ՏԵՂԱԿԱՆ ԼՐԱՔԱՂ՝ ՅՈՒՆՈՒԱՐ Բ./2019

0

-Ամերիկեան «Ուաշինկթըն Փոսթ» թերթը «Նախագահ Ասատի Դիրքին Վերականգնումը» վերնագիրով յօդուած մը հրատարակած է, որուն հեղինակը յայտնած է, որ 2018 տարին ի շահ նախագահ Պաշշար ալ Ասատի էր, որովհետեւ ան բազմաթիւ մարտահրաւէրներ դիմագրաւեց: Յօդուածագիրը հաստատած է, որ գալիք օրերը աւելի դիւրին պիտի ըլլան Սուրիոյ նախագահին համար:

Յօդուածի եզրափակիչ պարբերութեան մէջ ըսուած է. «2018-ի աւարտին արդէն յստակ էր, որ նախագահ Ասատ իր դաշնակիցներուն օգնութեամբ յաջողեցաւ պահպանել երկրին գերիշխանութիւնը:Սուրիոյ կառավարութեան վերահսկողութեան տակ առնուեցաւ սուրիական հողերուն մեծամասնութիւնը եւ արաբական պետութիւններ աստիճանաբար սկսան վերահաստատել նախագահ Ասատի հետ իրենց երբեմնի յարաբերութիւնը»:

-Ռուսիոյ արտաքին գործոց փոխնախարար Սերկէյ Ռիապքով յայտնեց, որ ներկայ պայմաններուն, ինչպէս նաեւ Ուաշինկթընի` աշխարհին տիրելու եւ հարցերը ըստ իր պայմաններուն լուծելու ձգտումին լոյսին տակ, շատ դժուար է Միացեալ Նահանգներու Սուրիայէն ամբողջական հեռացումը պատկերացնել:

Ան յայտնեց, որ Սուրիոյ հարցին շուրջ ռուս-ամերիկեան հաղորդակցութիւնը երբեք չդադրեցաւ: Թէեւ այդ հաղորդակցութեան մասին միշտ չյայտարարուեցաւ, սակայն երկար դադարներ չունեցաւ` աւելցնելով, որ Ռուսիան պիտի շարունակէ Սուրիոյ հարցով Միացեալ Նահանգներու հետ երկխօսութիւնը:

Միւս կողմէ, ամերիկացի բարձրաստիճան պաշտօնատար մը «Ռոյթըրզ»ին յայտնեց, որ Միացեալ Նահանգներու նախագահի ազգային ապահովութեան հարցերու խորհրդատու Ճոն Պոլթըն յայտնած է, որ ամերիկեան ուժերը ներկայ փուլին Սուրիոյ մէջ Թանաֆ ռազմակայանէն պիտի չհեռացուին:

Պաշտօնատարը նաեւ յայտնեց, որ Պոլթըն թուրք պաշտօնատարներուն ըսած է, թէ Ուաշինկթըն դէմ է «քիւրտ դաշնակիցներուն» դէմ որեւէ յարձակումի: Պոլթըն դժգոհութիւն յայտնած է Սուրիայէն ամերիկեան ուժերու հեռացման վերաբերեալ Թուրքիոյ նախագահ Ռեճեփ Թայիփ Էրտողանի` «Նիւ Եորք Թայմզ» օրաթերթին մէջ լոյս տեսած յօդուածին առնչութեամբ:

Թուրք պաշտօնատարները իրենց կարգին վստահեցուցած են, որ թրքական ուժերը Սուրիոյ մէջ զինուորական գործողութիւն պիտի չշղթայազերծեն, այնքան ատեն որ ամերիկեան ուժերը այդտեղ են:

-«Շաամ Թայմզ» լրատու գործակալութեան համաձայն, ռուս քաղաքական գործիչներ ճշդած են  սուրիական թղթածրարին վերաբերեալ 2019-ի Ռուսիոյ առաջնահերթութիւնները:

Անոնք նախատեսած են, որ Ռուսիա սուրիական հարցի ռազմական ոլորտին կարգաւորման կողքին, կեդրոնանայ Սուրիոյ տնտեսական եւ մարդասիրական թղթածրարներուն վրայ, այսպիսով կարեւորութիւն ընծայելով  սուրիացի տեղահանուածներու վերադարձին, երկրի վերականգնումի աշխատանքներուն եւ այլն:

Այս ծիրէն ներս, ռուսագէտ, քաղաքական վերլուծաբան դոկտ. Մահմուտ ալ Համզա դիտել տուած է, որ 2019-ին Սուրիոյ վերականգնումի աշխատանքներուն վերաշխուժացումը ռուսական քաղաքականութեան առաջնահերթութիւնը պիտի հանդիսանայ:

Share.

Leave A Reply

This site uses Akismet to reduce spam. Learn how your comment data is processed.