

Պատսպարեալները սրտի ցնծութեամբ լսեցին Ամանորի եւ Ս.Ծննդեան նուիրուած երգեր ու շարականներ:
Առաջնորդ Սրբազան Հայրը մտերմիկ զրոյց մը ունեցաւ ծերունազարդ պապիկներուն եւ մամիկներուն հետ, անոնց մաղթելով քաջառողջութիւն եւ արեւշատութիւն:
Տօնական մթնոլորտը տիրական էր: Սրբազան Հայրը իր շքախումբով այցելեց իւրաքանչիւրին սենեակը, օրհնաբեր խօսքերով խրախուսեց զիրենք եւ քաջալերեց ծառայողները:
Օրուան ճաշի հիւրասիրութիւնը, որպէս սրտաբուխ նուէր, հրամցուեցաւ Սրբազան Հօր կողմէ:
Աստուածահաճոյ այս նախաձեռնութիւնը անանձնական սիրոյ վեհութիւնը կը պարզէր:
Խանդավառ էր Հայ Ծերանոցի մեծ ընտանիքը:
Գոհութիւն Աստուծոյ այս յատկանշական առիթին համար:
Թող Հայ Ծերանոցը շարունակէ իր առաքելութիւնը մեր համայնքի կեանքին մէջ՝ վայելելով մեր ժողովուրդի անվերապահ աջակցութիւնը:
«Եկո՛ւր, Նո՛ր Տարի, գալուստդ բարի»:

Share.

Leave A Reply

This site uses Akismet to reduce spam. Learn how your comment data is processed.