ՄԱՔՐՈՆ 24 ԱՊՐԻԼԸ ՀԱՅՈՑ ՑԵՂԱՍՊԱՆՈՒԹԵԱՆ ԶՈՀԵՐՈՒ ՅԻՇԱՏԱԿԻ ՕՐ ՀՌՉԱԿԱԾ Է

0

Երեւան, «Նիւզ».- Euronews.com կը հաղորդէ, որ Ֆրանսայի նախագահ Էմանուէլ Մաքրոնի 5 Փետրուարի որոշումով, Ֆրանսայի մէջ 24 Ապրիլը Հայոց Ցեղասպանութեան յիշատակի օր հռչակուած է: Այս որոշումին մասին Մաքրոն յայտարարած է նաեւ Ֆրանսայի մէջ հայկական ընկերութիւնները համակարգող խորհուրդին կազմակերպած ամէնամեայ ընթրիքին ընթացքին:

Ան յայտնած է, որ Ֆրանսա 1915 թուականէն ի վեր ցեղասպանութիւնը կ՛անուանէ մարդկութեան ու քաղաքակրթութեան դէմ յանցագործութիւն:

«Ֆրանսահայերու պատմութիւնը Ֆրանսայի պատմութիւնն է: Եւ քանի որ Հայոց Ցեղասպանութիւնը մեր յիշողութիւններուն մաս կը կազմէ, ուստի Հայոց Ցեղասպանութեան յիշատակը պէտք է յարգուի նաեւ մեր հանրապետութեան մէջ: Ձեզի հետ միասին, կարելիութիւններուս ընձեռած չափով կը պայքարիմ ժխտման որեւէ դրսեւորումի դէմ, որ կ՛անարգէ զոհերուն յիշատակն ու ողջերուն արժանապատուութիւնը», ըսած է Մաքրոն՝ աւելցնելով, որ այժմ միայն մէկ պետութեան ղեկավար՝ Թուրքիոյ նախագահը չի բաժներ Ֆրանսայի տեսակէտն ու արժէքները տուեալ նիւթին շուրջ:

Մաքրոնի խօսքով, «Թուրքիոյ նախագահ Էրտողան ամբողջ թուրք ժողովուրդը չի ներկայացներ»: Ֆրանսայի նախագահը խոստացած է նաեւ շարունակել երկխօսութիւնը՝ պատմական փաստերը լսելի դարձնելու համար. «Ես յստակօրէն կ՛ըսեմ՝ Ֆրանսայի Հանրապետութեան նախագահին ամբողջական պատասխանատուութիւնը Թուրքիոյ նախագահին երկխօսութեան հրաւիրելն է»:

Աւելցնենք, որ Ֆրանսա Հայոց Ցեղասպանութիւնը պաշտօնապես ճանչցած է 2001-ին: Հայոց Ցեղասպանութեան նիւթը պարբերաբար հակասութիւններ յառաջացուցած է Թուրքիոյ եւ Եւրոպական Միութեան յարաբերութիւններուն մէջ:

Share.

Leave A Reply

This site uses Akismet to reduce spam. Learn how your comment data is processed.