ՄԱՐԶԱԿԱՆ՝ ՅՈՒՆՈՒԱՐ Ե./2019

0

ՏԵՂԱԿԱՆ

«Ճէյշ»ի Պասքեթի Խումբը՝ Սուրիոյ Բաժակակիր
Սուրիոյ պասքեթի հանրապետական բաժակի աւարտական մրցումին, Դամասկոսի «Ճէյշ» խումբը անգամ մը եւս յաջողեցաւ ձեռք ձգել ախոյեանութեան կոչումը, 81 / 59 արդիւնքով պարտութեան մատնելով Հոմսէն ժամանած «Ուասպէ»ն: Մրցումին, «Ճէյշ»ի խաղցողները տիրապետեցին խաղարկութեան եւ սկիզբէն ի նպաստ իրենց դարձուցին խաղին արդիւնքը՝ մրցակիցին կողովը ցնցելով դաշտի տարբեր անկիւններէն: Աւելցնենք, որ այս 10-րդ անգամն է որ «Ճէյշ»ի խումբը կը յաջողի տիրանալ Սուրիոյ հանրապետական բաժակին:

Սուրիացի Ամմար Ռամատան Միացաւ Հունգարական Ակումբին


Սուրիոյ ողոմպիական հաւաքականի եւ Իտալիոյ Իւվենթոս ակումբի պատանեկան խումբի խաղցող Ամմար Մունաֆ Ռամատան անցեալ շաբթուան ընթացքին մէկ տարուան պայմանագիրով հունգարական Ֆրանքֆազորի ակումբին միացաւ: 2001-ի ծնունդ Ամմար իր մարզական կեանքը սկսաւ հինգ տարեկանին, Ծովափի «Ճապլէ» խումբէն ներս: 2014-ին ան միացաւ Քաթարի «Խուր» խումբին: Անոր բարձրորակ խաղարկութիւնը պատճառ դարձաւ որ 2016-ին մաս կազմէ իտալական Իւվենթուս խումբին: Ամմարի հայրը՝ Սուրիոյ ութսունական թուականներու աստղ Մունաֆ Ռամատան, սուրիական ՍԱՆԱ լրատու գործակալութեան յայտնեց, որ միշտ փափաք ունեցած է մաս կազմելու եւրոպական խումբի մը, իսկ այսօր իր որդին կ’իրականացնէ այդ երազը:

ՄԻՋԱԶԳԱՅԻՆ

Ճոկովիչ Australian Open-ի Տիտղոսակիր
Մելպուրնի «Ռոդ Լեյվէր Արենա» քաղաքին մէջ տեղի ունեցաւ Australian Open-ի տղոց մրցաշարքի եզրափակիչ մրցումը: Ճակատագրական այս խաղին մրցակիցներն էին աշխարհի առաջին ռաքէթ Նովակ Ճոկովիչ եւ ATP-ի վարկանշային աղիւսակի երկրորդ դիրք գրաւող մարզիչ Ռաֆայէլ Նատալ: Սպասուած եզրափակիչը աւարտին հասաւ սերպիացի թենիսիստին յաղթանակով: Մրցաշարքի ողջ ընթացքին, ինքնավստահ խաղարկութեամբ հանդէս եկող Նատալ, մինչեւ այս հանդիպումը ոչ մէկ պարտութիւն արձանագրած էր: Ճոկովիչ յաղթեց 6/3, 6/2, 6/3 արդիւնքով եւ ախոյեան դարձաւ: Հանդիպումը տեւեց 2 ժամ, 6 վայրկեան: Այսպիսով, Ճոկովիչ յաջողեցաւ տիրանալ ախոյեանութեան՝ նուաճելով երրորդ անընդմէջ Grand Slam-ը: Աւելցնենք, որ վեցական անգամ Australian Open-ի ախոյեան հանդիսացած են՝ Ռոժէ Ֆետէր եւ Ռոյ Էմերսըն։ Նախապէս Ճոկովիչ ու Նատալ հանդիպած են 53 անգամ, Ճոկովիչ արձանագրած է 28 յաղթանակ:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.