ԳԱՄԻՇԼԻԻ ԿԻՐԱԿՆՕՐԵԱՅ ԴՊՐՈՑԻ ԱՄԱՆՈՐԵԱՆ ԽՐԱԽՃԱՆՔԸ

0

Հովանաւորութեամբ Ճէզիրէի Հայոց Առաջնորդական Փոխանորդ Հոգշ. Տ. Ռուբէն Աբղ.Նալպանտեանի, կազմակերպութեամբ Գամիշլիի Կիրակնօրեայ դպրոցի ուսուցչաց կազմին, Շաբաթ, 28 Դեկտեմբեր 2018-ին, Գամիշլիի «Կիւլպէնկեան» սրահէն ներս տեղի ունեցաւ Կւրակնօրեայ դպրոցի Ամանորի եւ Ս. Ծնունդի տօնակատարութիւնը, ներկայութեամբ ուսուցչական կազմին եւ միութիւններու ներկայացուցիչներուն։ Հանդիսութեան բացումը կատարեց Նելլի Խաչատուրեան-Շահինեան։ Ան ներկաները հրաւիրեց մէկ վայրկեան յոտնկայս յարգելու անմահ նահատակներուն յիշատակը, ապա հնչեց Սուրիոյ, Հայաստանի եւ Կիրակնօրեայ վարժարանի քայլերգները։ Այնուհետեւ աշակերտները յաջորդաբար բեմ բարձրացան ու ներկայացուցին գունեղ յայտագիր մը, որ կ՚ընդգրկէր աղօթքներ, սաղմոսներ շարականներ, բանաստեղծութիւններէ ընտիր համարներ։ Խումբ մը աշակերտներ հանդէս եկան հայկական պարով եւ Քրիստոսի ծնունդին մասին պատմող թատերական ներկայացումով։ Աշակերտական երգչախումբը հրամցուց հայկական եւ օտար երգերու փունջ մը, գեղ. ղեկավարութեամբ Եւա Խաչօ- Սիմոնեանի։ Կաղանդ Պապուկի ժամանումը խանդավառեց ներկաներն ու աշակերտները, որոնք ստացան յատուկ նուէրներ։ Հուսկ հոգշ. հայր սուրբը իր հայրական օրհնութեամբ եւ բարի մաղթանքներով խաղաղ, անփորձանք տարի մաղթեց եւ բարձրօրէն գնահատելով կիրակնօրեայ վարժարանի աշխատանքը յատուկ յուշանուէրներով պարգեւատրեց ուսուցչուհիները։ Ձեռնարկը փակուեցաւ «Պահպանիչ» աղօթքով, իսկ տօնակատարութիւնը շարունակուեցաւ աշակերտական մտերմիկ խրախճանքով։

Բժշկհ. Մարի Մելքոն

Share.

Leave A Reply

This site uses Akismet to reduce spam. Learn how your comment data is processed.