ՆԱՍՐԱԼԼԱ. «ՍՈՒՐԻԱ ԱՀԱԲԵԿՉՈՒԹԵԱՆ ԴԷՄ ԻՐ ՊԱՏԵՐԱԶՄԻ ՅԱՂԹԱԿԱՆ ԱՒԱՐՏԻՆ ՄՕՏԵՑԱԾ Է»

0

Շաբաթ, 26 Յունուար 2019-ին, Հըզպալլայի ընդհանուր քարտուղար սէյիտ Հասան Նասրալլա «Մայատին» պատկերասփիւռի կայանին հետ հարցազրոյց մը ունեցաւ: «Տարուան Զրոյց» խորագիրը կրող հարցազրոյցը վարեց «Մայատին»ի ընդհանուր տնօրէն Ղասսան պըն Ժըտտօ: Հարցազրոյցին ընթացքին Նասրալլա շեշտեց, որ Սուրիա ահաբեկչութեան դէմ իր պատերազմի յաղթական աւարտին մօտեցած է:
Նասրալլա աւելցուց. «Այժմ Սուրիոյ իրավիճակը, համեմատաբար 2011-ի իրավիճակին, աւելի լաւ է: Ներկայիս կարելի է հաստատել, որ մօտօրէն Սուրիա մեծ յաղթանակ պիտի արձանագրէ, սուրիական բանակն ու անոր դաշնակիցները հիւսիսային Սուրիոյ ճակատամարտէն յաղթական դուրս գալու բոլոր տուեալները ունին»:
Հըզպալլայի ընդհանուր քարտուղարը անդրադառնալով Իտլիպի իրավիճակին ըսաւ. «Սուրիոյ կառավարութիւնը նախապէս յայտնած էր, որ Իտլիպի հարցի լուծման առնչուող այլազան կողմերու առաջարկները ընդունելի են, սակայն առաջնահերթութիւնը քաղաքական լուծման պիտի տըրուի, ապա կոչ ուղղած էր թրքական իշխանութիւններուն Իտլիպի շուրջ Սոչիի համաձայնագիրով հաստատուած իրենց պարտաւորութիւնները կատարելու: Սուրիա, բնականաբար, իր հողերը ահաբեկիչներուն վերահսկողութեան ենթակայ պիտի չձգէ»:
Նասրալլա անդրադարձաւ նաեւ ԱՄՆ-ի ուժերուն դուրս բերման, ընդգծելով որ ամերիկեան ուժերուն Սուրիայէն հեռացումը ձախողութեան եւ պարտութեան ցուցանիշ են: Ան դիտել տուաւ, որ Իսրայէլի գործակալ ահաբեկչական խմբաւորումները եւս պարտութեան մատնուեցան:
Եզրափակելով ան յայտնեց, որ «Լիբանանի դէմ իսրայէլեան յարձակում մը սանձազերծուելու պարագային, Դիմադրութիւնը իր բոլոր կարելիութիւնները պիտի օգտագործէ երկրին պաշտպանութեան համար»:

Share.

Leave A Reply

This site uses Akismet to reduce spam. Learn how your comment data is processed.