ԹՈՒՐՔ-ՉԻՆԱԿԱՆ ՅԱՐԱԲԵՐՈՒԹԻՒՆՆԵՐԸ ԿՐԿԻՆ ԼԱՐՈՒԱԾ ԵՆ

0

«Հապէրթուրք» կը հաղորդէ, որ թուրք-չինական յարաբերութիւններուն մէջ կրկին լարուածութիւն յառաջացած է Չինաստանի Սինցզեան ինքնավար մարզին մէջ ապրող թրքական ծագում ունեցող ույղուրական համայնքին պատճառով։
Լարուածութիւնը սկսած է Թուրքիոյ Արտաքին Գործոց Նախարարութեան խօսնակ Համի Աքսոյի այն յայտարարութենէն ետք, որով ան չինական իշխանութիւններէն պահանջած է փակել Չինաստանի մէջ առկայ որոշ ճամբարներ, ուր կը պահուին ույղուրական համայնքի մեծաթիւ ներկայացուցիչներ։
Աքսոյ այդ ճամբարները որակած է «համակեդրոնացման ճամբարներ», ուր կալանքի տակ կը գտնուին բազմաթիւ ույղուրներ, որոնք ըստ նախարարութեան՝ կþենթարկուին կրօնական, քաղաքական ճնշումներու եւ ձուլումի քաղաքականութեան։
Աքսոյ յայտնած է, որ այդ ճամբարներուն փակման պահանջը Թուրքիոյ կողմէ կրկին ներկայացուած է, երբ անոնցմէ մէկուն մէջ, իբրեւ թէ, սպանուած է ույղուր հանրածանօթ աշուղ Ապտուլ Ռեհիմ Հեյիթ։
Ի պատասխան Թուրքիոյ մեղադրանքներուն՝ Չինաստանի Արտաքին Գործոց Նախարարութենէն յայտնած են, որ թրքական կողմին յայտարարութիւնը ամբողջովին սուտ է եւ իրականութեան չի համապատասխաներ։ Չինական կողմը նախ ընդգծած է, որ այն ճամբարները, որոնց մասին խօսած էր Թուրքիոյ ԱԳՆ-ի մամլոյ խօսնակը, բնաւ «համակեդրոնացման ճամբարներ» չեն, աւելին՝ անոնք կը նպաստեն, որ ույղուրներու որոշ ներկայացուցիչներ հեռու մնան ահաբեկչութենէն եւ համարկուին հասարակութեան մէջ:
Չինաստանի ԱԳՆ-ը նոյնիսկ ույղուր աշուղի մասնակցութեամբ յատուկ տեսանիւթ մը հրապարակած է, ուր ան կը զրուցէ լրագրողի մը հետ եւ կը պատմէ իր մասին։ Ըստ չինական կողմին, տեսանիւթը նկարահանուած էր 10 Փետրուարին, իսկ ույղուր աշուղը ողջ է։

Share.

Leave A Reply

This site uses Akismet to reduce spam. Learn how your comment data is processed.