ՄԱՐԶԱԿԱՆ՝ ՅՈՒՆՈՒԱՐ Դ./2019

0

ՏԵՂԱԿԱՆ

Եթէ Կ’ուզես Դառնալ Ախոյեան՝ Խումբիդ Միացուր Ալիսիա Մակարեան

Վերջին տասնամեակին Սուրիոյ պասքեթի ախոյեանութեան մէջ Ալիսիա Մակարեանի անունը յաճախ յիշուեցաւ երկրի եւ արաբական աշխարհի լաւագոյն խաղցողներու ցանկին մէջ: Ան իր խումբին հետ արժանացաւ Սուրիոյ ախոյեանութեան մէկէ աւելի բաժակներու: ՀՄԸՄ-ի Հալէպի աղջկանց խումբի նախկին խաղցող Ալիսիա Մակարեան, որ վերջին քանի մը տարիներուն ընթացքին մաս կը կազմէր Դամասկոսի «Ուահտէ» խումբին, այս տարեշրջանին, փոխելով իր տարազը, միացաւ դրացի «Սաուրա»ին: Ալիսիայի համար սովորութիւն դարձաւ ախոյեանութիւնը՝ իր յաղթարշաւին փայլուն էջ մը պարգեւելով: Ան իր նոր կազմին հետ տիրացաւ Սուրիոյ Հանրապետական աղջկանց բաժակին՝ աւարտական մրցումին 72 – 51 արդիւնքով պարտութեան մատնելով «Քասիուն»ը: Յիշենք, որ Ալիսիա ՀՄԸՄ-ի խումբին հետ արժանացաւ Աղջկանց կրտսերներու խումբի Սուրիոյ ախոյեանութեան, գրաւեց նաեւ Արեւմտեան Ասիոյ երրորդ դիրքը:

ՀԱՅԿԱԿԱՆ

Ալեքս Մագալլանէս Գանձասար-Կապանի Խաղցող Դարձաւ

«Գանձասար-Կապան» ակումբի մամլոյ ծառայութիւնը յայտնեց, որ կենդրոնական պաշտպան Ալեքս Մագալլանէս կապանեան խումբին հետ պայմանագիր ստորագրած է: Համաձայնագիրը նախատեսուած է 1 տարուան համար: Մագալլանէսի վերջին ակումբը եղած է փերուական «Ատլետիքօ Քրաուն»ը:

Աշոտ Բարսեղեանի կազմը լաւագոյն խումբի մրցումներուն փուլը աւարտեց  7-րդ դիրքը գրաւելով, ապահովելով  22 կէտ:

ՄԻՋԱԶԳԱՅԻՆ

Արսենալ Կը Ծրագրէ Խամէս Ռոտրիկէսը Պահանջել

Գերմանական «Պելտ» մարզական թերթը յայտնեց, որ լոնտոնեան Արսենալը մօտէն հետաքրքրուած է ակումբի քոլոմպիացի կիսապաշտպան Խամէս Ռոտրիկէսով: Ըստ թերթին, նախքան այս ամսուան աւարտը, Արսենալ կ’ուզէ իր խումբին միացնել  Ռոտրիկէսը: Պայէրն անոր փոխարէն կը պահանջէ տարեկան 7 միլիոն եւրօ, այսինքն` նոյն այն գումարը, ինչ որ անիկա կը վճարէ Ռէալ Մատրիտին, որուն կը պատկանի մարզիկին իսկական ստորագրութիւնը: Աւելցնենք, որ քոլոմպիացի խաղցողը  2017-ի ամրան միացաւ Պայէրնի: Պայմանագրութեան մէջ յիշուած է, որ եթէ գերմանական ակումբը կ’ուզէ անոր ստորագրութիւնը ունենալ, Ռէալին պէտք է վճարէ 42 միլիոն եւրօ:

Ռոնալտօ Իւվենթուսի Հետ Իր Առաջին Բաժակին Տիրացաւ

Սէուտական Արաբիոյ Ժետտէ քաղաքին մէջ տեղի ունեցաւ Իտալիոյ ֆութպոլի գերագոյն բաժակի մրցաշարքին աւարտական մրցումը՝ Իւվենթուս ընդդէմ  Ա. Սէ. Միլանի: Հանդիպումը աւարտեցաւ Իտալիոյ գործող ախոյեան Իւվենթուսի յաղթանակով` 1-0 արդիւնքով: Մրցումին միակ կոլը 61-րդ վայրկեանին նշանակեց Քրիսթիանօ Ռոնալտօ: Ան իր նոր խումբին հետ տիրացաւ առաջին բաժակին:  Ա. Սէ. Միլան մրցումի վերջին քսան վայրկեանը շարունակեց տասը մարզիկով, երբ միջնապահ Ֆրանք Քեսիէ կարմիր քարտ մը ստացաւ:  Յայտնենք, որ սա 8-րդ անգամն է որ Իւվենթուս կը տիրանայ սոյն տիտղոսին եւ կը դառնայ մրցանակակիր:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.