ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ

0

Սուրիոյ եւ Թուրքիոյ  միջեւ ստորագրուած  Ատանայի համաձայնագիրը սուրիական մամուլին այս շաբթուան գլխաւոր նիւթերէն էր: Շաբաթ, 26 Յունուար 2019-ին Սուրիոյ Արտաքին Գործոց Նախարարութեան պաշտօնական կայքէջը  կը յայտնէր. «Թուրքիոյ հետ համաձայնութեան վերսկսումը  տեղի կ’ունենայ հետեւեալ պայմաններով՝ նախ անհրաժեշտ է երկու երկիրներուն սահմանային հատուածները նախապատերազմեան իրավիճակին վերադարձնել: Երկրորդ՝ թրքական իշխող համակարգը պէտք է համաձայնի դադրեցնել ահաբեկիչներուն օժանդակութիւնը, մարզումն ու զինամթերքի տրամադրումը: Երրորդ՝  իր վերահսկողութեան տակ գտնուող սուրիական հողերէն դուրս բերէ թրքական զինուորական ուժերը»:Նախարարութիւնը կ’աւելցնէր. «Թրքական իշխանութիւններուն կողմէ հնչած Ատանայի համաձայնագիրին առնչուող անպատասխանատու յայտարարութիւններէն ետք, Սուրիա կը շեշտէ, որ հաւատարիմ  է Ատանայի համաձայնագիրին եւ երկու պետութիւններուն կողմէ ահաբեկչութեան դէմ պայքարին վերաբերող բոլոր համաձայնութիւններուն, սակայն Թուրքիա  2011-էն ի վեր ահաբեկիչներուն աջակցելով եւ սուրիական հողեր բռնա-գրաւելով կը շարունակէ խոչընդոտ հանդիսանալ այս համաձայնագիրի կիրարկման»:  Սուրիական «Ալ Ուաթան» թերթը եւս լայն տեղ յատկացուցած էր Ատանայի Համաձայնագիրին: Թերթին համաձայն, Ռուսիա շեշտած է, որ Իտլիպի մէջ «Ճապհաթ ալ Նուսրա» զինեալ ահաբեկչական խմբաւորումին ներկայութիւնը Սոչիի համաձայնագիրին հակասող իրողութիւն է՝ դիտել տալով, որ Սուրիա եւ Թուրքիա Ատանայի համաձայնագիրը  պէտք է յարգեն՝ երկու երկիրներու սահմանին ապահովութիւնը վերականգնելով: Աղբիւրին համաձայն, այս հարցով Ռուսիոյ նախագահ Վլատիմիր Փութին նախորդ շաբաթ Թուրքիոյ նախագահ Էրտողանի հետ ունեցած մամլոյ ասուլիսին ընթացին կոչ ուղղած է Ատանայի Համաձայնագիրը վերաշխուժացնելու, աւելցնելով որ Մոսկուա կը մերժէ ԱՄՆ-ի նախագահ Տանըլտ Թրամփի  Անգարայի հետ համաձայնաբար յառաջ մղած Հիւսիսային Սուրիոյ մէջ «ապահով գօտի» ստեղծելու որոշումը: Հակառակ Փութինի կոչին, Թուրքիոյ նախագահ Ռեճէպ Թայիպ Էրտողան կրկին արծարծած է Հիւսիսային Սուրիոյ մէջ «ապահով գօտի» ստեղծելու հարցը:Թերթը վկայակոչելով «Սփութնիք» Լրատու Գործակալութիւնը կը տեղեկացնէր նաեւ որ. «Մոսկուայի մէջ, Լաւրով իր Ղազախ պաշտօնակից Պեյութ Աթամքոլովի հետ ունեցած միացեալ մամլոյ ասուլիսին ընթացին յայտնած էր, որ Իտլիպ մինչեւ այսօր ահաբեկիչներու որջ կը համարուի, սա յստակ իրողութիւն է, ուստի Սուրիոյ պետութիւնը այդ որջը ոչնչացնելու համար ամէն ջանք ի գործ պիտի դնէ»: Ապա ըսած էր որ. «Ռուսական կողմը պատրաստ է Իտլիպի շուրջ Թուրքիոյ հետ համաձայնութեան եզրեր գտնելու»: Ընդհանուր այս գաղափարին մէջ մնալով, «Ալ Ազմինէ» ամսագրին էջերուն մէջ կը կարդանք ամսագրի լրագրող Մուհամմէտ Անուար ալ  Մասրի յատուկ հարցազրոյցը Սուրիոյ խորհրդարանի հայ երեսփոխան դոկտ. Նորա Արիսեանի հետ, որ հրապարակուած է, 28 Յունուար 2019-ին:Հարցազրոյցին ընթացքին դոկտ. Արիսեան կը շեշտէ. «Թուրքիա մշտապէս ահաբեկչական գործունէութեան սատար կը կանգնի եւ առ այսօր կը շարունակէ այս ընթացքը»:Ան դիտել կու տայ, որ ըստ Ատանայի համաձայնագիրին, Թուրքիա իրաւունք ունի սահմանամերձ շրջաններուն մէջ, ահաբեկչական արարքներ կատարուելու պարագային, միայն 5 քլմ. Ներթափանցելու: «Մինչեւ այսօր Թուրքիա 45 քլմ. ներթափանցած է, ինչ որ բռնագրաւում կը նկատուի», կ’աւելցնէ Արիսեան:Ան անդրադառնալով Էրտողանի այն յայտարարութիւններուն, ըստ որոնց Ատանայի համաձայնագիրը ցարդ  ի զօրու կը մնայ, կը յայտնէ. «Թուրքիա 2011 թուականէն սկսեալ կը խախտէ այդ համաձայնագիրը եւ նոր յայտարարութեամբ կը փորձէ վաւերականութիւն տալ սուրիական հողերուն վրայ իր ներկայութեան»: Արիսեան կը շեշտէ նաեւ, որ «Սուրիոյ Արտաքին Նախարարութիւնը յայտնած է արդէն, թէ Ատանայի համաձայնագիրին վերագործարկումը կ’ամրապնդուի երկու երկիրներուն միջեւ սահմաններու նախկին իրավիճակին վերադարձով եւ թրքական ուժերուն հեռացումով»: Արիսեան եզրափակելով կ’ըսէ. «Թուրքիա չի կրնար ձերբազատուիլ իր ահաբեկչական թիկնոցէն»:Սուրիական մամուլի յատկանշական նիւթերէն էր նաեւ Սուրիոյ եւ Իրանի միջեւ ստորագրուած գործակցութեան համաձայնագիրը, որուն լայն տեղ յատկացուցած էր ՍԱՆԱ Լրատու Գործակալութիւնը:Աղբիւրը յայտնած էր, որ 11 համաձայնագիր եւ փոխըմբռումի յուշագրեր կնքուած են երկու երկիրներուն տնտեսական, գիտական, մշակութային, ներդրումային գործակցութիւնը ամրապնդելու համար:

Share.

Leave A Reply

This site uses Akismet to reduce spam. Learn how your comment data is processed.