ԱՐՑԱԽԻ ԿԱՐԳԱՎԻՃԱԿՆ ՈՒ ԱՆՎՏԱՆԳՈՒԹԻՒՆԸ ՀԱՅԱՍՏԱՆԻ ԱՌԱՋՆԱՀԵՐԹՈՒԹԻՒՆՆԵՐՆ ԵՆ. ՀԱՅԱՍՏԱՆԻ ԱՐՏԱՔԻՆ ԳՈՐԾՈՑ ՆԱԽԱՐԱՐԸ ՀԱՆԴԻՊԱԾ Է ԱՐՑԱԽԻ ԳՈՐԾԸՆԿԵՐՈՋ ՀԵՏ

0


Հայաստանի Հանրապետութեան արտաքին գործոց նախարարի պաշտօնակատար Զոհրապ Մնացականեան 12 Յունուարին հանդիպած է Արցախի արտաքին գործոց նախարար Մասիս Մայիլեանի հետ։

Հայաստանի եւ Արցախի Արտաքին Գործոց Նախարարութեան ղեկավարները կարեւոր համարած են երկու քաղաքական գերատեսչութիւններու միջեւ տեղի ունեցող պարբերական քաղաքական խորհրդակցութիւնները եւ արդիւնաւէտ համագործակցութիւնը տարբեր ոլորտներու մէջ:

Զոհրապ Մնացականեան եւ Մասիս Մայիլեան հանգամանալից միտքեր փոխանակած են ԵԱՀԿ Մինսքի խմբակի համանախագահներու հովանիին ներքեւ Լեռնային Ղարաբաղի հակամարտութեան բացառապէս խաղաղ լուծման գործընթացին շուրջ:

Արտաքին գործոց նախարարի պաշտօնակատար Մնացականեան վերահաստատած է Հայաստանի կառավարութեան ծրագիրին մէջ նախորդ տարուան Մայիսէն Լեռնային Ղարաբացի հիմնահարցի լուծման առնչութեամբ արտացոլուած սկզբունքները: Ան յատկապէս ընդգծած է, որ Արցախի կարգավիճակն ու անվտանգութիւնը Հայաստանի առաջնահերթութիւններն են եւ վերստին շեշտած խաղաղութեան գործընթացի մէջ Արցախի որոշիչ ձայնի ու ներգրաւուածութեան կարեւորութիւնը: Զոհրապ Մնացականեան յայտնած է, որ այս դիրքորոշումը քաջածանօթ է յատկապէս անոնց, որոնք Հայաստանի հետ ներգրաւուած են հանգուցալուծման գործընթացին մէջ: Ընդ որում, այս շրջանակներուն մէջ վերջին ամիսներուն գումարուող հանդիպումները արձանագրած են դրական արդինքներ:

Հայաստանի արտաքին գերատեսչութեան ղեկավարը շեշտած է, որ հիմնահարցի հանգուցալուծման համար պէտք է հակամարտութեան բոլոր կողմերուն` խաղաղութեան հասնելու լուրջ յանձնառութիւնը դրսեւորուի: Կարեւոր նկատուած է լարուածութեան բացառման, վտանգներու նուազեցման գործիքներու կիրառման եւ անոնց շարունակական զարգացման ուղղութեամբ քայլերու ձեռնարկումը, որոնք բաղկացուցիչ մասը կը կազմեն խաղաղութեան նպաստող մթնոլորտի ձեւաւորման համար: Երկուստեք անդրադարձած են, որ յարձակողական հռետորաբանութեան օգտագործումէն զերծ մնալը կրնայ լաւագոյնս բնորոշել խաղաղ հանգուցալուծման յանձնառութիւնը:

Կողմերը անգամ մը եւս ընդգծած են, որ խաղաղութիւնը գերակայ է, բայց այդ մէկը պէտք չէ վճռականութեան նահանջ համարել:

Հայաստանի եւ Արցախի արտաքին քաղաքական գերատեսչութիւններու ղեկավարները անդրադարձած են յառաջիկային Մինսքի խմբակի համանախագահներու օրակարգին մէջ ներառուած ձեռնարկներուն եւ կարեւորած անոնց նախօրէին իրարու միջեւ միտքերու փոխանակման ձեւաւորուած գործառոյթը:

Հանդիպումին անդրադարձ կատարուած է նաեւ Հայաստանի եւ Արցախի միջեւ ոլորտային համագործակցութեան ու երկկողմանի օրակարգին առնչուող հարցերուն»:

Share.

Leave A Reply

This site uses Akismet to reduce spam. Learn how your comment data is processed.