ԴԱՒԻԹ ԻՇԽԱՆԵԱՆ. «ԿԸ ՍՊԱՍԵՆՔ ԿԱՌԱՎԱՐՈՒԹԵԱՆ ՀԱՄԱՊԱՐՓԱԿ ԲԱՑԱՏՐՈՒԹԵԱՆ»

0

8 Յունուարին Արցախի Հանրապետութեան նախագահի խորհրդական Արայիկ Յարութիւնեան դիմատետրի իր էջին վրայ գրառում կատարած է՝ պարզաբանելով «Շարժում-88» ընդդիմադիր խմբակցութեան պատգամաւոր Եդուարդ Աղաբէկեանի նախաձեռնած՝ «Արցախի Հանրապետութեան ընդերքի մասին օրէնսգիրքին մէջ փոփոխութիւն կատարելու մասին» օրէնքի նախագիծին շուրջ որոշ հարցեր:

Յարութիւնեանի գրառումին արձագանգած է վերոնշեալ օրէնքի ընդունման քուէարկութեան չմասնակցած՝ Դաշնակցութիւն խմբակցութեան անդամ Դաւիթ Իշխանեան.

«Ինչպէս յայտնած էինք խնդրոյ առարկայ այս օրէնքի ընդունման ատեն՝ Դաշնակցութիւն խմբակցութիւնը չէ մասնակցած քուէարկութեան կառավարութեան եզրակացութեան բացակայութեան պատճառով:

Արայիկ Յարութիւնեան գրառումին մէջ լիարժէքօրէն ներկայացուցած է «Շարժում-88» ընդդիմադիր խմբակցութեան պատգամաւոր Եդուարդ Աղաբէկեանի առաջարկած օրինագիծի այն պատճառաբանութիւնն ու եզրակացութիւնը, զորս կանոնակարգ օրէնքի թելադրանքով կառավարութիւնը պարտաւոր էր ներկայացնել: Այլ խօսքով՝ կառավարութեան պարտականութիւնը ստանձնած է ԱՀ նախագահի խորհրդականը։

Կառավարութիւնը, բնականաբար, շնորհակալ պէտք է ըլլայ պարոն Յարութիւնեանէն՝ օրէնքով կառավարութեան պարտաւորեցուած աշխատանքը ստանձնելուն համար: Սակայն Դաշնակցութիւն խմբակցութեան չի բաւարարեր Արայիկ Յարութիւնեանի պարզաբանումը: Գալիք օրերուն կարելի առիթներ կ’ըլլան շատ աւելի մանրամասն հարցումներ ուղղելու կառավարութեան` ներկայացնելու համար որոշ ծալքեր, որոնց մէկ մասը միայն կը բացայայտէ նախկին վարչապետը: Կը սպասենք կառավարութեան համապարփակ բացատրութեան:

Հարցի կարեւորութիւնը այն է, որ ԱՀ նախագահ Բակօ Սահակեանի՝ 2017-2020-ի ծրագիրի ընկերա-տնտեսական եւ արդիւնաբերութեան տարբեր ճիւղերու զարգացման դրոյթներուն մէջ ներառուած է նաեւ հանքարդիւնաբերութիւնը: Միւս կողմէն՝ բոլորս ալ պէտք է գիտակցինք, որ երկրի բնական պաշարները կը պատկանին ոչ միայն մեր սերունդին, այլ նաեւ յաջորդ սերունդներուն։ Այստեղ պէտք է կարեւոր համարել սերունդներու համերաշխութեան սկզբունքը։ Իսկ բնական պաշարներու միջոցներով ձեռք բերուած նիւթական միջոցները բացառապէս պէտք է ծառայեն երկրին զարգացումին»։

Share.

Leave A Reply

This site uses Akismet to reduce spam. Learn how your comment data is processed.