ՆԱԽԱԳԱՀ ԱՍԱՏ. «ՄԵՆՔ ԱՅՍ ՊԱՏԵՐԱԶՄԸ ՈՉ ԹԷ ԻՐԱՐՈՒ ԴԷՄ ԼԱՐՈՒԵԼՈՎ, ԱՅԼ ՄԻԱՍՆԱԲԱՐ, ՈՒՍ-ՈՒՍԻ ՏԱԼՈՎ ՊԻՏԻ ՅԱՂԹԱՀԱՐԵՆՔ»

0

Սուրիոյ նախագահ Պաշշար ալ Ասատ յայտնեց, որ սուրիական բանակին, անոր դաշնակից ուժերուն եւ բարեկամ պետութիւններուն զօրակցութեամբ յաջողեցանք ահաբեկչութեան դէմ դնել ու յաղթել, շեշտելով, որ երկիրը պաշտպանելը կարելի չէր դառնար առանց Սուրիոյ ժողովուրդի տարբեր խաւերուն միասնականութեան ու դիմադրողականութեան։ 
Կիրակի, 17 Փետրուար 2019-ին, Սուրիոյ նախագահ Պաշշար ալ Ասատ Սուրիոյ նահանգներու տեղական ինքնակառավարման Խորհուրդի պատասխանատուներուն ընդունելութեան ընթացքին խօսք առնելով ըսաւ. «Իւրաքանչիւր փորձառութիւն ազգի մը վերակերտումին կը նպաստէ, անոր ուժ եւ կորով կը պարգեւէ: Սուրիան զօրաւոր է`պայքարեցաւ եւ քաջաբար դիմադրեց ահաբեկչական պատերազմը, անոր համար ալ աւելի զօրաւոր եւ վճռակամ պիտի դառնայ պատերազմէն վերջ»: Ասատ յայտնեց, որ հայրենիքը առուծախի ենթակայ չէ, որովհետեւ սուրբ է եւ իր իսկական տէրը ունի, գործակալներու բռնարարքներուն հետեւանքով պիտի չկործանի։ Անդրադառնալով տեղական ինքնակառավարման խորհուրդին, Սուրիոյ նախագահը յայտնեց. «Տեղական ինքնակառավարման խորհուրդին նպատակը պէտք է ըլլայ զանազան շրջաններու բարգաւաճման հաւասարակշռութիւնը պահպանել եւ տեղական մասնաճիւղերուն իրաւասութիւն տալ` ինքնորոյն կերպով զարգացնելու տնտեսական, ճարտարագիտական, մշակութային եւ ծառայողական մարզերը»։

Ասատ ահաբեկչութեան դէմ պատերազմին մասին խօսելով յայտնեց, թէ որեւէ յաղթանակէ ետք, թշնամին պարտութեան կը մատնուի եւ դաւաճաններ, գործակալներ զայրոյթի կը մատնուին: Ապա խօսքը վերջիններուն ուղղելով ըսաւ.«Նախ դուք ձեզ, ապա ձեր հայրենիքը ծախեցիք… Չեմ ըսեր ձեր սկզբունքները ծախեցիք, որովհետեւ ի սկզբանէ սկզբունք չունէիք։ Չէք գիտակցիր, որ մարդ արժէք կ՛ունենայ այն ատեն միայն, երբ իր ժողովուրդին իղձերը կը մարմնաւորէ։ Մենք այս պատերազմը ոչ թէ իրարու դէմ լարուելով, այլ միասնաբար, ուս-ուսի տալով պիտի յաղթահարենք։ Որեւէ յաղթանակ պիտի ըլլայ ահաբեկչութեան դէմ արձանագրուած յաղթանակ։ Կարգ մը սուրիացիներու ահաբեկչութեան եւ դաւաճանութեան մէջ ներքաշուիլը չի նշանակեր, որ անոնք սուրիական միջավայրէն խաւ մը կը ներկայացնեն։
Սուրիոյ նախագահը ԱՄՆ-ի գործակալը համարեց նաեւ Թուրքիոյ նախագահ Էրտողանը, ապա անդրադառնալով Սուրիոյ հիւսիսային շրջանի մէջ Թուրքիոյ դաւադրութիւններուն եւ ներթափանցումի փորձերուն ըսաւ, որ ուշ կամ կանուխ բռնի կերպով Սուրիա թափանցած բոլոր օտար ուժերը դուրս պիտի գան մեր երկրէն ու Սուրիոյ ամբողջական տարածքը պիտի ազատագրուի սուրիական բանակին ջանքերով: Ասատ պատրաստակամութիւն յայտնեց ներքին հարցերու շուրջ սուրիացիներու հետ բանակցելու եւ համապատասխան ու համոզիչ լուծումներու հասնելու համար:
Նախագահը եզրափակելով ըսաւ, որ Սուրիա 4 տեսակ պատերազմ կը մղէ՝ ահաբեկչութեան դէմ, ապատեղեկատուութեան դէմ, Սուրիան պառակտել փորձող արտաքին թշնամիներու դէմ եւ ներքին կարգով՝ փտածութեան դէմ:

Share.

Leave A Reply

This site uses Akismet to reduce spam. Learn how your comment data is processed.