ՄԱՐԶԱԿԱՆ՝ ՓԵՏՐՈՒԱՐ Բ./2019

0

ՄԻՋԱԶԳԱՅԻՆ


ՖԻՖԱ-Ի Դասաւորման Մէջ Սուրիա 10 Աստիճան Նահանջեց
ՖԻՖԱ-ի հրապարակած նոր դասաւորման մէջ Սուրիոյ ֆութպոլի հաւաքականը վերջին շրջանին արձանագրած ձախող արդիւնքներուն պատճառով ընդհանուր դասաւորման աղիւսակին մէջ տասը աստիճան նահանջեց եւ գրաւեց 83-րդ դիրքը: Աղիւսակին առաջին դիրքին վրայ մնաց Պելճիքան, անոր յաջորդեցին Ֆրանսան, Պրազիլը եւ Խրուաթիան: Առաջին Տասնեակին մէջ եղան նաեւ Անգլիան, Փորթուկալը, Ուրուկուէյը, Զուիցերիան, Սպանիան եւ Դանիան: Յիշենք, որ Հայաստանի հաւաքականը անփոփոխ՝ 101-րդ դիրքին վրայ մնաց:

Կոռ Երիցեան Տօնեց 10-րդ Անընդմէջ Յաղթանակը
Հայ արհեստավարժ բռնցքամարտիկ, WBO վարկածով աշխարհի երիտասարդներու ախոյեան Կոռ Երիցեան տօնեց իր 10-րդ անընդմէջ յաղթանակը: Սոչիի մէջ ընթացող արհեստավարժ բռնցքամարտի երեկոյի ընթացքին Հայաստանը ներկայացնող բռնցքամարտիկը յաղթեց Մաքսիմիլանօ Լեոնէլ Սքալզոնէին: Հայ մարզիկը յաղթանակի հասաւ արդէն առաջին կիսախաղին:

Սլովենիացի Չեֆերին Վերընտրուեցաւ «Իւ. Է. Էֆ. Ա.»ի Նախագահ
Ուրբաթ օր Հռոմի մէջ տեղի ունեցաւ Եւրոպայի «Իւ. Է. Էֆ. Ա.»ի համագումարը եւ կոմիտէի նախագահական ընտրութիւնը, որուն աւարտին 51 տարեկան սլովենացի Ալեքսանտր Չեֆէրի վերընտրուեցաւ «Իւ. Է. Էֆ. Ա.»ի նախագահ: Ան այդ պաշտօնին համար առաջադրուած միակ թեկնածուն էր: Աւելցնենք, որ ան նախապէս վարած է Սլովենիոյ ֆութպոլի դաշնակցութեան նախագահի պաշտօնը, իսկ 2016-ին ստանձնած է այս պաշտօնը՝ դառնալով «Իւ. Է. Էֆ. Ա.»ի 7-րդ նախագահը:

Սարին Չձեռնուեցաւ Կուարտիոլայի Հետ
Անգլիոյ ֆութպոլի ախոյեանութեան 26-րդ փուլի մրցումներուն ընթացքին, Կիրակի երեկոյեան Մանչեսթըր Սիթին 6 – 0 արդիւնքով պարտութեան մատնեց Չելսին: Յաղթական խումբին երեք կոլերը նշանակեց Աքուիարոն, երկու կոլ Ռահիմ Սթէրլինկը, իսկ մէկ կոլ Ճոնտոճան: Հանդիպումէն ետք, լոնտոնցիներու գլխաւոր մարզիչ Մաուրիցիօ Սարին չսեղմեց մանչեսթրեան ակումբը գլխաւորող Պէպ Կուարտիոլայի ձեռքը: Հանդիպումը աւարտելէ անմիջապէս ետք, իտալացին հանդերձարան ուղղուեցաւ: Անոր փոխարէն Կուարտիոլայի հետ ձեռնուեցաւ Սարիի օգնական Ջանֆրանկօ Ցոլան:

Պայերն Միւնիխ Նոր Մարզիչ Պիտի Ունենայ
Ըստ գերմանական մամուլին, երկիրի ֆութպոլի գործող ախոյեան Պայերն Միւնիխ յառաջիկայ տարեշրջանին համար փոփոխութեան պիտի ենթարկէ խումբին մարզիչը: Ախոյեան ակումբին վարչակազմը դժգոհ է խումբի ներկայ մարզիչէն՝ Նիքօ Քովաչէն: Ըստ հաղորդուած տեղեկութիւններուն, սոյն պաշտօնին համար կան երկու թեկնածուներ, որոնցմէ մէկն է Մանչեսթըր Իւնայթըտի նախկին մարզիչ Ժոզէ Մուրինիօն, իսկ երկրորդը՝ Ռէալ Մատրիտէն հեռացած Խիւլէն Լոփեթէկին:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.