ՄԱՐԶԱԿԱՆ՝ ՅՈՒՆՈՒԱՐ Գ./2019

0

ՏԵՂԱԿԱՆ

 Սուրիոյ Ֆութպոլի Դաշնակցութիւնը (Ֆետերասիոնը) Դադրեցուց Պերնարտ Շթանկէնը

Ասիոյ 2019-ի ախոյեանական մրցումներու ընթացքին Սուրիոյ ֆութպոլի հաւաքականը առաջին երկու մրցումներուն ձախողութեան մատնուելէն ետք, Սուրիոյ ֆութպոլի դաշնակցութիւնը (ֆետերասիոնը) որոշեց խումբի գերմանացի մարզիչ Պերնարտ Շթանկէնը դադրեցնել իր պաշտօնէն: Անոր փոխարինեց հաւաքականի նախկին տեղացի մարզիչ Ֆաճր Իպրահիմ:

Սոյն մրցումներուն, Սուրիոյ հաւաքականը իր առաջին հանդիպումը ունեցաւ Պաղեստինի կազմին դէմ: Թէեւ հանդիպումին տիրապետողը սուրիացիները եղան, բայց անոնք դժուարութիւն ունեցան հասնելու  մրցակիցին դարպասին եւ ճակատումը իր աւարտին հասաւ 0 – 0 հաւասար արդիւնքով: Երկրորդ մրցումին սուրիացի բոլոր խաղցողները ձախող խաղարկութիւն ցուցաբերեցին եւ զիջեցան Յորդանանի կազմին: Առաջին կիսախաղին մրցակիցը յաջողեցաւ երկու առիթներով ցնցել Ալմայի դարպասը, իսկ երկրորդ կիսախաղին ան կրցաւ տիրապետել խաղարկութեան եւ իշխել արդիւնքին: Խաղը իր աւարտին հասաւ 2 – 0 հաշիւով: Սոյն մրցումԷն կէս ժամ ետք,  ֆետերասիոնը պաշտօնապէս յայտարարեց գերմանացի մարզիչին հեռացումը եւ նոր մարզիչին անունը: Վերջինս յաջորդ օրն իսկ ժամանեց Իմարաթ եւ ստանձնեց խումբի մարզիչի պաշտօնը:

ՄԻՋԱԶԳԱՅԻՆ

Էնտի Միւրէյ Պիտի Հրաժարի Արհեստավարժ Մարզիչի Ասպարէզէն

Անգլիացի թենիս խաղցող Էնտի Միւրէյ մամլոյ ասուլիսի մը ընթացքին յայտարարեց, թէ հաւանական է, որ Աւստրալիոյ թենիսի Կրան-շլեմի միջազգային բաց մրցաշարքին մասնակցութիւնը ըլլայ իր արհեստավարժ ասպարէզին վերջին խաղը եւ թէ ան մտադիր է հեռանալ թենիսէն: 31 տարեկան Միւրէյ վերջին շրջանին տառապեցաւ զանազան անհանգստութիւններէ: Անոր առողջական վիճակը լաւ չէ: Նախորդ տարեշրջանի սկիզբը ան ենթարկուեցաւ վիրաբուժութեան: Անգլիացի խաղցողը 2018-ին մասնակցեցաւ 12 մրցումի՝ արձանագրելով 8 յաղթանակ: Մամլոյ ասուլիսի մը ընթացքին ան չկրցաւ զսպել իր արցունքները:

Հիկուին Կ’ուզէ Լքել Միլանը

 Իտալիոյ Միլան խումբի մարզիչ Կաթոզոն թղթակիցներուն հետ հանդիպումի մը ընթացքին յայտնեց, որ 31 տարեկան յարձակողական խաղցող Հիկուին, որ մէկ տարուան վարձքով քանի մը ամիս առաջ Իւվէնթոսէն միացաւ Միլանին, փափաք յայտնած է լքելու խումբը: Ըստ մարզիչին, Հիկուինի որոշումը հաստատ է եւ դժուար է անոր կարծիքը փոխել տալ ու զինք պահել Միլանի մէջ:

Մարզիչը  յայտնեց, որ խումբը կարիք ունի Հիկուինի աշխատանքին, սակայն երբ պահը հասնի եւ  ինք վերջնականապէս որոշէ լքել խումբը, մենք կը յարգենք իր որոշումը: Ըստ տարածուած տեղեկութիւններուն, Հիկուին համաձայնութիւն գոյացուցած է անգլիական Չէլսի խումբին հետ, որուն մարզիչին հետ նախապէս գործակցած է Իտալիոյ Նափոլի խումբին մէջ:

Աւելցնենք, որ Հիկուինի մէկ տարուան վարձքն է 18 միլիոն եւրօ:

ՀԱՅԿԱԿԱՆ

Տիգրան Պետրոսեան Պարագլուխի  Դիրքին Վրայ  Յայտնուեցաւ

Կիրակի, 13 Յունուարին, Տիգրան Պետրոսեանի անուան ճատրակի տան մէջ տեղի ունեցան Հայաստանի ճատրակի տղոց 79-րդ ախոյեանութեան 2-րդ փուլի հանդիպումները:

Տիգրան Պետրոսեան, որ արձանագրեց իր երկրորդ յաջորդական յաղթանակը, կը գտնուէր պարագլուխի դիրքին վրայ` ապահովելով առաւելագոյն 2 կէտը: Անոր ետին կը գտնուէին Զաւէն Անդրէասեան եւ Արման Փաշիկեան, որոնք ունէին 1,5-ական կէտ:

Այս փուլին յաղթանակ արձանագրեցին նաեւ Հայկ Մարտիրոսեան եւ Սամուէլ Տէր Սահակեան:

Յառաջիկայ օրերուն տեղի ունեցան 3-րդ փուլի հանդիպումները:

Ռաֆֆի Սիւլահեան



Share.

Leave A Reply

This site uses Akismet to reduce spam. Learn how your comment data is processed.