ՊՈԼԹԸՆԻ ՍՈՒՐ ՅԱՅՏԱՐԱՐՈՒԹԵՆԷՆ ԵՏՔ ԱՄՆ-Ի ՊԱՏՈՒԻՐԱԿՈՒԹԻՒՆԸ ԹՈՒՐՔԻԱ ՄԵԿՆԵՑԱՒ

0


Երեւան, «էրմէնիհապէր».- 8 Յունուարին  ամերիկացի բարձրաստիճան պաշտօնեաներէ բաղկացած պատուիրակութիւն մը Թուրքիա մեկնեցաւ: Պատուիրակութեան կազմին մէջ ընդգրկուած էին ԱՄՆ նախագահի ազգային անվտանգութեան հարցերով խորհրդական Ճոն Պոլթըն, զինուժի գլխաւոր շտապի պետ Ճոզէֆ Թանթորֆ, ինչպէս նաեւ Սուրիոյ մէջ ԱՄՆ-ի յատուկ ներկայացուցիչ Ճեյմս Ճեֆրին:

Ամերիկեան պատուիրակութիւնը Անգարայի մէջ շարք մը հանդիպումներ  ունեցաւ թուրք բարձրաստիճան պաշտօնեաներու հետ: Քննարկուեցան թուրք-ամերիկեան յարաբերութիւններուն առնչուող բազմաբնոյթ հարցեր: Օրակարգի վրայ դրուեցաւ յատկապէս Սուրիայէն ամերիկեան ստորաբաժանումներուն դուրսբերման գործընթացը, Սուրիոյ քրտական ուժերու, ամերիկաբնակ թուրք միլիառատէր, իսլամական քարոզիչ, կիւլէնական համայնքի առաջնորդ Ֆեթհալլա Կիւլէնի յանձնումին հարցերը:

Քննարկուեցան նաեւ «Քիւրտիստանի Բանուորական Կուսակցութեան» հարցը, թուրք-ամերիկեան ռազմական եւ տնտեսական յարաբերութիւններուն առնչուող հարցեր (ամերիկեան Patriot զենիթահրթիռային ՀՕՊ համակարգեր գնելու, երկկողմ տնտեսական յարաբերութիւնները նախկին մակարդակին հասցնելու հարցեր):

Նախօրէին Պոլթըն հանդէս  եկած էր սուր յայտարարութեամբ մը: Ան ըսած էր, որ ԱՄՆ պիտի  չհեռանայ Սուրիայէն, մինչեւ Թուրքիայէն երաշխիքներ չստանայ, որ Սուրիոյ քիւրտերուն ուղղութեամբ յարձակումներ պիտի չիրականանան եւ անոնց անվտանգութիւնը չապահովուի:

Թուրքիոյ նախագահի մամլոյ խօսնակ Իպրահիմ Քալըն Պոլթընի յայտարարութիւնը անհիմն անուանած էր՝ պնդելով, որ, իբրեւ թէ, Թուրքիոյ բոլոր քայլերը Սուրիոյ մէջ ուղղուած են Սուրիոյ քիւրտ բնակչութեան անվտանգութեան ապահովումին:

Share.

Leave A Reply

This site uses Akismet to reduce spam. Learn how your comment data is processed.