Ս. ԾՆՆԴԵԱՆ ԵՒ ԱՍՏՈՒԱԾԱՅԱՅՏՆՈՒԹԵԱՆ ՏՕՆԻՆ ԱՌԻԹՈՎ Ս. ՊԱՏԱՐԱԳ Ս. ԷՋՄԻԱԾՆԻ ՄԷՋ

0

2019-ն հռչակուեցաւ Ընտանիքի տարի:

6 Յունուարին Ս. Ծննդեան եւ Աստուածայայտնութեան տօնին առիթով Ամենայն հայոց Գարեգին Բ. կաթողիկոսը Ս. պատարագ մատուցեց Երեւանի Ս. Գրիգոր Լուսաւորիչ մայր եկեղեցւոյ մէջ:

Ս. պատարագի արարողութեան ներկայ էին Հայաստանի Հանրապետութեան վարչապետի պաշտօնակատար Նիկոլ Փաշինեանը, Սահմանադրական դատարանի նախագահ Հրայր Թովմասեանը, պետական այրեր, ինչպէս նաեւ Մայր աթոռ Ս. Էջմիածինի միաբաններ, Գերագոյն հոգեւոր խորհուրդի անդամներ, հայ եկեղեցւոյ բարերարներ, Հայաստանի մէջ հաւատարմագրուած օտարերկրեայ դիւանագիտական առաքելութիւններու ղեկավարներ, հասարակական գործիչներ, կրթական, գիտական եւ մշակութային հաստատութիւններու  ներկայացուցիչներ, տարբեր համայնքներէ հասած հարիւրաւոր ուխտաւորներ:

Հայրապետական խաչվառազարդ թափօրը «Խորհուրդ խորին» շարականի հանդիսաւոր երգեցողութեան ներքոյ Ս. Տրդատի մատուռէն  ուղղուեցաւ դէպի ամպհովանիի ներքեւ ամփոփուած հայոց հաւատքի հայր Ս. Գրիգոր Լուսաւորիչի մասունքները, ուր կատարուած երկրպագութենէն ետք իր հայրական օրհնութիւնը ժողովուրդին բաշխող Ամենայն Հայոց կաթողիկոսին առաջնորդեց դէպի խորան:

Սուրբ Պատարագին իբրեւ առընթերականեր կը սպասաւորէին Մայր Աթոռի լուսարարապետ Յովնան եպս. Յակոբեանն ու Մայր աթոռի Վարչատնտեսական բաժինի տնօրէն Մուշեղ եպս.  Բաբայեանը:

Արարողութեան ընթացքին Գարեգին Բ. կաթողիկոսը «Քրիստոս ծնաւ եւ յայտնեցաւ» կենդանարար աւետիսը յղեց համայն հայութեան եւ տօնին  առիթով փոխանցեց իր պատգամը:

Share.

Leave A Reply

This site uses Akismet to reduce spam. Learn how your comment data is processed.