ՆԱԽԱԳԱՀԻՆ ԱՐՏԱՔԻՆ ԵՒ ՆԵՐՔԻՆ ՈՒՂԵՐՁՆԵՐԸ

0

Կիրակի, 17 Փետրուարին, Սուրիոյ նախագահը Տեղական Ինքնակառավարման մարմիններուն ներկայութեան արտասանած իր ճառին ընդմէջէն պարզեց ահաբեկչական պատերազմին եւ արտաքին միջամտութիւններուն դէմ դնելու հիմնական երաշխիքը՝ պետական հաստատութիւններու թափանցիկ աշխատանքին ու ժողովուրդին միասնութեան ակնարկելով:
Նախագահը նախ անդրադարձաւ պատերազմին ու տնտեսական պաշարումին յաղթահարման նպաստող այլազան ոլորտներուն՝ տնտեսական, ընկերային, քաղաքական եւ զինուորական, ապակեդրոնացեալ աշխատանքի կոչ ուղղելով նահանգային խորհուրդներուն: Նախագահը դիտել տուաւ, որ Տեղական Ինքնակառավարման մարմիններու ընտրութիւնները վկայեցին, որ Սուրիան ուժեղ երկիր է եւ սահմանադրութեամբ ամրագրուած իր նպատակները կեանքի կոչելով կը բացառէ պետական համակարգի փլուզման ձգտող արտաքին ուժերուն միջամտութիւնը: Ան միեւնոյն ատեն հաստատեց, որ երկրի ներկայ իրավիճակը կը պահանջէ պատասխանատուութեամբ եւ պատկանելիութեան գիտակցութեամբ մօտենալ տարուող աշխատանքներուն:
Անդրադառնալով տարածաշրջանային հարցերուն, Սուրիոյ նախագահը որոշակի լաւատեսութեամբ վերլուծեց երկրի տարածքներու մեծամասնութեան ազատագրումն ու ԱՄՆ-ի ուժերուն դուրս բերումը, միեւնոյն ատեն, սակայն, իրապաշտ նայուածքով զգուշացուց, որ պատերազմը իր աւարտին չէ հասած, իսկ որոշ երկիրներ, ինչպէս Թուրքիան եւ ԱՄՆ-ն, քաղաքական շահեր ապահովելու միտումով կը շարունակեն միջամտել Սուրիոյ ներքին հարցերուն՝ տարածքներ գրաւելով, սահմանադրութեան փոփոխութեան գործընթացին վրայ ճնշում բանեցնելով եւ այլն:
Նախագահ Ասատ Թուրքիոյ նախագահը ԱՄՆ-ի գործակալը համարեց՝ շեշտելով, որ Սուրիոյ բոլոր տարածքները պիտի ազատագրուին եւ սուրիական բանակին վերահսկողութեան ենթակայ պիտի դառնան ուշ կամ կանուխ: Այս հաստատումով նախագահը պարզեց, որ Սուրիոյ հիւսիսային շրջանի հարցերուն լուծման առումով կարելի չէ վստահիլ Թուրքիոյ, ուստի սուրիական բանակը իր դաշնակիցներուն օժանդակութեամբ, երկրի տարածքային ամբողջականութեան պահպանման միակ երաշխիքը կը համարուի: Այս ուղղութեամբ ան բանակցութեան կոչ ուղղեց սուրիական բոլոր կողմերուն, ներառեալ քրտական խմբաւորումներուն, դիտել տալով, որ սուրիական համընդհանուր շահերուն եզրին մէջ կարելի է լուծել իւրաքանչիւր հարց, եթէ զանց առնուի արտաքին ուժերու միջամտութեան վստահելու կարգ մը կողմերուն անխոհեմ քաղաքականութիւնը:
Նախագահին հաստատումով, Սուրիա 4 տեսակ պատերազմ կը դիմագրաւէ՝ տեղեկատուական, զինուորական, տնտեսական պաշարման եւ փտածութեան:
Այս իմաստով ան ներկայ մարմիններուն կոչ ուղղեց պետական համակարգին մէջ առկայ փտածութեան դէմ եւս պայքարելու՝ դիտել տալով, որ երկիրը եւ քաղաքացին խաղաղութեան ափ հասցնելու, անհամար դժուարութիւնները յաղթահարելու, գաղթականներուն վերադարձը ապահովելու եւ վերականգնումին թափ տալու համար անհրաժեշտ է համախոհութեամբ գործել, ազգային շահերով առաջնորդուիլ, թափանցիկ կերպով աշխատիլ ու քաղաքացիին վստահութիւնը շահիլ, որովհետեւ սուրիական ընկերութեան ներքին միասնութիւնն ու զօրութիւնը նշեալ 4 պատերազմներուն բովէն յաղթական դուրս գալու հիմնական երաշխիքները կը համարուին, իսկ եսակեդրոն աշխատողները ոչ մէկ ձեւով կը նպաստեն այդ միասնութեան: Ընդհակառակը. անոնք ճեղքեր յառաջացնելով սուրիական ընկերութեան մէջ՝ արտաքին միջամտութիւններու դուռ կը բանան:

«Գ.»

Share.

Leave A Reply

This site uses Akismet to reduce spam. Learn how your comment data is processed.