ՀԱՅԱՍՏԱՆԻ ԱԶԳԱՅԻՆ ԺՈՂՈՎԻ ՆԱԽԱԳԱՀԸ ԱՐՑԱԽ ԿԱՏԱՐԱԾ ԻՐ ԱՅՑԵԼՈՒԹԵԱՆ ՄԱՍԻՆ ՄԱՆՐԱՄԱՍՆՈԻԹԻՒՆՆԵՐ ՆԵՐԿԱՅԱՑՈՒՑԱԾ Է

0

Հայաստանի Հանրապետութեան Ազգային Ժողովի նախագահ Արարատ Միրզոյեան դիմատետրի իր էջին վրայ գրած է. «Աշխատանքային այցելութեամբ իմ շատ սիրելի Արցախն էի։ Ջերմ, բովանդակալից եւ արդիւնաւէտ հանդիպումներ ունեցանք Արցախի Հանրապետութեան նախագահ Բակօ Սահակեանի, Արցախի Հանրապետութեան Ազգային ժողովի նախագահ Աշոտ Ղուլեանի, Արցախի Անվտանգութեան Խորհուրդի քարտուղար Վիտալի Բալասանեանի, շարք մը պետական, ռազմական, քաղաքական, հոգեւոր եւ մշակութային գործիչներու հետ։
Հայաստանի եւ Արցախի ներքին ու արտաքին քաղաքականութեան եւ անվտանգութեան առնչուող բազմաթիւ հարցերու մասին անկեղծ եւ հանգամանալից քննարկում կատարեցինք Արցախի խորհրդարանական խմբակցութիւններու ղեկավարներու, յանձնաժողովներու նախագահներու եւ պատգամաւորներու հետ: Կը կարծեմ, որ մերօրեայ տեղեկատուական խառնակչութեան պայմաններուն մէջ այսպիսի ուղղակի զրոյցները եւ տեղեկատուութեան փոխանակումը խիստ կարեւոր են հայկական երկու հանրապետութիւններու ներդաշնակ եւ համահունչ զարգացման համար։
Այցելեցի մարտական դիրքեր, Ստեփանակերտի յուշահամալիրի մէջ յարգանքի տուրք մատուցեցի արցախեան ազատամարտի նահատակներու յիշատակին, այցելեցի Քր․ Իւանեանի անուան ռազմական վարժարան, ուր զրուցեցի ուսուցիչներու եւ սաներու հետ: Մեծ գոհունակութեամբ այցելեցի նաեւ Շուշիի Կերպարուեստի պետական թանգարան, Երկրաբանութեան թանգարան եւ Հայկական դրամի թանգարան»:

Share.

Leave A Reply

This site uses Akismet to reduce spam. Learn how your comment data is processed.