ՆԱԽԱԳԱՀ ԱՍԱՏ. «ՄԵՆՔ ԱՅՍ ՊԱՏԵՐԱԶՄԸ ՈՉ ԹԷ ԻՐԱՐՈՒ ԴԷՄ ԵԼԼԵԼՈՎ, ԱՅԼ ՄԻԱՍՆԱԲԱՐ, ՈՒՍ-ՈՒՍԻ ՏԱԼՈՎ ՊԻՏԻ ՅԱՂԹԱՀԱՐԵՆՔ»

0

Սուրիոյ նախագահ Պաշշար ալ Ասատ յայտնեց, որ սուրիական բանակին, անոր դաշնակից ուժերուն եւ բարեկամ պետութիւններուն զօրակցութեամբ Սուրիա ահաբեկչութեան դէմ իր պայքարին մէջ յաղթական դուրս պիտի գայ, աւելցնելով որ երկիրին պաշտպանութիւնը կարելի չէր դառնար առանց Սուրիոյ ժողովուրդի տարբեր խաւերուն միասնական դիմադրողականութեան։ Կիրակի, 17 Փետրուար 2019-ին, Սուրիոյ նախագահը նահանգներու տեղական ինքնակառավարման խորհուրդի պատասխանատուներուն ընդունելութեան ընթացքին խօսք առնելով ըսաւ. «Իւրաքանչիւր փորձառութիւն ազգի մը վերակերտումին կը նպաստէ, անոր ուժ եւ կորով կը պարգեւէ:  Սուրիան զօրաւոր է. ան պայքարեցաւ  ահաբեկչական պատերազմէն յաղթական դուրս գալու ի խնդիր ու աւելի զօրաւոր ու վճռակամ դարձաւ»: Ասատ յայտնեց, որ հայրենիքը առուծախի ենթակայ չէ, որովհետեւ սուրբ է, արեւմտեան երկիրներու գործակալներուն դաւադրութիւններով պիտի չկործանի։ Անդրադառնալով տեղական ինքնակառավարման խորհուրդին, Սուրիոյ նախագահը յայտնեց. «Տեղական ինքնակառավարման խորհուրդին նպատակը պէտք է ըլլայ զանազան շրջաններու բարգաւաճման հաւասարակշռութիւնը պահպանել եւ տեղական մասնաճիւղերուն  իրաւասութիւն տալ‘ ինքնորոյն կերպով զարգացնելու տեղւոյն տնտեսական, ճարտարագիտական, մշակութային եւ ծառայողական ոլորտները»։Ասատ ահաբեկչութեան դէմ պատերազմին մասին խօսելով յայտնեց, թէ որեւէ յաղթանակէ ետք, երբ թշնամին պարտութիւն կրէ, դաւաճաններ ու գործակալներ զայրոյթի կը մատնուին: Ապա խօսքը վերջիններուն ուղղելով ըսաւ.«Նախ դուք ձեզ, ապա ձեր հայրենիքը ծախեցիք… Չեմ ըսեր ձեր սկզբունքները ծախեցիք, որովհետեւ  սկզբունք չունէիք։ Չէք գիտակցիր, որ մարդ արժէք կ’ունենայ այն ատեն միայն, երբ իր ժողովուրդին իղձերը կը մարմնաւորէ։ Մենք այս պատերազմը ոչ թէ իրարու դէմ ելլելով, այլ միասնաբար, ուս-ուսի տալով պիտի յաղթահարենք։ Որեւէ յաղթանակ պիտի ըլլայ ահաբեկչութեան դէմ արձանագրուած յաղթանակ։ Կարգ մը սուրիացիներու ահաբեկչութեան եւ դաւաճանութեան մէջ ներքաշուիլը չի նշանակեր, որ անոնք սուրիական ընկերութիւնը կը ներկայացնեն»։Սուրիոյ նախագահը ԱՄՆ-ի գործակալ համարեց նաեւ Թուրքիոյ նախագահ Էրտողանը, ապա անդրադառնալով Սուրիոյ հիւսիսային շրջանի մէջ Թուրքիոյ դաւադրութիւններուն եւ ներթափանցումի փորձերուն ըսաւ, որ ուշ կամ կանուխ բռնի կերպով Սուրիա թափանցած բոլոր օտար ուժերը դուրս պիտի գան մեր երկիրէն ու Սուրիոյ ամբողջական տարածքը պիտի ազատագրուի սուրիական բանակին ջանքերով: Ասատ պատրաստակամութիւն յայտնեց ներքին հարցերու շուրջ սուրիացիներու հետ բանակցելու՝ համապատասխան  ու համոզիչ լուծումներու յանգելու համար:«Ես չեմ ուզեր ենթադրութիւններու հիման վրայ խանդավառութիւն ստեղծել՝ յայտնելով, որ պատերազմը իր աւարտին հասած է արդէն… խօսքս միայն քաղաքացիներուն չեմ ուղղեր, այլեւ պատկան մարմիններուն… կարգ մը պատկան մարմիններու: Մենք, ըստ սովորութեան, կը սիրենք գոռոզանալ եւ խօսիլ այնպիսի ինքնավստահութեամբ, որ ենթադրել կու տանք, թէ պատերազմը աւարտած է արդէն ու մենք վերջնական յաղթանակ կերտած ենք: Պատերազմը կը շարունակուի: Մենք 4 տեսակ պատերազմ կը մղենք: Առաջինը՝ զինուորական պատերազմն է, որուն ձեռքբերումները կը շօշափենք գետնի վրայ, սուրիական բանակին եւ անոր դաշնակից ուժերուն աջակցութեամբ, երկրորդը՝ մեր երկրի պաշարումին դէմ պատերազմն է, զոր չենք յաղթահարած ամբողջական կերպով: Երրորդը՝ համացանցային ապատեղեկատուութեան պատերազմն է, որուն ընթացքին հակառակորդ կողմեր իրենց գաղափարախօսութիւնն ու հրահրիչ մտքերը կը տարածեն ոչ միայն արհեստագիտութեան ոլորտին տիրապետած ըլլալնուն համար, այլեւ մեր անզգուշութեան ու երբեմն ալ թերացումին հետեւանքով: Չորրորդը՝ ներքին ճակտի վրայ, փտածութեան դէմ պայքարն է, որ նոյնքան կարեւոր է վերականգնումի յաջող ընթացքը ապահովելու համար», եզրափակեց Սուրիոյ նախագահը: 

Share.

Leave A Reply

This site uses Akismet to reduce spam. Learn how your comment data is processed.