ՏԵՂԱԿԱՆ ԼՐԱՔԱՂ՝ ՅՈՒՆՈՒԱՐ Գ./2019

0

-Երկուշաբթի, 14 Յունուար 2019-ի առաւօտեան, Սուրիոյ նախագահ Պաշշար ալ Ասատ ընդունեց Իրանի խորհրդարանի արտաքին քաղաքականութեան եւ ազգային ապահովութեան յանձնաժողովի նախագահ Հշմաթալլա Ֆալահէթ Պիշան եւ անոր ընկերակցող պատուիրակութիւնը:

Հանդիպումին ընթացքին կողմերը խորհրդակցեցան Սուրիոյ եւ Իրանի ռազմավարական յարաբերութիւններուն  եւ անոնց ամրապնդման ազդակներուն շուրջ:

Ասատ շեշտեց, որ Դամասկոսի եւ Թեհրանի յարաբերութիւնները սկզբունքային են՝ հիմնուած ժողովուրդներու ինքնորոշման իրաւունքին վրայ, ինչ որ կը  նպաստէ երկու երկիրներու  գերիշխանութեան պահպանումին:

Իր կարգին, Հշմաթալլա շեշտեց, որ արեւմտեան երկիրներ Սուրիոյ եւ Իրանի դէմ պատժամիջոցներ որդեգրելով անկախ պետութիւններու գերիշխանութիւնը կ’անտեսեն:

-Չորեքշաբթի, 16 Յունուար 2019-ին, Սուրիոյ Արտաքին Գործոց Նախարարութիւնը հաղորդեց. «Էրտողանի յայտարարութիւնները կը վերահաստատեն, որ Ասթանայի բանակցութիւններուն ընթացքին ահաբեկիչներուն սատար հանդիսացող Թուրքիան միայն մէկ լեզու կ’օգտագործէ՝ բռնատիրութեան ու թշնամանքի լեզուն, իսկ Թուրքիոյ իշխանութիւններուն վարքագիծը կը հակասէ ՄԱԿ-ի սկզբունքներուն եւ միջազգային ընտանիքին բոլոր այն որոշումներուն, որոնք կը հաստատեն Սուրիոյ տարածքային ամբողջականութիւնը»:

Նախարարութիւնը եզրափակելով ըսաւ. «Սուրիա ինչպէս անցեալին, այնպէս ալ այսօր պիտի շարունակէ պաշտպան հանդիսանալ իր ժողովուրդին եւ երկրին տարածքային ամբողջականութեան՝ դէմ դնելով բոլոր այն ուժերուն, որոնք կը փորձեն սուրիական հողեր բռնագրաւել»:

Երկուշաբթի, 14 Յունուար 2019-ին, Սուրիոյ կառավարութեան հերթական նիստին ընթացքին անդրադարձ կատարուեցաւ  վերջերս արեւմուտքին Սուրիոյ պարտադրած միակողմանի պատժամիջոցներու ծաւալումին, որուն իբրեւ արդիւնք երկրէն ներս յառաջացած քարիւղի արտադրութեան տագնապին եւ անոր լուծման ուղիներուն:

Ժողովը արձանագրեց, որ քարիւղի տագնապը շուտով պիտի փարատի, որովհետեւ կառավարութիւնը նոր միջոցներու դիմած է՝  յառաջիկայ օրերուն քարիւղի արտադրութեան ծաւալը աւելցնելու եւ  օրական 130.000 տակառ արտադրելու համար:

Ժողովին համաձայն,  օրերս քաղաքացիները  տարուած աշխատանքին շօշափելի արդիւնքը պիտի նկատեն:

-Սուրիական Օդանաւային Ընկերութիւնը յայտնեց, որ Օմանէն պատուիրակութիւն մը այցելած է Դամասկոսի միջազգային օդակայան՝ ծանօթանալու օդակայանի ներքին կարգաւորումներուն:

Սուրիական Օդանաւային Ընկերութեան տնօրէն Շիֆա Նուրի յայտնեց, որ Պահրէյնի  եւ Արաբական Միացեալ Էմիրութիւններու օդանաւային ընկերութիւնները եւս դիմում ներկայացուցած են ժամանելու Դամասկոս եւ  ծանօթանալու օդակայանի իրավիճակին՝ վերսկսելու երկու երկիրներուն միջեւ օդանաւային բնականոն թռիչքները:

Share.

Leave A Reply

This site uses Akismet to reduce spam. Learn how your comment data is processed.