ՀՅԴ ԲԻՒՐՕ. «ԿԸ ԴԱՏԱՊԱՐՏԵՆՔ ԱԶԳԱՅԻՆ-ՊԵՏԱԿԱՆ ԱՐԺԷՔՆԵՐ ԿԱՄ ԽՈՐՀՐԴԱՆԻՇԵՐ ՎԱՐԿԱԲԵԿԵԼՈՒ, ԱՐԺԵԶՐԿԵԼՈՒ ՈՐԵՒԷ ՓՈՐՁ»

0

ՀՅԴ Բիւրոյի ներկայացուցիչ Յակոբ Տէր Խաչատուրեան ՀՅԴ Հանրային կապերու գրասենեակի թղթակիցին հետ զրոյցի մը ընթացքին յայտնած է ՀՅԴ Բիւրոյի տեսակէտը Հայաստանի Հանրապետութեան օրհներգը փոխելու շուրջ աւելի քան մէկ շաբաթէ ի վեր ընթացող հրապարակային բանավէճի շուրջ։
«ՀՅԴ Բիւրոյի ընկերներ, անցնող օրերուն հրապարակաւ անդրադարձած են այս հարցին՝ պատասխանելով լրագրողներու հարցումներուն։
Կրկնելու գնով ըսեմ. ՀՅԴ Բիւրօն Հայ Յեղափոխական Դաշնակցութեան համաշխարհային կառոյցին անունով կը յայտնէ իր յուսախաբութիւնն ու դժգոհութիւնը ՀՀ Ազգային Ժողովի եօթերորդ գումարման առաջին նստաշրջանի բացումէն օրեր ետք, Ազգային Ժողովի մեծամասնութեան որոշ ներկայացուցիչներ արտախորհրդարանական՝ ընկերային ցանցերու վրայ եւ կամ հարցազրոյցներու ընթացքին կատարուած յայտարարութիւններով ՀՀ քայլերգը փոխելու հարցը հանրային քննարկումի առարկայ դարձնելը։
Հաւանաբար հանրային հարթակներու վրայ այս քննարկումին անդրադառնալու անհրաժեշտութիւն չըլլար, եթէ ըստ էութեան արդէն իսկ փակուող Սփիւռքի Նախարարութեան կողմէ փորձ չկատարուէր այս տխրահռչակ բանավէճին մէջ ներքաշելու տարբեր շրջանակներ եւս։
Դատապարտելով ազգային-պետական արժէքներ կամ խորհրդանիշեր վարկաբեկելու, արժեզրկելու որեւէ փորձ՝ կոչ կ՚ուղղենք չ՚ենթարկուելու ամէն ինչ փոխելու եւ վերատեսութեան ենթարկելու անառողջ գայթակղութեան։ Այսպիսի յաւակնութիւնները ինքնահաստատումի լաւագոյն ձեւը չեն։
Անհրաժեշտ կը գտնենք յստակօրէն արձանագրել, որ պետական խորհրդանիշերու փոփոխութեան առնչուող անտեղի քննարկումները որեւէ իրաւաքաղաքական հիմք չունին: Հայաստանի դրօշը, քայլերգն ու զինանշանը մեր պետականութեան յարութեան եւ անկախութեան պատգամները նուիրականացնող սրբութիւններ են. այդ խորհրդանիշերը կարելի չէ փոխել գեղագիտական նախասիրութիւններու եւ ճաշակի հիման վրայ։
Մեր հայրենիքը ունի իսկապէս լուրջ մարտահրաւէրներ, որոնք յաղթահարելու կոչուած են արտահերթ ընտրութիւններով ձեւաւորուած այս Ազգային Ժողովը եւ կառավարութիւնը» յայտնած է Յակոբ Տէր Խաչատուրեան

Share.

Leave A Reply

This site uses Akismet to reduce spam. Learn how your comment data is processed.