ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ

0

Սուրիական հողերուն ուղղութեամբ իսրայէլեան յարձակումները սուրիական մամուլին մէջ առանցքային տեղ գրաւեցին այս շաբաթ:

ՍԱՆԱ լրատու գործակալութիւնը յայտնեց, որ Երկուշաբթի, 21 Յունուար 2019-ի առաւօտեան ժամը 1:10-ին Իսրայէլ բազմաթիւ հրթիռներ արձակեց սուրիական հողերուն ուղղութեամբ: Սուրիական բանակի հակաօդային պաշտպանութեան համակարգերը անմիջապէս դէմ դրին հրթիռներուն, վար առին անոնց մեծամասնութիւնը՝ նախքան թիրախին հասնիլը: Աղբիւրը յիշեց, որ հրթիռները արձակուեցան լիբանանեան-պաղեստինեան հողերէն, եւ Տիպերիոյ լիճին մօտակայքէն: Կիրակի, 20 Յունուար 2019-ին, սուրիական հակաօդային պաշտպանութեան համակարգերը  դէմ դրած էին նաեւ Սուրիոյ հարաւային շրջանին ուղղութեամբ իսրայէլեան օդային յարձակումի մը:

ՍԱՆԱ լայն տեղ տուած էր այս ուղղութեամբ միջազգային դատապարտումներուն: «Սուրիոյ դէմ իսրայէլեան յարձակումները միջազգային օրէնքին խախտում կը նկատուին», յայտնած էր Ռուսական Տումայի պաշտպանութեան յանձնախումբի փոխնախագահ Անտրէ Քրասով: Ան խստիւ դատապարտած էր իսրայէլեան իրերայաջորդ յարձկումներն ու ՄԱԿ-ին եւ միջազգային ընտանիքին լռութիւնը:

Իր կարգին,  «Սատիքուն» իրաքեան խորհրդարանական խմբաւորումի նախագահ Հասան Սալէմ յայտնած էր, որ Սուրիոյ դէմ իսրայէլեան շարունակուող յարձակումները ամերիկեան-սիոնիստական ծրագիրին ձախողութեան արդիւնքը կը համարուին պարզապէս:

Այս ծիրէն ներս, սուրիական «Շամ Թայմզ» կայքէջը վկայակոչելով Ռուսիոյ Պաշտպանութեան Նախարարութեան յայտարարութիւնը յայտնեց. «Ռուսական հակաօդային պաշտպանութեան համակարգերուն իսրայէլեան տասնեակ հրթիռներ վար առնելը Իսրայէլի ուղղուած ռուսական յստակ ուղերձ մըն է՝ Սուրիոյ դէմ նոյնանման յարձակումներ չկրկնելու համար»:

Այս առիթով ՍԱՆԱ հրապարակեց Սուրիոյ Արտաքին Գործոց Նախարարութեան զոյգ նամակները ուղղուած՝ ՄԱԿ-ի ընդհանուր քարտուղարին եւ Անվտանգութեան Խորհուրդի նախագահին: «Սուրիոյ դէմ իսրայէլեան յարձակումին նպատակն է տագնապը երկարաձգել եւ իսրայէլի գործակալ ահաբեկչական խմբաւորումներու մնացորդացին կորովը բարձրացնել» յիշուած էր նամակներուն մէջ:

Նախարարութեան համաձայն. «Սուրիա կը շեշտէ, որ Իսրայէլի վտանգաւոր եւ յարձակողական այդ վարքագիծը չէր կրնար ենթահող գտնել՝ առանց ԱՄՆ-ի վարչակազմին եւ Անվտանգութեան Խորհուրդի անդամ կարգ մը պետութիւններուն անվերապահ աջակցութեան: Այդ պետութիւնները «գերեզմանային լռութիւն» կը պարտադրեն ՄԱԿ-ի Անվտանգութեան Խորհուրդին, որպէսզի խոչընդոտ հանդիսանան իսրայէլեան յարձակումները դատապարտող քայլերուն: 

Նախարարութիւնը իր նամակը եզրափակելով ըսաւ. «Սուրիա վերստին կոչ կ՛ուղղէ Անվտանգութեան Խորհուրդին՝ ՄԱԿ-ի պայմանագիրին մէջ յիշուած իր պարտաւորութիւններուն տէրը դառնալու, միջազգային ապահովութիւնն ու խաղաղութիւնը պահպանելու եւ  վճռական միջոցներ որդեգրելու՝ նման յարձակումներու կրկնութիւնը կանխելու համար»:

«Շամ Թայմզ»ի էջերուն վրայ կը կարդանք նաեւ, թէ Ռուսիոյ պետական Տումայի պատգամաւոր Տիմիդրի Պէլէքի ռուսական «Թաս» լրատու գործակալութեան հետ ունեցած հարցազրոյցին ընթացքին յայտնած է, թէ Ռուսիա կը ծրագրէ Դամասկոսի Միջազգային Օդակայանը ընդարձակել, որպէսզի ան կարելիութիւն ունենայ դիմաւորելու աւելի քան 15 միլիոն ճամբորդ:

Պէլէք տեղեկացուցած է, որ մօտ օրէն Դամասկոսի Միջազգային Օդակայանէն թռիչքներ պիտի սկսին դէպի Խրիմի կղզի:

Շաբթուան ընթացքին, սուրիական մամուլը անդրադարձաւ նաեւ Պէյրութի մէջ տեղի ունեցած Արաբական Լիկայի Տնտեսական բարգաւաճման վեհաժողովին, որուն ներկայ գտնուեցան արաբական պետութիւններու նախագահներ, Արաբական Լիկայի ընդհանուր քարտուղար Ահմատ ապու Ղէյզ եւ Լիկային մաս կազմող պետութիւններու ներկայացուցիչներ:

Ուրբաթ, 18 Յունուար 2019-ին, վեհաժողովի նախօրէին, արաբ արտաքին գործոց նախարարներու միատեղ նիստը գումարուեցաւ, որուն նախագահութիւնը ստանձնեց Լիբանանի արտաքին գործոց նախարար Ժըպրան Պասիլ։ Պասիլ կոչ ուղղեց Արաբական Լիկային ապահովելու Սուրիոյ վերադարձը Արաբական Լիկա ։ «Սուրիոյ բացակայութիւնը մեր այս նիստէն, արաբական Լիկայի ամենամեծ թերութիւնն է։ Սուրիան պէտք է վերադառնայ արաբական Լիկա», ըսաւ ան, աւելցնելով որ. «Սուրիան Արաբական Լիկայի անդամակցութենէն դադրեցնելը պատմական սխալ է»։

«Շամ Թայմզ»ի էջերուն վրայ կը կարդանք նաեւ, որ լիբանանեան դիւանագիտական աղբիւրի մը համաձայն, Պասիլ մօտ օրէն Սուրիա պիտի այցելէ՝ նախագահ Պաշշար ալ Ասատին հետ հանդիպում ունենալու համար:

Այս շրջագիծին մէջ, «Շամ Թայմզ» հրապարակեց Լիբանանի նախագահ Միշէլ Աունի վեհաժողովի բացման խօսքը, որուն մէջ Աուն կոչ ուղղած էր միջազգային ընտանիքի սուրիացի տեղահանուածներուն վերադարձին համար բարենպաստ պայմաններ ապահովելու:

Share.

Leave A Reply

This site uses Akismet to reduce spam. Learn how your comment data is processed.