ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԴԵՍՊԱՆԸ ԵՒ ՍՈՒՐԻՈՅ ՎԱՐՉԱՊԵՏԸ ԿԱՐԵՒՈՐ ՀԱՄԱՐԱԾ ԵՆ ՀԱՅ-ՍՈՒՐԻԱԿԱՆ ՄԻՋԿԱՌԱՎԱՐԱԿԱՆ ՅԱՆՁՆԱԺՈՂՈՎԻ ՁԵՒԱՒՈՐՈՒՄԸ

0


Հայաստանի Հանրապետութեան Սուրիոյ դեսպան Տիգրան Գէորգեան 30 Յունուարին հանդիպում ունեցած է Սուրիոյ վարչապետ Իմատ Խամիսի հետ:

Հայաստանի Հանրապետութեան Արտաքին Գործոց Նախարարութեան լրատուութեան եւ հանրային դիւանագիտութեան վարչութիւնը կը տեղեկացնէ, որ Սուրիոյ վարչապետը շնորհաւորած է Տիգրան Գէորգեան Սուրիոյ մօտ ՀՀ դեսպան նշանակուելու առիթով եւ յաջողութիւն մաղթած անոր պատասխանատու առաքելութեան մէջ:

Դեսպան Գէորգեան շնորհակալութիւն յայտնելով ջերմ ընդունելութեան եւ բարի մաղթանքներուն համար յայտնած է, որ իր պաշտօնավարման ընթացքին ջանք պիտի չխնայէ հայ-սուրիական բարեկամական յարաբերութիւնները աւելի զարգացնելու եւ խորացնելու համար:

Զրուցակիցները գոհունակութիւն յայտնած են երկու երկիրներու միջեւ առկայ համագործակցութեան մակարդակին գծով՝ ընդգծելով յարաբերութիւններու շրջանակը ընդլայնելու համար անհրաժեշտ քայլեր ձեռնարկելու անհրաժեշտութիւնը: Այս առնչութեամբ երկուստեք կարեւոր համարած են հայ-սուրիական միջկառավարական յանձնաժողովի ձեւաւորումը: Իմատ Խամիս յայտնած է, որ սուրիական ճգնաժամը աւերիչ հետեւանքներ ունեցած է երկրի տնտեսութեան համար, այդ իսկ պատճառով բարեկամ երկիրներու հետ տնտեսական յարաբերութիւններու խթանումը Սուրիոյ կառավարութեան առաջնահերթ նպատակներէն մէկն է: Իր կարգին, ՀՀ դեսպանը ընդգծած է, որ Հայաստան պատրաստ է աջակցութիւն ցուցաբերել բարեկամ Սուրիոյ:

Հանդիպումի աւարտին, Սուրիոյ վարչապետը խնդրեց իր ջերմ շնորհաւորանքները փոխանցել ՀՀ վարչապետ Նիկոլ Փաշինեանին՝ վերանշանակուելուն եւ նոր կառավարութեան կազմութեան առիթով:  

Share.

Leave A Reply

This site uses Akismet to reduce spam. Learn how your comment data is processed.