ՇԱՀԱՆ ԳԱՆՏԱՀԱՐԵԱՆ. «ՍՓԻՒՌՔԻ ՀԵՏ ՅԱՐԱԲԵՐՈՒԹԻՒՆՆԵՐԸ ՀԱՄԱԿԱՐԳՈՂ ՄԱՐՄԻՆ ՍՏԵՂԾԵԼՈՒ ՔՆՆԱՐԿՈՒՄՆԵՐՈՒՆ ՊԷՏՔ Է ՄԱՍՆԱԿՑԻ ՆԱԵՒ ՍՓԻՒՌՔԸ»

0


«Ազդակ» օրաթերթի գլխաւոր խմբագիր Շահան Գանտահարեան «Թերթ»ին հետ զրոյցի մը ընթացքին ըսաւ, թէ կարեւոր է, որ 7 մլն. Սփիւռք ունեցող պետութիւնը ունենայ Սփիւռքի հարցերով զբաղող առանձին գերատեսչութիւն:

Անոր համաձայն, հայաստանակեդրոն Սփիւռք ունենալու, Սփիւռքի մասնագիտական ներուժը օգտագործելու համար անհրաժեշտ է Սփիւռքի հարցերով զբաղող հիմնարկային կառոյց ունենալ։

«Այսօրուան իշխանութիւններու օրակարգին վրայ կայ հայրենադարձութիւն սկսելու դրոյթ, որուն հետ ես միանշանակ համաձայն եմ։ Սակայն հայրենադարձութիւն ըսելով՝ պէտք չէ մէկ անգամէն հասկնալ զանգուածային հոսք դէպի Հայաստան, այս պայմաններու մէջ ատիկա կարելիի չէ:

Հայրենադարձութիւնը պէտք է ըլլայ բազմաճիւղ։ Օրինակ՝ Մերձաւոր Արեւելքի ճգնաժամային իրավիճակին մէջ գտնուող երկիրներուն վիճակը երբ աւելի թեժանայ, դարձեալ դէպի Հայաստան հոսք պիտի սկսի եւ պէտք է ըլլայ Սփիւռքի հարցերով զբաղող առանձին գերատեսչութիւն, որ կ’ուղղորդէ այդ ներգաղթը։ Բացի այս, այդ կառոյցը նաեւ պէտք է զբաղի Սփիւռքի մասնագիտական ներուժի համախմբումով, տարբեր ծրագրերու մէջ այդ մասնագէտները ներգրաւելով, Հայաստանի մէջ ներդրումներ կատարել փափաքողները ուղղորդելով», յայտնեց Գանտահարեան։

Ինչ կը վերաբերի Գերմանիոյ մէջ Քիոլնի հայ համայնքի հետ հանդիպումի ընթացքին ՀՀ վարչապետ Նիկոլ Փաշինեանի կատարած յայտարարութեան, որ Սփիւռքի Նախարարութեան փոխարէն Սփիւռքի հետ յարաբերութիւնները պէտք է համակարգէ վարչապետի աշխատակազմը եւ հաւանաբար կ’ըլլայ յատուկ դեսպան, որ կ’ըլլայ կառավարութեան ներկայացուցիչը Սփիւռքի մէջ, Շ․ Գանտահարեան շեշտեց. «Կարեւորը աշխատանքի արդիւնքն է, բայց, նկատի առնելով Սփիւռքի հետ տարուող աշխատանքներու ծաւալն ու բնոյթը, աւելի նպատակայարմար է առանձին գերատեսչութեան գոյութիւնը։ Կը հասկանամ վարչապետի մտահոգութիւնը, որ շատ աշխատանքներ կը կատարուին այլ նախարարութիւններու կողմէն, սակայն կան ոլորտներ, որոնք կրնայ համակարգել միայն Սփիւռքի հարցերով զբաղող գերատեսչութիւնը»։

Գանտահարեանի խօսքով՝ Սփիւռքի Նախարարութեան լուծարման եւ Սփիւռքի հետ յարաբերութիւնները համակարգող մարմին ստեղծելու քննարկումներուն պէտք է մասնակցին նաեւ Սփիւռքի տարբեր կառոյցներու ներկայացուցիչներ, սփիւռքահայ մասնագէտներ․ «Որոշումը ընդունողը, բնականաբար, Երեւանն է, սակայն Սփիւռքի մասնակցութիւնն ու խորհուրդները այս քննարկումներուն շատ կարեւոր են», յայտնեց Շահահն Գանտահարեան։

Share.

Leave A Reply

This site uses Akismet to reduce spam. Learn how your comment data is processed.