ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ՝ ՓԵՏՐՈՒԱՐ Ա./2019

0

Սուրիական մամուլին այս շաբթուան կարեւոր լուրերէն մէկը Թրամփի ամերիկեան ուժերուն Սուրիայէն դուրս բերելու որոշումն էր: ՍԱՆԱ լրատու գործակալութիւնը հաղորդեց, որ ԱՄՆ-ի նախագահ Տանըլտ Թրամփ վերստին յայտնած է, թէ ամերիկեան ուժերը դուրս պիտի բերէ Սուրիայէն եւ Աֆղանիստանէն՝ պահելով զանոնք Իրաքի մէջ: Թրամփ ամերիկեան «CBS» կայքի թղթակիցին հետ ունեցած հարցազրոյցին ընթացքին ըսած է. «Սուրիա տեղադրուած ամերիկեան ուժերը արդէն իսկ սկսած են վերադառնալ», այս ծրագիրը վերագրելով նախորդ տարուան Դեկտեմբերին կատարած իր յայտարարութեան:
Աղբիւրին համաձայն, Թրամփ հարցազրոյցին ընթացքին յայտնած է, որ Սուրիայէն դուրս բերուած ամերիկեան ուժերը մաս պիտի կազմեն Իրաքի մէջ տեղակայուած ամերիկեան զինուորական կայանին, սակայն հետագային անոնք ԱՄՆ պիտի վերադառնան: Թրամփ ամերիկեան ուժերուն Սուրիայէն վերջնականապէս դուրս բերման ճշգրիտ ժամկէտը չէ ճշդած, աւելին՝ ան դիտել տուած է որ. «Անհրաժեշտութեան պարագային անոնք կրնան կրկին վերադառնալ»:
Թրամփ միաժամանակ յայտնած է որ Իրաքի մէջ ամերիկեան զինուորական «Այն ալ Ասատ» կայանը պիտի մնայ այնտեղ՝ դիտարկելու Իրանի ընթացքը: ՍԱՆԱ-ի համաձայն, ԱՄՆ-ի ղեկավարը իր այս արտայայտութեամբ կը հաստատէ ամերիկեան վարչակազմին ցուցաբերած թշնամական վարքագիծը անկախ պետութեան մը՝ Իրանի նկատմամբ:
Սուրիական մամուլը անդրադարձ կատարած էր նաեւ Սուրիոյ մէջ ռուսական «Հմէյմիմ» զինուորական կայանի աշխուժացման:
Սուրիական «Տամ Փրէս» կայքը տեղեկացուցած էր, որ Ռուսիա սուր-իական «Հմէյմիմ» զինուորական կայանը պատերազմական տասնեակ մը նոր օդանաւերով օժտած է՝ դիտել տալով, որ «այս քայլը Իտլիպի մէջ նոր ճակատ մը բանալու Ռուսիոյ մտադրութիւնը կ’արտացոլէ»:
Կայքին համաձայն «Հմէյմիմ»ի մէջ ռուսական պատերազմական օդանաւերուն թիւը 30-էն 50-ի բարձրացած է:
Աղբիւրը աւելցուցած է, որ «Ճապհաթ ալ Նուսրա» զինեալ ահաբեկչական խմբաւորումին եւ անոր դաշնակից ուժերուն Իտլիպի շուրջ համաձայնութեան խախտումին հետեւանքով՝ սուրիական բանակը վերջերս զինուորական ուժեր ուղարկած է Սուրիոյ հիւսիսային շրջան:
Միւս կողմէ «Շամ Թայմզ» կայքը անդրադառնալով երկրին մէջ տիրող կազի տագնապին յայտնած է, որ Սուրիոյ վառելանիւթի ընկերութեան տնօրէն Մուսթաֆա Հասուիէ «Երկիրը Այսօր» պատկերասփիւռի կայան հիւրընկալուելով զրոյց մը ունեցած է եւ յայտնած, որ մինչեւ յառաջիկայ շաբաթ Սուրիոյ բոլոր նահանգներուն մէջ կազի տագապը պիտի լուծուի: Հասուիէի համաձայն, Լիբանանի հետ նոր համաձայնագրութիւններ ստորագ-րուած են՝ կազը ցամաքային եւ ծովային միջոցներով Սուրիա ներածելու համար:
Սուրիական մամուլի էջերէն կþիմանանք, որ Սուրիոյ խորհրդարանի հերթական նիստին քննարկուած են Երիտասարդութեան Հարցերու Նախարարութեան բնակարանային մարզին առնչուող աշխատանքները:
Այս ծիրէն ներս, սուրիական «Ալ Ուաթան» թերթը անդրադարձած է խորհրդարանի Երեքշաբթի, 5 Փետրուար 2019-ի նիստին, որ յատկացուած էր ծառայողական եւ բնակարանային ոլորտին:
Սուրիոյ Խորհրդարանի անդամ Մուճիպ Տանտան խօսք առնելով ըսած է. «Երիտասարդութեան մեծամասնութիւնը ներկայիս կարողութիւն չունի իր սեփական բնակարանը գնելու՝ բնակարաններու գինի սղութեան պատճառով»:
Տանտան դիտել տուած է, որ այս հարցի լուծումը ընդհանուր եւ մասնաւոր հատուածներու պատկան մարմիններուն պատասխանատուութիւննէ, որոնք միասնաբար կրնան լուծել, ապա ան առաջարկած է, որ Երիտասարդական եւ Բնակարանային Հարցերու Նախարարութիւնը «Իւրաքանչիւր սուրիացի ընտանիքի՝ բնակարան մը» կարգախօսը որդեգրէ եւ այդ ուղղութեամբ գործնական քայլերու ձեռնարկէ:
Տանտանի պաշտօնակից Նապիլ Սալէհ խստիւ քննադատելով նախարարութեան ընթացքը ըսած է. «Բնակարանային ծրագիրներուն ծանօթանալու համար երբ նախարարութեան պաշտօնական կայքը այցելեցինք, տեսանք, որ նախարարութիւնը սահմանափակուած է ժողովներ գումարելով, օրէնսդրական մարզը զարգացնելով, ուսումնասիրութիւններ պատրաստելով, արեան տուչութեան քարոզարշաւներ կազմակերպելով եւ այլն: Նախարարութեան գործնական գլխաւոր աշխատանքը եղած է քանդուած շէնքերուն մնացորդացին վերացումն ու աղբերու վերամշակումը»: Ապա ան նկատել տուած է, թէ 6 տարի անցած է վերականգնումի խոստուներէն եւ մինչեւ այսօր գործնական քայլեր չեն առնուած եւ միլիոնաւոր սուրիացիներ բնակարանի կարիք ունին տակաւին:

Share.

Leave A Reply

This site uses Akismet to reduce spam. Learn how your comment data is processed.