ԱՐՑԱԽԵԱՆ ՇԱՐԺՈՒՄԻ 30-ԱՄԵԱԿԻՆ ՆՒԻՐՈՒԱԾ ԽՈՐՀՐԴԱԺՈՂՈՎ՝ ՆՈՐ ՋՈՒՂԱՅԻ ՄԷՋ

0

«Նոր Ջուղա».- Հայ Դատի «Արձագանգ» քարոզչական յանձնախումբի նախաձեռնութեամբ, Արցախեան շարժումի 30-ամեակի առիթով, Ուրբաթ՝ 1 Փետրուար 2019-ի առաւօտեան,  Հայ Դատի Յանձնախումբի կեդրոնատեղիէն ներս (Նոր Ջուղա) տեղի ունեցաւ «Արցախեան շարժումի 30-ամեակ՝ պատմութիւն, իրավիճակ եւ հեռանկարներ» խորագիրով խորհրդաժողով, ուր մասնագիտական ելոյթներով հանդէս եկան Արցախէն, Թեհրանէն եւ Նոր Ջուղայէն զեկուցաբերներ:

Շուրջ վեց ժամ տեւողութեամբ այս ձեռնարկին բացումը կատարուեցաւ կազմակերպիչ յանձնախումբին խօսքով, որ ընթերցեց Միգանուշ Տէր Մարտիրոսեան: Խօսքին մէջ յատկապէս ընդգծուած էր. «Հիմնահարցը արդարացի լուծման փուլին հասցնելու անհրաժեշտ ներուժը գոյութիւն ունի Ղարաբաղի, Հայաստանի եւ Սփիւռքի մէջ… Արցախի ազատագրումով հիմնական քայլեր ձեռնարկուած են միացեալ եւ ամբողջական Հայաստանի կերտման ուղղութեամբ: Արցախի Հանրապետութեան անկախութեան հռչակագիրով եւ սահմանադրութեամբ ամրագրուած Անկախ պետականութեան կարգավիճակն ու տարածքային ամբողջականութիւնը անսակարկելի են»:

Այնուհետեւ ներկաներուն իր հայրական պատգամը ուղղեց Սպահանի Հայոց Թեմի Առաջնորդ Գերշ. Տ. Սիփան Եպս. Քէչէճեան, որ գնահատելով կազմակեպիչներու մտայղացումը Արցախին նուիրուած խորհրդաժողովի կազմակեպման համար, հայրենիքի այս բեկորը հայ ժողովրդի մեծագոյն արժէքներէն համարեց եւ ըսաւ, որ Արցախի բռնագրաւուած հողերու վերադարձումով իրականացաւ համայն հայութեան երազանքը եւ փաստուեցաւ, որ միասնական հայ ժողովուրդը վստահելով իր կամքին ու հաւատին կրնայ վերատիրանալ իր կորուսեալ հողերուն: Սրբազան Հայրը իր խօսքի աւարտին գնահատեց զեկուցաբերները եւ յաջողութիւն մաղթեց խորհրդաժողովին:  

Բացման խօսքերէն ետք խորհրդաժողովի դիւանը անցաւ իր աշխատանքին՝ Աշոտ Դաւթեանի նախագահութեամբ եւ Մանիա Ղուկասեանի քարտուղարութեամբ: Դիւանը բոլորին հրաւիրեց մէկ վայրկեան յոտնկայս լռութեամբ յարգել Արցախեան ազատագրական պայքարի ճանապարհին նահատակուած հերոսներու յիշատակը, ապա շնորհաւորելով հայոց բանակի 27-ամեակը, զեկուցաբերները հրաւիրեց ներկայացնելու իրենց նիւթերը, որոնք ըստ ժամանակացոյցի հետեւեալ նիւթերը կ՛ընդգրկէին.

Վարուժ Մովսիսեան (պատմութեան մասնագէտ, Սպահանի Հայոց Թեմի Կրօնական խորհուրդի ատենապետ-Նոր Ջուղա)՝ «Արցախի մասին յիշատակուած փաստեր՝ հին արձանագրութիւններու մէջ մինչեւ 1923 թւականը՝ Ատրպէյճանի կազմին մէջ ընդգրկուիլը».

Թաթուլ Օհանեան (յօդուածագիր, Սպահանի Հայոց Թեմի Պատգամաւորական ժողովի ատենապետ-Նոր Ջուղա)՝ «Արցախի հանրապետութիւն. բնակչութիւն, վարչատարածքային բաժանում, պետական կառոյց».

Արամ Շահնազարեան՝ (յօդուածագիր, «Ալիք» օրաթերթի կայքէջի պատասխանատու-խմբագիր-Թեհրան)՝ Արցախեան շարժումի սկզբնաւորման պատճառները եւ ազատամարտի ձեւաւորումը.

Դոկտ. Կարէն Խանլարեան (համալսարանի դասախօս, Իսլ. Խորհրդարանին մէջ հիւսիսային իրանահայութեան պատգամաւոր-Թեհրան)՝ «Պատմական իրաւունք. Արցախը ըստ իսլամական աղբիւրներու».

Սեւակ Խաչատրեան (ՀՅ Դաշնակցութեան Արցախի Կեդ. կոմիտէի անդամ- Արցախի Հանրապետութիւն)՝ «Արցախեան հակամարտութեան մերօրեայ զարգացումները, հիմնախնդիրի բանակցային գործընթացը եւ լուծման հեռանկարը».

Սոնիկ Բաղումեան (քաղաքական փորձագէտ, Սպահանի հայոց թեմի Թեմական խորհուրդի անդամ-Նոր Ջուղա)՝ «Հայաստանի եւ Սփիւռքի դերը Արցախի Հանրապետութեան միջազգային ճանաչման գործին մէջ».

Յայտնենք, որ ընթացքին ներկաներուն առիթ տրուեցաւ հարցումներ ուղղելու զեկուցաբերներուն եւ իրենց տեսակէտերը յայտնելու: 

Խորհրդաժողովին ներկայ էին քահանայ հայրեր, շրջանի Հայ Դատի յանձնախումբի անդամներ, Սպահանի Հայոց Թեմի ազգային մարմիններու, միութիւններու ու դպրոցներու ներկայացուցիչներ եւ Նոր Ջուղայէն ու Շահինշահրէն ժողովուրդ:

Ծրագրի ընդունելութեան բաժնի կազմակերպման համար՝ «Արձագանգ» քարոզչական յանձնախմուբի հետ համագործակցած էր Նոր Ջուղայի Հայ Կանանց Գթութեան Միութիւնը:

Share.

Leave A Reply

This site uses Akismet to reduce spam. Learn how your comment data is processed.