ԹՈՒՐՔԻՈՅ ԱՐՏԱՔԻՆ ԳՈՐԾՈՑ ՆԱԽԱՐԱՐԸ ԽՕՍԱԾ Է ՊՈԼՍՈՅ ՀԱՅՈՑ ՊԱՏՐԻԱՐՔԻ ԸՆՏՐՈՒԹԵԱՆ ՀԱՐՑԻ ՄԱՍԻՆ

0

«Ակօս» պարբերականը կը հաղորդէ, որ Վատիկանի մօտ ՆՍՕՏՏ Գարեգին Բ. Ծայրագոյն Պատրիարք, Ամենայն Հայոց Կաթողիկոսի ներկայացուցիչ Խաժակ արքեպիսկոպոս Պարսամեան եւ Մայր Աթոռ Սուրբ Էջմիածնի Միջեկեղեցական յարաբերութիւններու բաժինի տնօրէն Շահէ Անանեան 4 Փետրուարին Անգարայի մէջ հանդիպած են Թուրքիոյ արտաքին գործոց նախարար Մեւլութ Չաւուշօղլուի հետ: Հանդիպումին մասնակցած է Պոլսոյ Հայոց պատրիարքական փոխանորդ Արամ արքեպիսկոպոս Աթէշեան:
Հանդիպումին քննարկուած է Պոլսոյ Հայոց պատրիարքի ընտրութեան հարցը: Պատրիարքարանէն կատարուած հաղորդագրութեան մէջ կը յիշուի, որ մէկ ժամ տեւած հանդիպումի ընթացքին ծաւալուած է անկեղծ խօսակցութիւն, որու ընթացքին արտագին գործոց նախարար Չաւուշօղլու յայտնած է, որ պետութիւնը հետաքրքրուած է պատրիարքի ընտրութեան հարցով եւ կը հետեւի զարգացումներուն: Ան ըսած է նաեւ, որ լուծումի հասնելու համար պէտք է համբերատար ըլլալ:
Խաժակ արքեպիսկոպոս Պարսամեան խօսելով հանդիպումին մասին ըսած է. «Նախարարը մեզ շատ ջերմ ընդունեց, ես ալ յստակօրէն ներկայացուցի, որ իմ նպատակը ոչ թէ դուրսէն միջամտելն է, այլ մեր մտահոգութիւնները յայտնելն ու հասկնալը, թէ ինչ ձեւով կրնանք օգտակար դառնալ: Նախարարը ըսաւ, որ ինքն ալ կը հասկնայ, որ ատիկա հարց է, յայտնեց, որ պետութիւնը նոյնպէս կ’ուզէ պատրիարքի ընտրութիւն կատարել, սակայն անոր համար անհրաժեշտ է քիչ մը համբերել»:
Պոլսոյ Հայոց պատրիարք Մեսրոպ Մութաֆեան հիւանդութեան պատճառով արդէն աւելի քան 10 տարի չի պաշտօնավարեր: Անոր փոխարէն պատրիարքական փոխանորդ նշանակուած է Արամ արքեպիսկոպոս Աթէշեան:
Պոլսոյ Հայոց պատրիարքարանի հոգեւոր խորհուրդը 2017-ին Մութաֆեան ճանչցաւ որպէս «պատրիարք ի հանգստեան», իսկ անոր աթոռը՝ «թափուր»: Խորհուրդը ամիսներ ետք պատրիարքի տեղապահ ընտրեց Գարեգին արքեպիսկոպոս Պեքչեան: Անոր ընտրութենէ ձեւաւորուեցաւ յատուկ Նախաձեռնող խումբ, որ պէտք է նախապատրաստեր պատրիարքի ընտրութեան գործընթացը: Պէքչեան, սակայն, Սթամպուլի նահանգապետարանը այդպէս ալ չճանչցաւ: Նահանգապետարանէն ուղարկուած յատուկ գրութեան մէջ կ’ըսուէր, որ քանի տակաւին պատրիարք Մեսրոպ Մութաֆեան ողջ է, նոր ընտրութիւններ չեն կրնար կատարուիլ:

Share.

Leave A Reply

This site uses Akismet to reduce spam. Learn how your comment data is processed.