ԺԻՐԱՅՐ ՐԷԻՍԵԱՆ. «ՍՈՒՐԻՈՅ ՆԱԽԱԳԱՀԻՆ ՓԱՓԱՔՆ Է, ՈՐ ԻՆՉՊԷՍ ԲՈԼՈՐ ՍՈՒՐԻԱՑԻՆԵՐԸ, ԱՅՆՊԷՍ ԱԼ ՀԱՅ ՀԱՄԱՅՆՔԻ ԱՆԴԱՄՆԵՐԸ ՍՈՒՐԻԱ ՎԵՐԱԴԱՌՆԱՆ»

0


Սուրիոյ խորհրդարանի  երեսփոխան Ժիրայր Րէիսեան «Թերթ»ի հետ զրոյցի մը ընթացքին յայտնեց, որ սուրիահայերը արդէն աստիճանաբար կը վերադառնան իրենց բնակավայրերը, սակայն, այս առումով վիճակագրութիւն չկայ տակաւին:

«Վերադարձողները տեղեակ չեն պահեր իրենց վերադարձին մասին: Պարբերաբար պարզապէս կը լսենք այս կամ այն ընտանիքին վերադարձը: Պաշտօնական վիճակագրութիւն չկայ, թէ ով վերադարձաւ, ով չվերադարձաւ», ըսաւ ան:

Ժիրայր Րէիսեանի խօսքով, Սուրիոյ իշխանութիւնները միշտ ալ դրական վերաբերմունք կը ցուցաբերեն հայ համայնքին նկատմամբ: 

Ան նկատեց, որ Սուրիոյ մէջ հայերուն նկատմամբ մեծ յարգանք կը ցուցաբերուի: «Հետեւաբար հայերուն ներկայութիւնը կ’ապահովէ պետութեան ամբողջութիւնը, պետութիւնը չ’ուզեր սուրիական ընկերութեան խճանկարը խաթարել: Սուրիոյ յարգարժան նախագահը միշտ ալ արտայայտած է իր յարգանքը հայ ժողովուրդին նկատմամբ: Ես գոնէ երկու տարի առաջ իրմէ անձամբ լսած եմ, որ նախանձախնդիր է, որ այդ խճանկարը չխախտի: Անոր փափաքն է, որ այնպէս ինչպէս բոլոր այն սուրիացիները, որոնք դժուար պայմաններու բերումով դուրս եկած էին Սուրիայէն, նոյնպէս ալ հայ համայնքի անդամները վերադառնան Սուրիա», ըսաւ ան՝ յայտնելով, որ նախագահը միշտ ալ ըսած է, որ եթէ համայնքը օգնութեան կարիք ունի, ան իր կարելիութեան սահմանին մէջ պիտի օգնէ:

Պատասխանելով այն հարցումին, թէ արդեօք մտահոգութիւն կա՞յ, որ ամերիկեան զօրքերու հեռացումին հետեւանքով Թուրքիա ներխուժէ Սուրիոյ հիւսիսային շրջաններ, Ժիրայր Րէիսեան յայտնեց, թէ որպէս Սուրիոյ քաղաքացիներ, կը հաւատան, որ ապօրինի կերպով Սուրիա ներխուժած բոլոր ուժերը պէտք է հեռանան երկրէն: «Անոնց հեռանալէն ետք, պետութիւնը կը հաստատէ երկրին խաղաղութիւնն ու կայունութիւնը: Բայց այնքան ատեն որ այդ ուժերը ներկայ են երկրին մէջ, իրավիճակը կայուն չի դառնար», ըսաւ ան:

Ժիրայր Րէիսեանի համաձայն, Հալէպի մէջ կեանքը բնականոն է: Պատասխանելով այն հարցումին, թէ հայկական թաղամասերը կը վերականգնի՞ն, ան ըսաւ․ «Ես չեմ ուզեր առանձնացնել հայկական թաղամասերը․ քաղաքը ընդհանուր վերականգնումի գործընթացին մէջ է: Արդէն շատ մը շէնքեր վերանորոգուած են»։

Ժիրայր Րէիսեան պատասխանելով այն հարցումին, թէ ի՞նչ ակնկալիքներ ունին, յոյս ունի՞ն, որ Սուրիոյ պատերազմը վերջ կը գտնէ ըսաւ, որ այսօր պատերազմին մէջ ներգրաւուած միջազգային բոլոր դերակատարներն ալ հասկցած են, որ պատերազմի աւարտը ի շահ Սուրիական պետութեան պիտի ըլլայ:

Անդրադառնալով Հայաստանի իշխանութիւններուն նախաձեռնութեամբ, Հալէպի մէջ Ռուսիոյ հետ գործակցաբար քաղաքապահ զօրքերու տեղակայումին, Ժիրայր Րէիսեան ըսաւ․ «Սուրիահայը Սուրիոյ ժողովուրդին անբաժանելի մէկ մասնիկն է, հետեւաբար, եթէ միջպետական համաձայնութիւններով Հայաստանի քայլը ողջունելի ըլլայ Սուրիոյ համար, ողջունելի կ’ըլլայ նաեւ մեզի համար: Բայց մեզի համար ապահովութեան, կայունութեան առաջին  երաշխիքը սուրիական բանակն է, սուրիական պետութիւնը: Սուրիոյ մէջ հայութեան հետ յարաբերութիւնները բարեկամութեան, եղբայրութեան մակարդակի վրայ են»:

Share.

Leave A Reply

This site uses Akismet to reduce spam. Learn how your comment data is processed.