ԱՐՏԱՔԻՆ ԳՈՐԾՈՑ ՆԱԽԱՐԱՐՈՒԹԻՒՆ. «ՍՈՒՐԻԱ ՀԵՏԱՔՐՔՐՈՒԱԾ ՉԷ ԻՐ ԺՈՂՈՎՈՒՐԴԻՆ ԱՐԻՒՆԱՀԵՂՈՒԹԵԱՆ ՊԱՏՃԱՌ ՀԱՆԴԻՍԱՑՈՂ ՊԵՏՈՒԹԵԱՆ ՀԵՏ ՅԱՐԱԲԵՐՈՒԹԻՒՆ ՄՇԱԿԵԼՈՎ»

0

Երեքշաբթի, 29 Յունուար 2019-ին, Սուրիոյ Արտաքին Գործոց Նախարարութիւնը հանդէս եկաւ հաղորդագրութեամբ մը, որուն մէջ շեշտեց, որ Սուրիոյ գծով Ֆրանսայի նախագահ Էմմանուէլ Մաքրոնի յայտարարութիւնները կ’արտացոլեն Ֆրանսայի իրարայաջորդ կառավարութիններուն Սուրիոյ հանդէպ որդեգրած ձախող քաղաքականութեան շարունակութիւնը:
Նախարարութենէն աղբիւր մը յայտնեց. «Մաքրոնի Սուրիոյ տագնապի քաղաքական լուծման անդրադարձը՝ Սուրիոյ նկատմամբ Ֆրանսայի աւերիչ քաղաքականութիւնը շրջանցելու փորձ մըն է պարզապէս: Այն Պետութիւնը որ զինեալ ահաբեկչական խմբաւորումներուն աջակցութիւն ցուցաբերեց, եւ որուն արտաքին գործոց նախարարը «Ճապհաթ ալ Նուսրա»ի ահաբեկիչները «յեղափոխականներ» անուանակոչեց եւ պատճառ հանդիսացաւ Սուրիոյ տագնապին լուծման քաղաքական նախաձեռնութիւններու փլուզման՝ նուազագոյն յարգանքն իսկ չի դրսեւորեր, երբ քաղաքական գործընթացին մասին արեւմտեան ոճով կը խօսուի, ինչ որ բոլորովին կը հակասէ Սուրիոյ ժողովուրդին երկրի միասնակամութիւնը, գերիշխանութիւնն ու ազգային անկախ ինքնորոշումը պահպանելու ձգտումներուն»:
Աղբիւրը աւելցուց, որ Սուրիա բացարձակապէս հետաքրքրուած չէ իր ժողովուրդին արիւնահեղութեան պատճառ հանդիսացող պետութեան հետ որեւէ տեսակի յարաբերութիւն վերահաստատելու:

Share.

Leave A Reply

This site uses Akismet to reduce spam. Learn how your comment data is processed.