ՄՈՒԱԼԼԷՄ ԻՐԱՆ ՄԵԿՆԵՑԱՒ

0



Երեքշաբթի, 5 Փետրուար 2019-ին, Թեհրանի մէջ, Իրանի Արտաքին Գործոց Նախարարութեան յարկին տակ  խորհրդակցական նիստ մը գումարուեցաւ Սուրիոյ արտաքին գործոց նախարար Ուալիտ Մուալլէմի եւ Իրանի արտաքին գործոց նախարար Մուհամմէտ Ճաուատ Զարիֆի միջեւ: Նիստին ընթացքին կողմերը քննեցին երկու երկիրներու յարաբերութիւներուն զարգացման կարելիութիւնները:

Կողմերը խօսեցան Իրանի փոխնախագահ Իսհաք Ճահանկիրիի Դամասկոս այցելութեան ընթացքին կնքուած 11 համաձայնագրերն ու փոխընբռնումի յուշագրերը կեանքի կոչելու միքանիզմներուն շուրջ:

Մուալլէմ յայտնեց, որ Սուրիա երախտապարտ է Սուրիոյ պատերազմի տարիներուն Իրանի Իսլամական Հանրապետութեան  անվերապահ զօրակցութեան համար: Ան լուսարձակի տակ առաւ Իրանի եւ Սուրիոյ գործակցութեան կարեւորութիւնը՝ յատկապէս  ԱՄՆ-ի  կողմէ երկու երկիրներուն պարտադրուած տնտեսական պատժամիջոցներու դիմագրաւման լոյսին տակ:

Իր կարգին Զարիֆ շեշտեց, որ Իրան կը շարունակէ աջակցիլ Սուրիոյ՝ մինչեւ սուրիական հողերուն ամբողջական ազատագրումը: Ապա դիտել տուաւ, որ Իրան  ամէն ջանք պիտի գործադրէ Սուրիոյ հետ իր պատմական յարաբերութիւնները ամրապնդելու համար:

Չորեքշաբթի, 6 Փետրուար 2019-ին, Մուալլէմ հանդիպում մը ունեցաւ Իրանի նախագահ Հասան Ռոհանիի հետ: Մուալլէմ փոխանցեց Սուրիոյ նախագահ Պաշշար Ասատի ողջոյնը եւ յաջողութեան մաղթանքները Ռոհանիին եւ Իրանի ժողովուրդին:

Հանդիպումին ընթացքին կողմերը խորհրդակցեցան երկու երկիրներուն ռազմավարական յարաբերութիւններու ամրապնդման, գործակցութեան աշխուժացման եւ տարածաշրջանի վերջին զարգացումներուն շուրջ:

Իր կարգին Ռոհանի ողջոյններ եւ բարի մաղթանքներ յղեց Սուրիոյ նախագահին եւ ժողովուրդին՝ շեշտելով Իրանի Իսլամական Հանրապետութեան Սուրիոյ հետ պատմական եւ եղբայրական յարաբերութիւնները զարգացնելու նախանձախնդրութիւնը:

Յիշենք, որ Մուալլէմ հանդիպումներ ունեցաւ նաեւ Իրանեան յեղափոխութեան միջազգային հարցերու հրամանատարի խորհրդական դոկտ. Ալի Աքպար Ուիլայաթիի, Իրանի Իսլամական խորհրդարանի նախագահ Ալի Լարիճանիի եւ Իրանի ազգային ապահովութեան բարձրագոյն խորհուրդի նախագահ Ալի Շամախանիի հետ:

Share.

Leave A Reply

This site uses Akismet to reduce spam. Learn how your comment data is processed.