ՀԱՅԿԱԶՈՒՆ ԱԼՎՐՑԵԱՆ. «ԱՅՆՊԷՍ ՉԷ, ՈՐ ԵՐԷԿ ՊԱՇՏՕՆ ՍՏԱՑԱԾ ԵՆ, ԵՒ ԱՅՍՕՐ ԻՆՉ ՈՐ ՈՒԶԵՆ` ՊԷՏՔ Է ՓՈԽԵՆ»

0


Հայաստանի Հանրապետութեան Ազգային Ժողովի փոխնախագահ, «Իմ քայլը» խմբակցութեան պատգամաւոր Ալէն Սիմոնեան յայտարարած էր, որ կը պատրաստուի նախաձեռնել Հայաստանի Հանրապետութեան քայլերգի փոփոխութիւն: Սիմոնեան կը փափաքի, որ Արամ Խաչատրեանի կողմէն գրուած քայլերգի երաժշտութիւնը դառնայ հիմը, որ, ի դէպ, Սովետական Հայաստանի հիմնն էր:

«Երկիր»ի հետ զրոյցի մը ընթացքին Արեւմտահայոց հարցերու ուսումնասիրութեան կեդրոնի ղեկավար Հայկազուն Ալվրցեան յայտնեց, որ քայլերգի փոփոխութեան հարցը օրակարգային չէ ըստ էութեան: Անոր խօսքով` մարդիկ պարզապէս չեն գիտեր ինչ ընեն եւ կ’ուզեն քայլերգէն փոփոխութիւնը սկսիլ: «Խօսքը միայն քայլերգի մասին չէ, այլ նաեւ խորհրդանիշերու, որ համակարգ է ու կամաց-կամաց այն կը փլուզուի: Ասի կամ տգիտութեան, կամ ալ` մեր խորհրդանիշերու դէմ դաւադրութեան հետեւանք է` ուրիշ բացատրութիւն չկայ: Չնայած ինչու չկայ` հարցի էութիւնը կարելի չեն հասկնար, կարելի աղմուկ կ’ուզեն բարձրացնել կամ ալ` կ’ուղղորդեն անոնց: Ելոյթներուն այնպիսի բաներ կ’ըսեն, օրինակ` Ալէն Սիմոնեան կ’ըսէ` Խաչատրեանի ստեղծագործութեան տարբերակի մէջ շարական կայ, ինչ որ մասնագէտներու յղում կը կատարեն, թէ իբրեւ թէ` քայլերգը մեր հոգեբանութիւնը չ’արտայայտեր: Ինչ որ կիսագրագէտ մարդիկ այդ գաղափարները լեցուցած են ասոր-անոր գլուխը եւ առանց անյարմար զգալու` հիմա այդ մասին կը խօսին», ըսաւ Ալվրցեան: 

Անոր գնահատականով, Ալէն Սիմոնեանի անփորձառութենէն կու գայ այս ամէնը, քանի որ ան` որպէս կարեւոր պետական պաշտօնեայ, իրաւունք չունի այսպիսի անլուրջ խօսակցութիւն մէջտեղ հանէ ու դառնայ ուրիշի խօսափողը: Ալվրցեան յայտնեց, որ Ալէն Սիմոնեան այն Ազգային Ժողովի փոխնախագահն է, որ 2018-ին ընդունած է մեր քայլերգը: «Եթէ նոյնիսկ քայլերգը փոխելու հարց յառաջանայ, Սիմոնեան դարձեալ խօսելու իրաւունք չունի: Պէտք է խորհրդարանը յանձնաժողով ստեղծէ` համապատասխան մասնագէտներէ բաղկացած, որոնք ալ պէտք է քննարկեն այդ հարցը, այն ներկայացնեն ժողովուրդին, հանրաքուէի դրուի ու որոշեն` ինչ պիտի ըլլայ: Այնպէս չէ, որ երէկ պաշտօն ստացած են եւ այսօր ինչ որ ուզեն, պէտք է փոխեն: Փոփոխութի՞ւն կ’ուզէք` օրէնքները վերափոխեցէք, ու այնպիսի օրէնքի դրոյթ մտցուցէք, որ թոյլ չտրուի երկիրը պարգեւավճարներու տեսքով թալանուի», ըսաւ Ալվրցեան: 

Ալվրցեանի համոզումով՝ նոր ուժերը չեն հասկնար, որ իրենք պետութեան ղեկավարն են, ոչ թէ հասարակական կազմակերպութիւններու:

«Աւելին ըսեմ, խորհրդանիշներու հանդէպ հակակրանքը կու գայ այն բանէն, որ այն մտած է Հայաստանի Առաջին Հանրապետութեան խորհրդարան, որ իր հիմնական մասով դաշնակցական էր: Շատերը նոյնիսկ կ’ըսէին դաշնակցական հանրապետութիւն եւ Ազգային Ժողովը հիմնականապէս բաղկացած էր դաշնակցականներէ, որոնք ալ ընտրած են խորհրդանիշները: Հակադաշնակցական պայքարի այս  բովին մէջ այսպիսի դրսեւորումներ կ’ըլլան` այն, ինչ ստեղծած է Դաշնակցութիւնը, պէտք է մէկ կողմ դնել: Բաւարար է յիշել, թէ Արամ Մանուկեանի արձանի տեղադրման հարցին մէջ ինչպիսի աղմուկ բարձրացաւ ու կը պնդէին, որ այն պէտք չէ տեղադրուի», ըսաւ Ալվրցեան: 

Ան աւելցուց նաեւ, որ Արամ Մանուկեանի արձանի տեղադրումին ալ դէմ էին, քանի որ Մանուկեան դաշնակցական էր: Ըստ Ալվրցեանի, այնպէս է, որ պետութեան հիմնադիրի հանդէպ որեւէ յարգանք ու պատիւ չկայ: 

Պատասխանելով այմ հարցումին, թէ Արամ Խաչատրեանի գործը, այո, շատ լաւ է, կամ ժամանակին Տիգրան Մանսուրեանի ստեղծագործութիւնը կը քննարկուէր, որ չես գիտեր ինչպէս դուրս մնաց «կարելի» տարբերակներու ցանկէն, սակայն այդ նոյն սկզբունքով` աշխարհին մէջ կան շարք մը լաւ ստեղծագործութիւններ, եւ ի՞նչ է` անոնք բոլորը պէտք է կարգով մեր քայլերգը դառնան` Ալվրցեան ըսաւ, որ քայլերգը երգեցողութեան, խօսքի մակարդակով չ’որոշուիր, այն պատմական արժէք է: «Որպէս քայլերգ կը ծառայեն այն երգերը, որոնք պատմականօրէն ինչ որ դերակատարութիւն ունեցած են: Շատ երկիրներ չեն ունեցած այսպիսի ստեղծագործութիւններ, եւ պետութիւն ունենալէ ետք իրենց քայլերգը ստեղծած են, իսկ մեր պարագային հակառակը եղած է: Աւելին, մեր քայլերգը մաս կազմած է պետութեան ստեղծման գործընթացին: Քայլերգը ժողովուրդը ինք ընտրած է եւ խորհրդարանին ոչինչ կը մնար ընել, քան` ժողովուրդին ընտրութիւնը վաւերացնել ու օրէնքի ուժ տալ անոր: Ո՞վ ըսաւ, որ հիմա ոեւէ մէկը իրաւունք ունի մեր ժողովուրդի պատմական իրաւունքը վերատեսութեան ենթարկելու», ըսաւ Ալվրցեան: 

Ան յայտնեց նաեւ, որ Արցախեան ազատամարտի ժամանակ ալ ժողովուրդը այդ քայլերգը կ’երգէր եւ հազարաւոր երիտասարդներ թաղուած են այդ քայլերգին ներքեւ: Քայլերգը, Ալվրցեանի խօսքով, հազարաւոր զինուորներ առաջնորդած է դէպի պատերազմ: «Հիմա ո՞վ է այդ մէկը, որ պէտք է ժողովուրդի որոշումը փոխէ: Ասի ցոյց կու տայ, որ անոնք հարցի խորքերը չեն հասկնար եւ իրենք մեղաւոր չեն, որ չեն հասկնար` մեղաւոր են անոնք, որոնք այսպիսի մարդիկ բերած ու պաշտօն տուած են», իր խօսքը ամփոփեց Ալվրցեան: 

Share.

Leave A Reply

This site uses Akismet to reduce spam. Learn how your comment data is processed.