ՍՐՏԻ ԽՕՍՔ՝ ԳՐԻԳՈՐ ՔԷԼԷՇԵԱՆԻ ՄԱՀՈՒԱՆ ԱՌԻԹՈՎ

0

Հաւաքուած ենք վերջին հրաժեշտը տալու սիրելի բեմադրիչ Գրիգոր Քէլէշեանին, որ անողոք հիւանդութեան մը հետեւանքով ոչ եւս է այսօր։
Գիտենք, որ կեանքին պէս հին է մահը: Միասին են անոնք ու զուգահեռ ընթացքով կը քալեն, այդուհանդերձ դժուար է հաշտուիլ անոր հետ։ Մեր հոգին կը ճմլուի, երբ անվերադարձ մեկնողը մեր սիրելին է, սրտակիցը, գործակիցը եւ հարազատը։ Մանաւանդ երբ մեզմէ յաւէտ բաժնուողը բեմադրիչ, դերասան Գրիգոր Քէլէշեանն է։
Արուեստի ու թատրոնի մարդ էր Գրիգոր Քէլէշեան: Ան իր կեանքի բոլոր փուլերուն բարին ու ճիշդը պաշտպանելով մաքուր արուեստը մարմնաւորեց իր բեմադրած գործերով։ Ան միեւնոյն հաստատակամութեամբ պայքարեցաւ իր հիւանդութեան դէմ ու շրջանցեց շատ մը դժուար փուլեր, սակայն պատահեցաւ անխուսափելին …:
Հաւանաբար նման կորուստներ պատճառ կ’ըլլան, որ անդրադառնանք, թէ մեր կողքին տասնամեակներ շարունակ ունէինք բարեկամ մը, հարազատ մը, որ այսպէս, յանկարծակիօրէն, լուռ հրաժեշտ կու տայ մեզի: Մինչդեռ մենք կը կարծէինք, որ վերջնական բաժանումի պահը դեռ հեռու է։ Այժմ մենք՝ մնացողներս, կը սկսինք մտածել, թէ ինչպէ՞ս գրուած էր այս մարդուն կեանքին գիրքը, ինչպիսի՞ ծառայութիւններով հարստացուցած էր ան իր կեանքը: Ահա այդ հարստութիւնը ժառանգ կը մնայ մեզի։
Գրիգոր Քէլէշեան Հայաստանի մէջ բարձրագոյն ուսումը աւարտելէ ետք, վերադառնալով իր ծննդավայրը՝ Հալէպ, եղաւ հալէպահայ թատերական կեանքի առաջին արհեստավարժ բեմադրիչը: 1970-էն սկսաւ իր բեմադրական գործունէութիւնը՝ «Անոյշ» օփերայով: Իրականացուց 130-է աւելի բեմադրութիւններ, արժանացաւ պետական հաստատութիւններէ, նաեւ հայկական եւ արաբական միութիւններէ մետալներու եւ վահանակներու։ Աշխատեցաւ Հալէպի գրեթէ բոլոր թատերախումբերուն հետ, յատկապէս ՀԵԸ-ի «Պ.Ադամեան» թատերախումբին հետ ունեցաւ աւելի քան 25-ամեայ բեմադրական անմոռանալի աշխատանք:
Հանգուցեալին վաստակը մեծ է «Ադամեան» թատերախումբէն ներս: Շնորհիւ անոր, «Ադամեան» մեծ վերելք եւ յառաջընթաց արձանագրած է հալէպահայ գաղութի եւ Սփիւռքի թատերական արուեստի պատմութեան մէջ։ Բառերով կարելի չէ գնահատել թատերական կեանքին անոր գործուն մասնակցութիւնը։
Այս տխուր առիթով, Հայկական Բարեգործական Ընդհանուր Միութեան, Հայ Երիտասարդաց Ընկերակցութեան եւ «Պ.Ադամեան» թատերախումբին ընտանիքին անունով խորապէս կը ցաւակցինք հանգուցեալին կողակիցին ու հարազատներուն, Աստուծմէ հայցելով երկնային մխիթարութիւն եւ համբերութիւն։
«Ադամեան»ի հետ իր վերջին բեմադրած գործը եղաւ «Անմար Բոցը»: Թող սիրելի բեմադրիչ Գրիգոր Քէլէշեանի յիշատակը միշտ անմար բոցին պէս վառ մնայ մեր բոլորին սրտերուն եւ հոգիներուն մէջ: Այսօր «Ադամեան»ը Հալէպի հողին յանձնեց իր հոգեհարազատ հատորը, թող հողը թեթեւ գայ վրան…:
Յիշատակն Արդարոց Օրհնութեամբ Եղիցի։

ՀԲԸՄ-ի ՀԵԸ-ի
«Պ. Ադամեան» Թատերախումբի Ընտանիքներ

Share.

Leave A Reply

This site uses Akismet to reduce spam. Learn how your comment data is processed.