ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ ՝ ՓԵՏՐՈՒԱՐ Գ./2019

0

Այս շաբաթ սուրիական մամուլը հարուստ էր տեղական լուրերով: ՍԱՆԱ լրատու գործակալութիւնը լայն տեղ յայտկացուցած էր Մոսկուայի մէջ տեղի ունեցած Վալտայի խորհրդաժողովին Պուսայնա Շաապանի արտասանած խօսքին:
Սուրիոյ Հանրապետութեան նախագահութեան տեղեկատուական եւ քաղաքական հարցերու խորհրդատու Շաապան շեշտած է, որ Սուրիա պիտի շարունակէ ահաբեկչութեան դէմ իր պատերազմը եւ ազատագրէ բռնագրաւուած իւրաքանչիւր տարածք: Ապա աւելցուցած է, որ կարգ մը երկիրներ, ինչպէս ԱՄՆ եւ Թուրքիա, ահաբեկչութեան դէմ պայքար յայտարարելով մէկտեղ կը զօրակցին անոր՝ Սուրիոյ տագնապը երկարաձգելու միտումով:
Շաապանի համաձայն, Ռուսիա կարեւոր քայլերու ձեռնարկած է ահաբեկչութեան դէմ պատերազմին ընթացքին: Ան ԱՄՆ-ի գործակցութեան կոչ ուղղած է, սակայն Ուաշինկթըն եւ իր դաշնակիցները չեն ընդառաջած կոչին ու շարունակած են զօրավիգ կանգնիլ ահաբեկչութեան: Աւելին՝ անոնք Սուրիոյ դէմ ապօրինի պատժամիջոցներ սահմանած են:
Շաապան RT կայքէջին յայտնած է նաեւ, որ ԱՄՆ Լիպիոյ, Աֆղանիստանի եւ Իրաքի մէջ իր պարտութենէն ետք, չէր ակնկալեր, որ Սուրիա կրնայ պայքարիլ եւ իր դաշնակից պետութիւններուն աջակցութեամբ դաւադրական ծրագրերը ձախողութեան մատնել:
Անդրադառնալով Արեւելեան Եփրատի ափին պետական անկախ միաւոր հիմնելու ԱՄՆ-ի նկրտումներուն, Շաապան յայտնած է, որ Սուրիոյ ժողովուրդը դէմ է իր երկրին քայքայումին ու պիտի շարունակէ ազատագրել գրաւուած իւրաքանչիւր տարածք:
Լուսարձակի տակ առնելով Սուրիական հողեր բռնագրաւելու Թուր-քիոյ ախորժակին, Շաապան ըսած է. «Մենք թուրքը կը համարենք բռնատէր, այնպէս ինչպէս ամերիկացին եւ իսրայէլցին, որովհետեւ ան մեր երկրէն տարածքներ գրաւած է, սուրիացիներս, սակայն, ամենամօտ ապագային պիտի ազատագրենք մեր ամբողջ երկիրը»:
Սուրիական թերթերուն մէջ կը կարդանք նաեւ, որ Ռուսիոյ, Իրանի եւ Թուրքիոյ նախագահներու Սոչիի գագաթնաժողովի եզրափակիչ հաղորդագրութեան մէջ շեշտը դրուած է Սուրիոյ ինքնիշխանութեան եւ տարածքային ամբողջականութեան վրայ:
Հաղորդագրութեան մէջ յիշուած է, որ երեք նախագահները մանրամասնօրէն խորհրդակցած են Իտլիպի լարուածութեան մեղմացման գօտիին շուրջ եւ դատապարտած «Ճապհաթ ալ Նուսրա» զինեալ ահաբեկչական խմբաւորման բռնարարքները:
ՍԱՆԱ-ի համաձայն, նախագահները համաձայնած են յաջորդ գագաթնաժողովը գումարել Թուրքիոյ մէջ:
Նոյն օրերուն Փութին մամլոյ ասուլիսի մը ընթացքին յայտնած է, որ Իտլիպի մէջ լարուածութեան մեղմացման գօտին ժամանակաւոր է եւ արգելք չի հանդիսանար սուրիական բանակի զինուորական գործողութիւններուն: Ապա աւելցուցած է, որ ԱՄՆ-ի զինուորական ուժերուն Սուրիայէն դուրս գալը խաղաղութեան հաստատման պիտի նպաստէ ու Սուրիոյ գերիշխանութիւնը պիտի ամրագրէ:
Իր կարգին, Իրանի նախագահ Հասան Ռոհանի յայտնած է, որ Սուրիոյ տագնապը քաղաքական լուծումով կարելի է յաղթահարել, իսկ Սուրիոյ ապագան սուրիացիներուն կամքին համաձայն պիտի սահմանուի:
ՍԱՆԱ-ի մէջ կը կարդանք նաեւ, որ Լիբանանի պաշտպանութեան նախարար Իլիաս պու Սաապ լրագրողներու հետ հանդիպումի մը ընթացքին շեշտած է Սուրիոյ տագնապը միջազգային որոշումներու լոյսին տակ յաղթահարելու անհրաժեշտութիւնը:
Այլ առումով, RT կայքէջը յայտնած է, որ Ռուսիոյ արտաքին գործոց նախարար Սերկէյ Լաւրով իր Սլովացի պաշտօնակից Մերոսլավ Լաճաքի հետ ունեցած մամլոյ ասուլիսին ընթացքին յայտնած է, որ ԱՄՆ-ի նպատակը Սուրիան քայքայել եւ Եփրատի արեւելեան ափին պետական անկախ միաւոր մը յառաջացնելն է:

Share.

Leave A Reply

This site uses Akismet to reduce spam. Learn how your comment data is processed.